Ég stend nú í prófkjörsbaráttu þar sem ég sækist eftir 2. sæti í prófkjöri Sjálfstæðisflokksins í Norðaustur kjördæmi 14. mars næstkomandi. Af þeim sökum hef ég ákveðið að í þessu fyrsta bloggi mínu hér á Eyjunni muni ég gera grein fyrir fjárhagslegum tengslum mínum við atvinnulífið. Það er sanngjarnt gagnvart stuðningsmönnum mínum auk þess sem að ég mæti með því þeirri kröfu sem uppi er í þjóðfélaginu að menn leggi spilin á borðið – fyrr verði efasemdum og óvissu ekki eytt.
Seint haustið 2006 var mér boðið að verða forstjóri nýs fjárfestingarbanka, Askar Capital, sem setja átti á laggirnar áramótin þar á eftir. Eins og gengur var samið um laun og sem hluta af starfskjörum var mér boðið að kaupa hlut í bankanum. Mér var tjáð að launin yrðu ekki í samræmi við það sem tíðkaðist í fjármálageiranum á þeim tíma en að í staðinn mér yrði umbunað með hlutdeild í árangri nýs banka. Í þessu samhengi var mér boðið að öðlast rétt á að kaupa 300 milljón hluti á sama gengi og stofnhlutafar nutu – genginu einum – á þrem árum. Ef bankinn gengi vel þá myndi hlutaféð vaxa í verði og ég hagnast á því. Þannig væru hagsmunir mínir beintengdir hagsmunum bankans. Jafnframt var mér tjáð að stofnað yrði félag sem væri í umsjá bankans sem ætti hlutabréfin og til að fjármagna kaupinn yrðu félaginu útveguð erlend lán, annars vegar frá Askar Capital og hins vegar frá einum viðskiptabankanna og öll bréfin lögð að veði. Að þrem árum liðnum myndi félagið endurgreiða lánið með þeim vöxtum sem tíðkast á markaði. Til að fjármagna endurgreiðslu lánanna gæti ég t.d. selt bréfin og vonandi hagnast ef þau yrðu meira virði en lánin. Til að stofna félagið þyrfti ég að reiða fram 500 þúsund krónur. Það er skemmst frá því að segja að ég tók boðinu.
Í júlí síðastliðnum fór forsætisráðherra fram á það við mig að ég yrði sérstakur tímabundinn efnahagsráðgjafi hans og varð ég við þeirri beiðni. Þegar ljóst varð að ég myndi skipta um starfsvettvang tók ég þá ákvörðun að selja félagið sem stofnað var um hlutabréfin aftur til baka. Með því væri ég hafin yfir þá augljósu gagnrýni að í störfum mínum fyrir forsætisráðherra myndu möguleg fjárhagsleg hagsmunatengsl flækjast fyrir mér. Auk þess sem ég var að hverfa frá Askar Capital einu og hálfu ári áður en réttur minn til að eignast bréfin var liðinn. Lýsti ég í framhaldinu yfir opinberlega að ég hefði ekki lengur fjárhagslega hagsmuni af fyrrum tengslum mínum við Askar Capital. Söluverðið félagsins var 500 þúsund krónur og tapaði ég því hvorki né hagnaðist á þessum viðskiptum né var greiddur til mín arður af bréfunum. Þess má geta að bankinn er einkahlutafélag og hefur aldrei verið á hlutabréfamarkaði.
Ég hef nú gert nær fulla grein fyrir fjárhagslegum tengslum mínum við atvinnulífið. Ég segi nær fulla grein vegna þess að með konu minni á ég 116 hluti í fyrirtækinu DeCode Genetics og er virði þeirra innan við 10 þúsund krónur í dag.
Ég vona að með þessari færslu hafi ég gert hreint fyrir mínum dyrum hvað varðar fjárhagsleg tengsl við atvinnulífið og skora um leið á aðra stjórnmálamenn að gera slík hið sama.
Tryggvi Þór Herbertsson
Ummæli (17)
Haraldur Guðnason // 9.3 2009 kl. 11:46
Það er athyglisvert að lesa að þú tókst skipun þína sem sérstaks efnahagsráðgjafa ríkisstjórnarinnar svo alvarlega að þú ákvaðst að hefja þig yfir allan grun um fjárhagsleg hagsmunatengsl. Það er gott mál og gott fordæmi. Hinsvegar vekur það óneitanlega athygli okkar að þú tókst samt sem áður ekki skipun þína sem sérstaks efnahagsráðgjafa ríkisstjórnarinnar nægilega alvarlega til að telja það „í þínum verkahring“ að greina forsætisráðherra frá tilboði breska fjármálaeftirlitsins um að færa Icesave inn í breska lögsögu? Okkur þætti vænt um að fá ítarlegri sundurliðun á því dæmi öllu.
Friðrik Þór Guðmundsson // 9.3 2009 kl. 11:55
Tryggvi Þór; það er öskrað á þig að útskýra hvers vegna þú sagðir Geir og félögum ekki frá „tilboði“ að því er virðist Breska FSA að taka Icesave inn í Breska lögsögu gegn 200 milljón punda innspýtingu ytra, sem Bjöggarnir gátu að því er virðist bara fengið hjá þrautavaralánveitandanum Landsbakanum.
Hér er auðvitað gengið út frá því að frásögn Björgólfs Thors um þetta sé rétt og að Hector Sants hafi verið „ræstur út á sunnudegi“ til að bíða við símann.
Við erum að tala um hundruða milljarða hagsmunamál fyrir þjóðina. Þú verður að upplýsa málið eins og þú veist best. Plís!
Friðrik Þór Guðmundsson // 9.3 2009 kl. 18:04
200 milljón pund voru um 44 milljarðar þá dagana en reiknast liðlega 30 milljarðar núna. Áætlaðar yfirtökur vegna Icesave eru um 600 milljarðar. Þarna liggur geypilegur munur. Spruningunni hvort við hefðum getað sloppið svona miklu betur verður að svara. En hluti af svarinu er auðvitað að Davíð og Geir sögðu: Nei, við borgum ekki erlendar skuldir óreiðumanna (ætluðu að borga 0).
Hefur tryggvi Þór hugsað sér að koma hingað og taka þátt í umræðunni? Eða vill hann gleyma þessu og „horfa til framtíðar“? Framtíðar sem notabene innifelur að borga ofangreindan okur-reikning.
Guðmundur Gunnarsson // 9.3 2009 kl. 19:39
Tjaaa…. var svona að spögúlera í hvort það er kannski á döfini að losa sig við bréfin í DeCode..???
(o:
Stjáni B. // 9.3 2009 kl. 22:02
Uh – Eitthvað er ekki eins og það á að vera í henni Danmörku.
Það liggja fyrir skriflegar staðfestingar (Kastljós), annars vegar frá FSA (fjármálaeftirlitinu hinu Breska) og hins vegar fjármálaráðuneyti Breta (Treasury) um að engin gögn finnist á þeim bæjum um samkomulag eða samning varðandi flutning IceSave-reikninga innundir innistæðuábyrgðarkerfi Breta, hvað þá flýtimeðferð gegn einhverri smáaurayfirfærslu frá Íslandi.
Er orðum einhverra fyrrum Landsbankamanna betur treystandi en skriflegum svörum Breskra yfirvalda?
Hvað gengur „Gunnu Stöng“ til?
Barði Barðason // 10.3 2009 kl. 11:34
Þannig að þú hafðir séns á að hagnast um hundruðir milljóna, áhættulaust fyrir þig.
Þér finnst það væntanlega allt í lagi ekki mér enda ekki kominn nógu langt í hagfræðinni til að sjá hvernig svona viðskiptahættir geta talist góðir, sanngjarnir og til þess fallnir að stuðla að heilbrigðu viðskiptalífi á Íslandi.
Guðmundur Gunnarsson // 10.3 2009 kl. 13:16
Menn eru ansi harðorðir og fullyrðingaglaðir, sem er sennilega ekki vænlegt til að fá Tryggva til að skýra sína hlið mála.
Ef hann gerir það ekki, er erfitt að sjá annað út úr þessu annars virðingarverða framtaki að leggja spilin á borðið, en afar mislukkað lýðskrum.
Friðrik Þór Guðmundsson // 10.3 2009 kl. 16:11
Ég get skilið að Tryggvi Þór vilji ekki virða viðlits blammeringar nafnlausra strigakjafta. Jafn brýnt finnst mér þó að hann svari málefnalegum spurningum nafngreindra fyrirspyrjenda.
H.T. Bjarnason // 10.3 2009 kl. 19:27
Merkilegt hvað fólk er fljótt að dæma. Tökum Svein E. Hansson sem dæmi. Að hvaða leyti er þetta kattarþvottur hjá Tryggva? Og þó svo að Tryggvi hafi eitt sinn sagt að pólitík höfðaði ekki til sín, rýrir það gildi þessara upplýsinga sem Tryggvi er að leggja fram? Auk þess má spyrja hvaða leyfi hefur Sveinn að kalla Tryggva „sukkara“? Þessi ummæli eru hreint ekki boðleg.
Guðmundur Gunnarsson // 10.3 2009 kl. 22:06
Hann fær altént prik fyrir að leggja spilin á borðið.
Eitthvað sem margir aðrir virðast ekki treysta sér til að gera.
Hef meiri áhyggjur af slíkum.
Sveinn Elías Hansson // 11.3 2009 kl. 22:42
Prikin fær hann fyrir ritskoðun.
Jóhann E // 12.3 2009 kl. 00:26
Ég skal kaupa af þér hlutabréfin í DeCode. Þau eiga eftir að margfaldast.
Baldur // 15.3 2009 kl. 13:39
Ég tek eftir því að Tryggvi er duglegri við að ritskoða athugasemdir hérna en svar spurningum. Það er nú ekki góð leið fyrir mann sem ætlar sér í stjórnmál.
sveinn h // 17.3 2009 kl. 22:28
Tryggvi ég hafði nú ekki mikið álit á þér til að byrja með, en þessi hugmind sem þú setur fram er kanski það eina rétta. Það mætti jafnvel hækka þessa tölu upp í 25-30% Því mörg hver af þessum heimilum eru mjög grátt leikin, þetta eru aðgerðir sem þarf að framkvæma strax, það er ekki hægt að segja við fólk sem er í bráðum vanda að það verði að bíða í 1-2 ár eftir lausnum. Þessi flokkur sem þú bendlar þig við má fara í alsherjar hundahreinsun, þar þarf að skifta öllu út sem hægt er að skifta út. Ég stend með þér hvað varðar þessa hugmind, sama hvaðan gott kemur.
Barb Bockskopf // 8.11 2010 kl. 10:45
Interesting reading. Great post, keep up all the work.
dryer vent hose // 17.11 2010 kl. 03:33
The chicken is never declared in the court of hawks. Cape Coast Ghana
Mariana Mccargo // 17.11 2010 kl. 20:18
Well, this was kind of boring but whatever.
Rita ummæli