Í tilefni þess að í dag kom út greinagerð Landlæknis koma út um detox starfsemi Jónínu Ben ætla ég að útskýra nokkur atriði sem hafa komið við sögu í þessu máli undanfarið og snúa að lyfjameðferð.
Á dögunum (laugard.5. júní) kom frétt í Mbl þar sem haft var eftir Jónínu Ben að hún hefði sparað ríkinu og almenningi hundruði milljóna króna með því að losa skjólstæðinga sína í detox meðferðinni við lyf. Hún kallaði lyfin „lífstílslyf“ og var það ekki frekar útskýrt.
Sé þetta rétt hefur hún í stórum stíl ráðlagt fólki að hætta á lyfjameðferð sinni. Mörg lyf kost um 4 þúsund krónur (heildarverð) fyrir 90-100 daga skammt þannig að árskostnaður yrði um 16 þúsund. (Dæmi blóðþrýstingslyf, magalyf, kólesteróllækkandi lyf og fleiri). Veltum eftirfarandi fyrir okkur: ef að fólk sem er á lyfjum og sækir til Jónínu Ben er flest eldra fólk á um 3 lyfjum og því yrði kostnaður þess 3 x 16 þúsund eða 48 þúsund á ári. Rúnum það í 50 þúsund krónur. Til að ná hundrað milljóna króna sparnaði þyrfti Jónína því að ná 2000 manns af þremur lyfjum í heilt ár. Námskeiðið hennar er bara 2 vikur og stundum bara ein helgi. Enginn starfandi læknir er hjá henni og hún hefur ekki reglubundið eftirlit með fólkinu og lyfjameðferð þess eftir námskeiðið. Hún veit því ekki nema af afspurn fárra hvað lyfjameðferð þátttakendanna líður eftir að þeir hætta hjá henni. Til þess að spara hundrað milljónir með því að sleppa lyfjatöku í 2 vikur á þremur lyfjum yrði hún að ná til (100.000.000/(2v/52v * 50.000 kr) 52 þúsund einstaklinga á ári. Þar sem ekki er líklegt að þeir allir myndu hætta á svo mörgum lyfum er talan mun hærri.
Þessi einfaldi útreikningur sýnir að þessi djarfa fullyrðing Jónínu Ben um sparnað af völdum þessa heldur ekki vatni. Matthías Halldórsson aðstoðarlandlæknir sagði í kjölfarið að engar opinberar skýrslur um lyfjakostnað bentu til sannleiksgildi þessarar fullyrðingar Jónínu Ben.
Hvenær getur fólk hætt á lyfjum?
Það er ekki oft sem fólki er óhætt að hætta á lyfjum sem það er sett á til langframa. Lítum á lista yfir algengustu lyfin:
- Blóðþrýstingslækkandi lyf
- Blóðfitulækkandi lyf
- Magabólgulyf (sýruhemlar)
- Skjaldkirtilslyf
- Sykursýkislyf
- Verkjalyf – bólgueyðandi lyf
- Hjartsláttaróreglu- eða hjartabilunarlyf
- Kvenhormónalyf
- Lungnalyf – asthmi og langvinnir lungnasjúkdómar
- Þunglyndis- og kvíðalyf (oftast seretonin virk lyf)
- Blóðþynningarlyf (Kóvar, magnyl o.fl.)
Eftir margra mánaða megrun, hollt mataræði og virka þolþjálfun kemst hluti þeirra sem hefja átak í tilætlaða þyngd eða megra sig um t.d. 10 - 15 kg. Við þessa breytingu er möguleiki á því að:
- Hægt sé að minnka skammt blóðþrýstingslyfja eða hætta lyfjagjöf hjá minnihluta fólks. Hækkaður blóðþrýstingur er oftast erfðatengdur eða háður óbreytanlegum þáttum þannig að lífsstílsbreytingar ná ekki nærri alltaf að losa fólk við BÞ-lyf.
- Hætta töku blóðfitulækkandi lyfja í sumum tilvikum. Aftur er það erfðatilhneiging sem ræður miklu og mataræðisbreyting og megrun nær oft ekki að lækka kólesteról nema um 10-20%.
- Hætta töku magabólgulyfja í sumum tilvikum þar sem megrun hefur losað um bakflæðissjúkdóm.
- Minnka töku sykursýkislyfja og verkjalyfja.
- Minnka eða hætta töku þunglyndislyfja ef að meðferðin hefur létt á fólki hugarfarslega.
það er mikið af fyrirvörum í þessu og aðeins þeir sem ná viðvarandi árangri ná að losna við lyf eða minnka skammta þeirra. Árangurinn þarf að haldast og hann grundvallast ekki á 2 vikna námskeiði. Með langvarandi átaki er hægt að ná heilsufarslegum árangri og minnka lyfjaskammta. Það er mjög ánægjulegt þegar fólk nær slíkum árangri því að þannig nást heilsufarsbætandi áhrif sem ná út fyrir þau vandamál sem lyfin eru tekin við. T.d. ef að manneskju með væga sykursýki og háþrýsting nær að losna við tvö lyf eftir 15 kg megrun, eru líkur á því að hún hafi minnkað einnig hættu sína á krabbameinum og slitgigt og jafnvel losnað við vélindisbakflæði sýru úr maganum.
Nær-sveltiaðferð Detox
Eftir tvær vikur á nær-svelti fæði (500 kkal á dag) lækkar blóðsykur og stundum blóðþrýstingur og því skapast sú tálsýn að hægt sé að losna við sykursýkislyf og blóðþrýstingslyf á þeim tímapunkti. Vissulega er þeirra e.t.v. ekki þörf eftir nær-sveltið en þörfin kemur um leið og byrjað er að borða eðlilega. Enginn heldur áfram á 500 kkal fæði nema þá til þess að fremja hægfara sjálfsmorð.
Orsakir þess að fólk nær ekki að minnka skammta eða hætta á lyfjum
Því miður tekst fáum að bæta heilsufar sitt það mikið að notkun lyfja vegna fyrrgreindra vandamála verði ónauðsynleg. Stundum má kenna um slæmum erfðum, stundum aldri, stundum skorti á sjálfsaga til að taka á mataræði og hreyfingu, stundum erfiðum aðstæðum eða fjárhagserfiðleikum, stundum félagslegri einangrun, eða stundum blöndu af mörgum þáttum. Kerfi líkamans bila með aldrinum og sama þó að maður geri allt rétt verða lyf við t.d. háum blóðþrýstingi, kólesteróli, sykursýki og verkjum, oft óumflýjanleg ef að nýta á þá möguleika sem eru sannreyndir til að hægja á hrörnun æðakerfisins, lifa lengur og láta sér líða betur. Hvað sem líður allri heilsurækt eða mataræðisbreytingum, þá skapast sjaldnast þau skilyrði hjá fólki yfir sextugt að hægt sé að hætta lyfjameðferð sem beinist að áhættuþáttum eða langvinnum sjúkdómum (t.d. skjaldkirtilsvandamál).
Lyf bæta oft upp afstillingu og hrörnun líffærakerfa og efnaskipta
Lyf sem beinast að lækkun blóðþrýstings, kólesteróls, þríglýseríða eða blóðsykurs hafa reynst hafa afar mikilvægu hlutverki að gegna og með langvarandi notkun þeirra verður gagn þeirra fyrir þann sem þau taka meira með hverju árinu. Þessi lyf gegna forvarnarhlutverki og þar gildir að ráð er ekki ráð nema í tíma sé tekið. Þetta er búið að sannreyna með stórum meðferðarrannsóknum. Þegar búið er að finna það út með skoðun og rannsóknum læknis að manneskja hafi gagn af notkun þeirra þarf það að skoðast vel af lækni hvort að jákvæð breyting síðar meir á mældum gildum t.d. blóðþrýstings, sé komin til að vera án lyfsins eða falli í sama farið aftur við stöðvun á töku þess. Margir þættir geta haft áhrif og það er eingöngu á færi læknis að meta þá fyllilega.
Afleiðingar vannýttra möguleika
Ef að manneskja hættir á forvarnarlyfi of fljótt og vegna misskilnings, (eða byrjaði ekki að taka lyfið vegna lyfjaandúðar) fær hún ekki að njóta ávaxtanna af því að vera á lyfinu og missir af tækifæri til að lækka heilsufarsáhættu sína. Ég hef séð fólk örkumlast eða deyja um aldur fram þar sem klárlega var hægt að grípa inn í tímanlega með því að fylgja ráðum lækna eða hjúkrunarfólks.
Framtíðin
Íslendingar þurfa heilnæma valkosti innan og utan viðheilbrigðiskerfið en kukl eins og detox er ekki gæfuleg leið. Þörf er á fleiri stöðum en NLFÍ og Reykjalundi utan við höfuðborgina til að hafa prógrömm í heilsufarsátökum og endurhæfingu. Þau þurfa að vera fagleg og starfa af miklum heilindum og vísindalegum metnaði. Það er um að gera slíka staði skemmtilega og iðandi af menningarlífi í leiðinni. Í uppbyggingunni þurfum við líka að verjast afvegaleiðandi hugmyndum og blekkingum. Kenna þarf rökfræði og siðfræði mun meira til að gefa fólki þau tól og tæki sem þarf til að verja sig ágangi kuklara sem spila inn á þarfir, neyð, óskhyggju og tilfinningaástand fólks. Baráttan gegn þessu er rétt að byrja. Ef við ætlum að forða þekkingarlegu “hruni“ í heilsugeiranum og útþynningu dýrmæts rekstrarfjármagns í heilbrigðiskerfinu, þurfum við að láta í okkur heyra með að gervivísindi og kukl eru ekki saklaust meðlæti heldur meinvarp á þjóðfélaginu.
—–
Viðtal við mig á Pressunni í gær um þessi mál.
Kristinn Theodórsson hefur skrifað fína blogggrein um þau orð sem Jónína Ben hefur látið falla um gagnrýni á starfsemi hennar.
Hér er hlekkur á formlega kvörtun mína og þriggja annarra til Landlæknis vegna „detox-læknismeðferð“ Jónínu Ben: Bref_til_landlaeknis-kvortun_v-detox
Vitnað í skýrslu okkar fjórmenninga, (Íris Erlingsdóttir fjölmiðlafræðingur, Bjarni Árnason læknir, Júlía Linda Ómarsdóttir hjúkrunarfræðingur auk mín) á Pressunni, varðandi mögulega fylgikvilla ristilskolunar í höndum ófaglærðs fólks.
Góð grein Sigurðar Hólm á skoðun.is þar sem hann sýnir okkur að fyrir 60 árum voru ristilskolanir taldar kukl. Hvað höfum við lært síðan?
Hér er fyrsta gagnrýnisgrein mín á detoxið: „Hvers vegna ekki detox!“
Önnur grein mín í ágúst í fyrra hét „Hvað er kukl?“
Svanur Sigurbjörnsson
Ég las báðar greinarnar þínar um detox-bullið á sínum tíma, og er sammála öllu sem þú segir félagi. Það er ábyrgðarhluti að halda því fram blákalt að 2ja vikna stólpípu og sveltikúr í Póllandi geti losað fólk við lífsnauðsynleg lyf og jafnvel lækni mein þeirra.
Takk fyrir góðan pistil.
Mikið er gott að heyra rödd skynseminnar í þessu máli.
Hæst bylur í tómri tunnu og alltof oft fá kuklarar og loddarar að hrópa einir og mótbárulaust á torgum af því að þeir sem vita betur eru seinþreyttir til vandræða.
Þetta er fjárplógsstarfsemi sem auglýsir sig með stjórnlausum ýkjusögum og rakalausum fullyrðingum um galdraárangur. Starfsemina þarf ekki að banna held ég, en sporna við fáránlegum ýkjuáróðri, að ekki sé minnst á atvinnuróg gagnvart t.d. læknum.
Heyrðu góði, þú gleymir flogaveikilyfjum, sem eru eitthvert mesta eitur, sem þið læknar gefið okkur. Ég hef nefnilega horft á flogaveikt fólk, sem læknar þykjast vera að hjálpa með lyfjagjöf . En afleiðingar verða oft þær, að fólk hættir að geta notað þetta verðmætasta líffæri okkar heilann sjálfan, sem við vitum þó núna að er mikilvægt, til að halda honum í horfinu. Læknar héldu lengi fram að heilafrumurnar væru þær einu, sem ekki endurnýjuðust, sem er rangt…..En þær þurfa líka notkun, en ekki sljóvgun. Ég hef gengið fyrir flogalyfjum alla ævi, og þau hafa aldrei hjálpað mér. Nú er líka komið í ljós, að 30% flogaveikra svarar ekki lyfjum, það er eitthvað annað þarna uppi sem þarf að leiðretta…Það sem bjargaði mðer frá sljoleikanum er að ég er ofvirk. En þeir, sem eru það ekki, fara oft illa útúr flogalyfjum, sem líka mynda lyfjaþol, það er sannað. Og þá auka læknar endalaust lyfin, og á það er hreinega dapurlegt að horfa. Og svo er meira að segja ekkert vitað hvernig lyfin virka, þó að þeim sé í okkur ausið, þið þekkið bara 15% og varla það af heilanum, en eruð svo að gefa fólki alls kyns óþverra, sem á að gera gagn þarna uppi…..Það á vonandi eftir að koma í ljós á þessari 21. öld, hvað vitlaust hefur verið farið með heilann hingað til, og hana nú
Það er gott að sjá einhvern lækni nenna að benda á augljósar staðreyndir og hafðu þökk fyrir það Svanur.
Það er verra að sjá hvernig sumir á kommentakerfi Eyjunnar hins vegar bregðast við en þar er búið að spyrða þig við Samfylkinguna (og þar með Baug), tekið fram að þú sért „trúleysingi“ og látið í veðri vaka að annarlegar hvatir ráði þessarri gagnrýni hjá þér.
Að mínu mati er öll þessi gagnrýni hjá þér fullkomlega fagleg og löngu tímabær.
Það má hver sem er hvetja til holls mataræðis og hreyfingar. Þó mér þyki nú gróft að rukka fólk um 140.000 krónur fyrir að láta svelta sig. En læknar hafa nú líka bent á gildi þessara hluta alla tíð. Og þegar að læknar skrifa upp á þunglyndislyf og önnur lyf þá fylgja stífar leiðbeiningar með að þetta virki ekkert nema að þú breytir lífi þínu líka til dæmis með daglegum göngutúrum. (Allavega var mín reynsla þannig) Fólk bara á það til að heyra þann part ekki og hrifsa til sín lyfseðlana.
En það er margt að þarna hjá henni Jónínu. Fyrsta lagi er það þessi leynd sem er yfir öllu. Þau gjörsamlega neita að útskýra hvernig það sem þau gera eiga að virka og neita að afhenda upplýsingar um lækna og fleira. Afsökunin fyrir því sem ég heyrði frá Jónínu einhversstaða var víst sú að þau óttast launmorðingja frá lyfjafyrirtækjunum(no kidding).
Svo er bara ótrúlegt að leggjast svo lágt að segjast geta læknað sjúkdóma án þess að geta sýnt fram á það. Svo virðist sem að Jónína viti það vel enda forðast hún að halda því fram sjálf og lætur í stað nafnlausar „umsagnir“ sjá um loforðin fyrir sig. Og í síðunni mætti halda að Jónína gæti læknað ólæknandi sjúkdóma á borð við sykursýki og MS. Og það er bara siðlaust með öllu.
Ef þetta virkaði haldiði að læknar væru ekki að keppast um að framkvæma þetta? Það þýðir ekkert að halda einhverju fram með „lyfjafyrirtækin vondu“ þegar að það er nóg að hlutum sem að læknar framkvæma án lyfja. Fá þeir ekki meira að segja borgað þegar þeir framkvæma aðgerðir ólíkt því þegar þeir skrifa lyfseðla.
Takk fyrir Ragga, Helgi,Víðir og Jón Grétar. Raddir skynsemi, yfirvegunar og heiðarlegra raka í þessum málum sem öðrum þurfa að heyrast sem víðast.
Sæl Vigdís. Ég gleymdi ekki flogaveikilyfjun. Þetta er ekki tæmandi listi, heldur listi yfir þau helstu lyf sem fólk er á um langan tíma. Það er furðulegt hvernig þú talar um lyf sem þú hefur sjálf þurft að vera á og það er ákaflega mikill sleggjudómur að kalla þau lyf „eitur“ eins og þú gerir. Þú segist hafa „gengið fyrir flogaveikilyfjum alla ævi og þau haf[i] aldrei hjálpað [þér]„. Þú virðist ekki gera þér grein fyrir mótsögninni í orðum þínum. Það væri ákaflega óskynsamlegt að vera á slíkum lyfjum án þess að hafa af þeim gagn. Af hverju hættir þú þá ekki á lyfjunum? Vantar ekki eitthvað mikilvægt í frásögn þína?
Það er auðvitað vel þekkt að flogaveikilyf virka ekki á alla sem hafa flog og fólk sem að öllu jöfnu er laust við flog vegna lyfja sinna getur fengið köst eftir sem áður. Þar sem um er að ræða lyf sem verka á taugakerfið þá getur verið stutt á milli gagnlegra lyfhrifa og óæskilegra aukaverkana. Skömmtun flogaveikilyfja er því mun vandasamari en margra annarra lyfja og sumir flogaveikir verða að lifa við aukaverkanir sem setja mark sitt á líf þeirra, en eru samt mun skárri kostur en að fara sífellt í krampaflog. Því má ekki gleyma að flog geta valdið heilaskaða (súrefnisskortur) ef að þau halda of lengi áfram og valdið slysum á þeim flogaveika og jafnvel öðrum t.d. ef sá flogaveiki fær kast akandi bíl.
Ég var búin að skrifa helling 2 sinnum og gleymdi kæfuvörninni í bæði skiptin og missti allt
En frábær pistill Svanur og ég er þér algjörlega sammála.
Mér finnst að fólk mætti sýna læknum meira þakklæti svona almennt
Frábær grein hjá þér Svanur! Segir allt sem segja þarf.
Vil taka það fram að ég ÓSKA ÞESS INNILEGA að detox Jónínu Ben hafi þau áhrif sem hún heldur fram. Hver gæti verið á móti aðferð sem sannarlega bætir heilsu fólks? (Kannski „læknamafían“?
)
En óskir mínar eða annarra skipta ekki máli. Þetta er það sem detox-sinnar virðast ekki átta sig á. Það sem skiptir máli er að þær rannsóknir sem gerða hafa verið á ristilskolun benda EKKI til þess að sú aðferð hafi einhvern lækningamátt. Þar til aðrar rannsóknir sýna annað er að mínu mati siðlaust að halda fram að ristilskoðun lækni hitt og þetta. Í það minnsta mikið ábyrgðaleysi. Finnst Jónínu Ben og öðrum í alvörinni talað ekki ábyrgðaleysi gagnvart veiku fólki að selja því meðferð sem hefur verið vísindalega sannreynd?
Náfrænka mín var þarna í þrjár vikur og greiddi 300.000. kr.
Henni fannst óskaplega skemmtilegt að dvelja þarna.
Missti 4 kg á þessum þremur vikum og komu þau aftur
á fyrstu vikunni eftir heimkomu.
Þetta er bara vel markaðssett fjárplógsstarfssemi.
Hvað er „Náfrænka“ ?
Er það látin kvenkyns-ættingi ??
Vonandi hefur detox meðferðin ekki drepið neinar frænkur…ennþá.
Svanur.
Þú ert ekki hlutlaus í umræðunni þar sem þú ert sérfræðingur í lyflækningum og Jónína og hennar fólk gagnrýnir lyfjanotkun nútímans. Hún er sem sagt að gagnrýna þig og þína menntun og allt sem þú stendur fyrir. Ekki nema von að þú sért óánægður með það.
Ég efast stórlega um að Jónína sé að segja fólki að hætta að taka lyfin sín. Hún er að boða það að forvarnir séu mikilvægar heilsunni. Að fólk eigi ekki bara að lifa eins og vitleysingar og svo fá lyf eftir á. En ef fólk er orðið heilsulítið og þarf lyf á það auðvitað að taka þau samkvæmt læknisráði.
500 kaloríur er allt of lítið til að lifa af og Jónína er ekki að boða slíkt sem lífsstíl til lengdar. Fólk fastar í nokkra daga undir eftirliti næringarfræðinga. Það fær vatn og salat og ávexti. Vonandi er fólk nú skynsamt og fastar ekki nema í samráði við lækninn sinn. En eins og þú veist hefur fólk fastað í hinum ýmsu menningarsamfélögum í þúsundir ára án skaða. En fasta er ekki fyrir alla, alls ekki. Krabbameinslæknir móður minnar sagði nú samt að það væru til rannsóknir sem sýna fram á að hófleg fasta öðru hvoru hafi góð áhrif á frumuskiptingu líkamans.
Ég þekki Jónínu ekki neitt og hef ekki stundað detox og hef ekki lyst á að fá mér stólpípu en mér finnst þú ekki vera að stunda rökræður til að sýna fram á að þú hafir rétt fyrir þér. Þú ýkir. Og þú vilt ekkert ræða málin. Þú þarft ekkert að ræða málin þar sem þú hefur alltaf rétt fyrir þér.
Ef þú ert að fara með rétt mál þegar þú segir að Jónína segist lækna fólk á tveimur vikum og að hún hvetji fólk til að hætta á lyfjum og annað þessu líkt er það auðvitað ekki gott mál. Ég er ekki að styðja slíkt.
Takk Margrét og Siggi.
Já þessi kæfivörn er ferleg. Ég hef margsinnis misst út svör sem ég hef góðan tíma í að semja.
Sæll Viggó.
Öll dæmi eru athyglisverð (og rannsóknir styðja að raunin er oftast sú sem þú lýsir að hafi gerst með náfrænku þína), en sýna ekki fram á neitt. Þess vegna á maður almennt að taka þeim með fyrirvara, hvort sem að þau styðja það sem maður heldur eða ekki, um einhverja ákveðna meðferð. Takk annars fyrir innleggið.
Sæl Heiðrún
Þó að ég sé menntaður í lyflækningum reyni ég alltaf að koma við lyflausum forvörnum og tek ekki lyf fram yfir t.d. líkamsrækt nema að slíkt sé eina eða skásta lausnin á tilteknum heilsufarsvanda. Markmið lækna er að finna bestu lausnirnar fyrir fólk og gildir einu fyrir þá hvort að lausnin er t.d. líkamsrækt eða lyf, hvorugt eða bæði, svo lengi sem það besta er útkoman. Ég hef engan fjárhagslegan hagnað af því að ávísa fólki lyfjum. Laun mín eru föst laun, ekki eftir fjölda lyfseðla.
Hvað veist þú um það hvort að fólk hafi ekki skaðast af föstum sem eru 2 vikur eða lengri? Þó að fólk hafi í margar aldir lifað slíkt af, er það ekki það sama og „skaðast ekki“. Það er því ekkert „eins og þú veist“ í því. Það er vel stutt vísindalega í dag að 500 kkal fæði lengur en 2-3 daga veldur ketósu í líkamanum og niðurbroti vöðva, sem eru mjög dýrmætir til þess að viðhalda orkunotkun líkamans. Eftir 2 vikur á 500 kkal fæði stendur manneskjan því verr að vígi við að viðhalda þyngd sinni en áður. Þetta er vel staðfest og þú getur lesið um afleiðingar nær sveltis (undir 1000 kkal á dag) í hvaða textabók í næringarfræði og klínískri lífefnafræði sem er.
Af hverju segirðu að ég stundi ekki rökræður? Ertu búin að skoða þann langa hala rökræðna sem fylgja fyrri greinum mínum um detox? Er ekki greinin hér að ofan einmitt líka dæmi um innlegg í rökræðurnar? Þetta er tómt bull í þér. Hvar er ég að ýkja? Nefndu rökstutt dæmi því til stuðnings!
Aðspurð hefur Jónína Ben sagt að hún taki ekki fólk af lyfjum en svo segir hún hina stundina að hún hafi sparað ríkinu hundruði milljóna með því að losa fólk við „lífstílslyf“. Fólkið fer ekki af lyfjum án ráðlegginga eða hvatninga þar um þannig að hún er að stuðla að því að fólk fari af lyfjum, hvort sem að hún svo neiti því í viðtölum eða ekki. Dæmin sýna líka fram á það, bæði þau sem hún státar af sjálf sem jákvæðum vitnisburðum á detox.is og svo þau tilvik þar sem fólk hefur þurft að fara á BMT Lsh vegna vandamála í kjölfar þess að hætta á lyfjum í detox prógrammi Jónínu. Hún getur ekki bæði sleppt og haldið í þessum efnum, þó að hún reyni það.
Takk fyrir góðan pistil Svanur
Gleymist ekki stórt atriði hérna en það er hvað mikið sparast á því að setja fólk á þessi lyf. Það er svo margfallt dýrara að meðhöndla sjúkdóminn sjálfan miðið við það að fyrirbyggja hann. Þannig að það er ekki 16 þúsund á ári sem er fleygt út í loftið við að segja fólk á lyf, heldur mjög góð fjárfesting.
Bjarki
Kærar þakkir fyrir þennan vandaða pistil. Mér ofbýður umræðan á Moggablogginu þar sem keppst er við að hefja málflutning Jónínu upp til skýjanna og láta í það skína að hér sé ráðist gegn manneskju sem stundi „óhefðbundnar lækningar“ og spari ríkinu stórfé með því að taka fólk af lyfjum án þess að rökstyðja það að einhverju leyti.
Mér er málið skylt, roskin kona sem mér þykir afar vænt um, fór í Detox hjá Jónínu, var tekin af nauðsynlegum lyfjum, sett í svelti og hefur átt við mikil veikindi að stríða eftir það. Ég veit um fleiri sem segja farir sínar ekki sléttar en þora ekki að mæla gegn Jónínu.
Jónína hefur ekki fært sannaleg rök fyrir því að þessi meðferð hennar sé gagnleg. Mér finnst meðferðin mæla gegn heilbrigðri skynsemi og vona að framvegis verði fullt eftirlit með starfseminni.
Ég hef oft hugsað hvað rekur fólk í jafn háskalega meðferð þegar hægt er að fá bót meina sinna með breyttum lífsstíl, hreyfingu og hollu mataræði.
Gangi þér sem best í þessu máli, Svanur.
Sæll Bjarki
Jú mikið rétt hjá þér. Það gleymist að nefna það að með því að nota lyf við áhættuþáttum hjarta- og æðasjúkdóma og ýmsu öðru fyrirbyggjanlegu sparast miklar fjárhæðir því að hjúkrun og/eða endurhæfing fólks sem fær heilablóðfall eða hjartaáfall kostar mikið fé og það vinnutap sem slíkt veldur er einnig verulegt. Þá á eftir að nefna þjáningarnar og minnkuðu lífsgæðin sem aldrei verða metin til fjár. Í raun er það þannig að þessi lyf eru vannýtt því að mikið af fólki, sérstaklega karlmönnum eldri en 40, fara ekki til læknis til að láta meta áhættu sína (blóðþrýstingsmæling, blóðfitur, þyngd, blóðsykur og þrek). Takk fyrir að minna á þetta Bjarki.
Takk María
Já mig grunar að það séu talsvert fleiri en hin roskna vinkona þín og það fólk sem hefur þurft að leita á BMT Lsh sem segi farir sínar ekki sléttar eftir vistina í detox Jónínu Ben. Þetta nær-svelti getur farið mjög illa með gamalt fólk sem er orðið frekar veikburða því að það má ekki við því að missa neitt af vöðvum. Þá getur ketosan sem fylgir svona kúr (eftir 3 daga á honum) farið illa í heilan og sumt fólk átt við einbeitingarerfiðleika og slen að stríða eftir þannig ástand. Svo er þetta bara skemmd á þekkingu og slæmt fordæmi, en gefið undir því falska flaggi að um viðurkennd fræði sé að ræða. Slíkt svíður hvern þann sem veit betur og er annt um að lygar og blekkingar fái ekki að tröllríða þjóðfélaginu.
Bestu þakkir fyrir góðar óskir – kær kveðja Svanur
Heiðrún sagði: „Fólk fastar í nokkra daga undir eftirliti næringarfræðinga. “
Það er ekki að sjá á vefsíðu hennar að neinn faglærður næringarfræðingur starfi í detox-inu. Enda er ólíklegt að menntaðir næringarfræðingar (lágmark 5 ára menntun) mæli með svona einhæfu og hitaeiningasnauðu mataræði.
Ertu nokkuð að rugla saman grasalækni og næringarfræðingi. Því það er tvennt ólíkt.
Um ristilskolanir og geðsjúka gagnrýnendur:
http://skodun.is/2010/06/14/um-ristilskolanir-og-gedsjuka-gagnrynendur/
Já það er rétt athugað hjá Óttari. Hvaða næringarfræðing ertu að tala um Heiðrún, sem eigi að sjá um nær-sveltikúr Jónínu Ben. Það myndi enginn klínískur næringarfræðingur setja nafn sitt undir slíkt.
Takk Siggi fyrir góða grein.
Kveðja – Svanur
Èg rakst eitt sinn inn ì eròtìska bùd ì Hamborg. Thar voru til sölu kynlìfsmyndbönd med fòlki, sem var ad laxera og virdist fòlk geta ordid hàd thvì. Thad gefur vìst eitthvad kynferdislegt kikk, svipad og endatharmsmök. Kannski fer fòlk aftur og aftur ì ristilskolun, af thvì ad thad losar um endorfìn og dòpamìn ì heilanum. Annars finnst mèr allt ì lagi, ad làta Jònìnu ì fridi med thetta. Thad er enginn thvingadur til ad fara ì thetta og gott ad fòlk hafi val.
Sæll Robbi
Þú hefur sem sagt útskýringu þarna á því hvers vegna fólk leitar í ristilskolun. Endorphin losun. Kannski getur Ásdís Rán varpað ljósi á þetta, en hún mælir eindregið með detoxinu á Pressunni í dag.
Annars finnst þér að Jónína Ben eigi að vera látin í frið með þetta. Finnst þér sem sagt í lagi að ljúga til um titla, fræðilegan bakgrunn og lækningar til þess að fá fólk í nær-sveltikúra og ristilskolanir? Bara af því að fólk hafi frjálst val um það? Hvað með gjaldeyrislánin sem fólk tók á þeirri upplognu forsendu að íslenskt efnahagslíf væri í miklum blóma? Á þá að leyfa lygar í lánastarfsemi því að fólk ráði því sjálft hvort að það taki lán?
Lastu nokkuð gagnrýnina annars?
Sæll kollegi,
Flott framtak hjá þér! Styð þig svo hjartanlega í þessari baráttu sem þú stendur í þessa dagana.
Mér finnst sorglegt að sjá hvað Jónína fær að komast upp með mikið af staðhæfingum og alhæfingum án nokkurra sannanna eða heimilda. Það er nákvæmlega slík starfsemi sem á að kallast kukl þar til annað sannast. Þetta er business og verið að leika sér með líf fólks sem veit ekki betur.
Hugsaðu þér ef lyfjafyrirtæki fengju að valsa um með slíkar staðhæfingar á borð við hennar Jónínu án nokkurra sannanna. Hvar væru læknavísindin í dag þá? Lyfjafyrirtæki sem vilja koma lyfi/meðferð á markað þarf að eyða fjölda ára í rannsóknir á viðkomandi meðferð áður en hún HUGSANLEGA getur komið á markað. Þetta er allt gert til að gæta fyllsta öryggis og með sjúklinga í huga, svo ekki sé verið að bjóða upp á e-h húmbúkk!
En svo virðist vera að strax og einhverjir aðilar sem bjóða upp á óhefðbundnar meðferðir/lækningar að þá hverfa skyndilega allar þessar kröfur fólks til sannanna af borðinu. Mér finnst algjörlega lágmarks krafa fyrir hönd sjúklinga að þessi fyrirtæki eins og detox uppfylli sömu skilyrði um öryggi og virkni eins og lyfjafyrirtækin þurfa að gera. Sjúklingar eiga rétt á því þ.s líf þeirra er í húfi.
Segi bara bara eins og e-h spekingurinn sagði:
„Be open minded but not so open minded that your brain falls out“
Sæll Dagur
Takk fyrir góð orð og stuðning.
Ég tek undir það sem þú segir. Því miður er mikil fáfræði í þjóðfélaginu um það hvernig þekkingu er aflað og hvernig eigi að nota hana. Þá er sorglegt að sjá hversu margir geta ekki höndlað einfalda rökræðu og láta blekkjast af útúrsnúningum. Á hinn bóginn er það ánægjulegt að sjá hversu margir eru að taka við sér og koma fram með fínar athugasemdir við bullið og eru greinilega að þroska með sér góða hæfni í rökræðum og andsvörum.
Baráttan heldur áfram.
Bestu kveðjur
Svanur