Réttur til atvinnu og tækifæri allra til að sjá sér farborða er eitt af grundvallaratriðum jafnaðarstefnunnar. Aðgerðaáætlun stýrihóps ríkisstjórnar Samfylkingar og VG til að sporna við atvinnuleysi er því aðeins byrjunin á þeim aðgerðum sem ráðast þarf í til að koma í veg fyrir að atvinnuleysisbölið sé komið til að vera til lengri tíma. Þar er gert ráð fyrir mikilvægum verkefnum í byggingariðnaði, framkvæmdum við snjóflóðavarnir, gróðursetningarverkefnum, orkuviðhaldi og orkusparnaði auk veigamikilla verkefna sem líkleg eru til að skapa hér enn fleiri störf og vinna gegn brottflutningi yngra fólks. Þar má nefna hækkun endurgreiðslna vegna kvikmyndagerðar hér á landi, þróunarverkefni í ferðaþjónustu, frumkvöðlasetur í Reykjavík, sérfræðinga af atvinnuleysisskrá til nýsköpunarfyrirtækja og bætta samkeppnisstöðu sprota- og nýsköpunarfyrirtækja.
Eitt stærsta atvinnuverkefnið sem við blasir er að vinna þjóðina út úr þeirri alvarlegu gjaldeyris- og fjármálakreppu sem hrun bankakerfisins hafði í för með sér. Endurheimt traust umheimsins á peningamálastjórn landsins og efnahagslífi skiptir sköpum við að vinna á gjaldeyriskreppunni sem nú er haldið í skefjum með gjaldeyrishöftum. Endurreisn fjármálakerfisins og lausn gjaldeyriskreppunnar er forsenda þess að við getum tekist á við afleiðingar fjármálakreppunnar með örvandi aðgerðum til stuðnings fyrirtækjum landsins. Trúverðug framtíðarlausn í peningamálum sem stuðlað getur að stöðugleika og auknu trausti á efnahagslífi þjóðarinnar er því afar mikilvæg í þessu samhengi. Umsókn um aðild að ESB og upptöku evru er því ekki aðeins framtíðarlausn í efnahags- og atvinnumálum heldur getur yfirlýsing um slíkt haft talsverð áhrif til skemmri tíma og unnið með okkur í baráttunni við atvinnuleysið.
Markvissar áherslur Samfylkingarinnar á efnahagsaðgerðir til lausnar kreppunni og stöðugleika framtíðar, samhliða menntun, stuðningi og hagstæðum starfsskilyrðum sprota- og nýsköpunarfyrirtækja stafa af nauðsyn. Andspænis atvinnuleysinu sem fylgir hinni alþjóðlegu fjármálakreppu duga engar töfralausnir. Ráðast verður að rótum bráðavandans um leið og grunnur er lagður að atvinnusköpun framtíðarinnar.
Steinunn Valdís Óskarsdóttir
Ummæli (5)
Nýi Dexter // 12.3 2009 kl. 09:36
Nú syrtir í álið.
Ragnar // 12.3 2009 kl. 10:03
4.000 störf? Afhverju setjið þið ekki bara 10.000 manns í gróðursetningu og rest á listamannalaun? Málið dautt.
Ekkert mál að búa til störf
Héðinn Björnsson // 12.3 2009 kl. 10:20
Ef á að fara eftir áætlun AGS um að minnka fjárlagahallan úr 170 milljörðum í 80 milljarða fyrir 2010 á sama tíma og óeðlilegt er að búast við auknum skatttekjum þarf að skera verulega niður í ríkisútgjöldum eða sem svarar 25 þúsund störfum. Er þessi atvinnufjölgun bara til að kasta ryki í augu almennings fyrir kosningar til þess að reka svo fjórða hvern ríkisstarfsmann eftir kosningar? Eða á kannski ekkert að fara eftir þessarri AGS-áætlun? Hvenær ætlið þið að fara að ræða stóru málin og hætta að ræða um aukaatriði?
Á að skera niður í ríkisútgjöldum um ca. 100 milljarða fyrir 2010 og þá hvernig?
Guðmundur M. // 13.3 2009 kl. 22:33
Fyrir utan hvað þetta er nú kjánaleg hugmynd að „búa“ til störf með því að sólunda fé almennings þá er eitt í þessu sem truflar mig meira en annað.
Hvernig er hægt að búa til störf með því að fjölga þeim lystamönnum sem leggjast á hreppinn og framfærslu skattgreiðenda? Er þá verið að tala um að draga atvinnulausa lystamenn af atvinnuleysisskrá og rétta þeim meðgreiðslu frá almenningi í formi launa í stað bóta? Þurfa þeir þá að gera eitthvað í staðin,vinna eitthvað? Við hvað þá?
Hvenær er lystamaður atvinnulaus,þegar lystagyðjan og sköpunargleðin hefur yfirgefið hann? Fær hann vitrun og hugmyndakraft ef almenningur réttir honum pening að gjöf?
Því að hengja sig við einhverja 30 lystamenn? Má ekki bara rétta öllum atvinnulausum „laun“ úr sjóðum almennings og útrýma þannig atvinnuleysi í eitt skipti fyrir öll? Það fengju allir bara laun í stað bóta og vandamálið væri úr sögunni.
Það er eitt að skapa en annað að búa til.
Jón Þór Helgason // 16.3 2009 kl. 12:52
Skrítið að vera á fullum launum(listamannalaunum) og fá síðan laun fyrir að selja list sína. Og kalla það atvinnuskapandi. sorglegt.
Klára siðan tónlistarhús sem kostar um 15 milljarða (á að vera fyrsta opinbera bygginginn sem er á kostnaðaráætlun) til að skapa 600 störf. Ég veit ekki betur að það komi 100 kínverjar til að setja upp glerið! Voru þeir taldir með í þessari tölu?
Þessir 15 milljarðar duga til að greiða atvinnuleysisbætur í heilt ár fyrir 10 þúsunds manns.
Rita ummæli