Viðtal DV við Sigríði B. Baldvinsdóttur nýnasista í Hveragerði hefur vakið nokkra athygli. Sigríður fer með þekktar klisjur um yfirburði hvíta kynstofnsins og fátt um þær að segja. Kynþáttahyggja er sérstæð blanda af fáfræði, vænisýki og hreinni nesjamennsku og öflugasta lúsameðalið gegn henni er opinská umræða, fræðsla og upplýsing.
Sigríður og félagar hennar hafa með sér samtök sem kalla sig Blóð og heiður/Combat18 Ísland. Svolítið gúggl leiðir í ljós að erlendar fyrirmyndir eru bæði ofbeldisfull og hættuleg félög og þess vegna ætti ef til vill að gefa því gaum ef þau ná einhverri fótfestu hér. Sigríður og pótintátar hennar mættu með nasistafána á Austurvöll í mótmælum í haust en vildu þá lítið tjá sig við fjölmiðla.
Í febrúar 2001 birti Helgarblað DV viðtal sem ég tók við Hlyn Frey Vigfússon þá varaformanna Flokks íslenskra þjóðernissinna. Hér er tengill á viðtalið. Hlynur var dreginn fyrir dóm vegna ummæla sem lét falla um „Afríkunegra“ og dæmdur í sektir sem sjá má hér.
Þá var eins og nú nokkuð deilt um hvort blaðið ætti að hleypa skoðunum Hlyns og félaga hans fram í dagsljósið. Okkar skoðun var sú að með því væri starfsemi nasista gerð sýnileg og það yrði flokknum að fjörtjóni því skoðanir af þessu tagi ættu engan hljómgrunn og þyldu ekki opinbera umræðu. Þetta reyndist rétt. Flokkurinn sem boðað hafði framboð í kosningum hvarf eftir birtingu viðtalsins og uppkvaðningu dómsins enda fáir aðrir en Hlynur Freyr og tvö systkini hans sem vildu gangast við því að styðja hann.
Íslenskir stjórnmálaflokkar hafa ekki viðrað teljandi ofstæki á þessum sviðum. Frjálslyndi flokkurinn hefur gengið lengst íslenskra flokka í því að nudda sér utan í hugmyndir þjóðernisofstækis og kynþáttahyggju en ekki uppskorið fylgi í samræmi við það. Sigríður sú sem DV ræðir við var t.d. á lista flokksins í síðustu kosningum. Þótt stundum gæti mikils ofstækis í feisbókarþvaðri og upphrópunum nafnleysingja sbr. umræðu um moskubyggingar í Reykjavík sér þess ekki stað að fólk sé fúst til að kjósa flokka með nasisma og útlendingahatur á stefnuskránni.
Þess vegna er það líklega rétt hjá DV að birta þetta viðtal við Hvergerðinginn Sigríði þó ekki væri nema til þess að viðra óloftið úr skúmaskotum fáfræði og heimsku. Hvort Sigríður megi eiga von á dómi er svo allt annað mál. Hvort rétt sé að dæma menn fólk fyrir skoðanir sínar er önnur og flóknari spurning. Hér er tilvitnun í dóminn yfir Hlyni Frey frá 2001.
„Dómurinn taldi háttsemi hans ekki verndaða af stjórnarskrárbundnu tjáningafrelsi samkvæmt 73. grein stjórnarskrárinnar né af 10. grein Mannréttindasáttmála Evrópu enda væri tjáningarfrelsið ekki skilyrðislaust. Takmörkun á því fælist m.a. í að menn yrðu að ábyrgjast framsetningu skoðana sinna fyrir dómi og því mætti setja ákveðnar skorður til verndar ákveðnum gildum m.a. vegna réttinda eða mannorðs annara. Í mannréttindasáttmálanum væri áréttað að ekkert ákvæði hans yrði túlkað á þann veg að þau heimili að öðrum réttindum yrði eytt eða takmörkuð. „Virðing fyrir mannlegri reisn allra manna jafnt er sá grundvöllur sem alþjóðlegir mannréttindasáttmálar og stjórnarskrár lýðræðisríkja byggja á og vernda og þeirri vernd verður ekki vikið til hliðar með vísan til tjáningarfrelsisákvæðisins.“
Netið gleymir engu og best að ljúka þessu með tilvitnun í Sigríði Bryndísi Baldvinsdóttur sem kemur upp þegar nafn hennar er gúglað:
„maður getur ekki opnað morgunnblaðið nema að þar sé mynd af vælandi negrabarni, af hverju er ekki meira af fréttum frá okkar heimshluta. Það sem er að gerast í nágrannalöndunum tildæmis. Er hvít eymd ekki fréttnæm?“
Ljóst er af viðtalinu við Sigríði að ekki þarf að fara nema austur í Hveragerði til þess að finna hvíta eymd.
Ummæli (16)
Soffía // 24.1 2011 kl. 15:21
Þú vísar fjórum sinnum til Hveragerðis í þessum pistli þínum og hafðu skömm fyrir góði – þótt þessi aumkunarverða manneskja hafi flust til þessa tiltekna bæjarfélags hlýtur hið fréttnæma að vera þankagangur hennar en ekki hvar hún borgar sitt útsvar.
Ég fagna því að þú skulir telja upp útgefin ritverk þín á þessari síðu, það gerir mér auðveldara fyrir að sniðganga þau.
Sigríður Bára // 24.1 2011 kl. 15:34
Soffía, í húsnæðisbólunni 2004-2008 hækkaði húsnæðisverð mikið á Höfuðborgarsvæðinu. Hvíta ruslið (les. hlustendahópur útvarps Sögu) og fólk í neyslu hafði ekki lengur efni á að búa á Höfuðborgarsvæðinu og flutti hópum saman til ódýrari búsvæða, aðallega til til Selfoss, Hveragerðis og Reykjanesbæjar.
Aldís Sveinsdóttir // 24.1 2011 kl. 15:45
Hvers konar rugl pistill er þetta? Þú Páll telur augljóslega að þú sem fjölmiðlamaður sért þess umkominn að ritskoða hvaða sjónarmið eigi að birtast almenning á hverjum tíma. Er ekki skoðanafrelsi í þessu landi? Fólk er frjálst að skoðnum sínum og við hin erum fyllilega nógu vel upplýst til að mynda okkur skoðanir með þeim eða á móti án þess að svona besservisserar eins og þú séuð að setja ykkur á háan hest og dæma fyrirfram hvað okkur sé hollt að lesa eða ekki. Svo tek ég undir með Soffíu hér fyrir ofan. Það er alveg óþarfi að blanda Hveragerði inn í þessa umræðu og augljóst að þú gerir það því þú ert að vonast til þess að bæjarbúar þar flæmi þessa ungu konu á brott. Þú ert að espa til gamaldags nornabrennu vegna þessa að fram er komin manneskja sem þú ert ekki sammála og hafðu skömm fyrir það. Ég hafði álit á þér.
Hugsi // 24.1 2011 kl. 15:51
Takk fyrir að vekja athygli á þessu. góð grein hjá þér.
Soffía // 24.1 2011 kl. 15:53
Jiiii, takk fyrir að upplýsa mig og fleiri dreifbýlisbúa Sigríður Bára.
Mér þykir þú fróð um Hveragerði og aðstæður þar, já, og víðar! Ætli „hvítt rusl“ sé hlutfallslega umfangsmeira í Hveragerði en til dæmis í Reykjavík, á Dalvík eða í Súðavík? Hefur það verið skoðað sérstaklega? Hvað er „hvítt rusl“?
(Æ, fyrirgefðu Sigríður Bára að ég skuli voga mér að spyrja svona erfiðra spurninga (þar sem ég geri engan veginn ráð fyrir að þú ráðir við þær) – Það hvarflar ekki einu sinni að mér að ætlast til að þú rökstyðjir þetta með Útvarp Sögu)
Annars mæli ég algerlega með því að fólk sem vill mögulega láta bera einhverja lágmarksvirðingu fyrir því sem það segir hætti að tala með rassgatinu!
Guðrún Ægisdóttir // 24.1 2011 kl. 15:54
Réttast er að þegja skoðanir Sigríðar og co. í hel
Þorsteinn Úlfar Björnsson // 24.1 2011 kl. 15:56
Hvað segir það okkur að hún kallar sig Védís Ótugt?
Jón // 24.1 2011 kl. 16:18
Aðkomufólk, að sjálfsögðu!
Ástþór Jóhannsson // 24.1 2011 kl. 16:42
Hvaða, hvaða? Mikið virðast þessir Hvergerðingar viðkvæmir sem rita hér ummæli. Nú stúlkan sú arna býr sem stendur í Hveragerði. Og hvað með það. Fólk með öfgaskoðanir finnast því miður í öllum bæjarfélögum, einnig í Hveragerði.
Eymdin, ömurleikinn og ofbeldishneigðin sem fylgir kynþáttamisrétti (rasisma) er sem betur fer ekki djúpt sokkin í brjóstum Íslendinga. Þó er fáfræðin í garð annara siða og hörundslitar útbreidd hér á landi. Fáfræði og rasismi eru sitthvað. En rasisminn nærist á fáfræðinni, þar sem hann kemur sér fyrir. Eins og púkinn á fjósbitanum, sem nærist á illmælum.
Kynþáttahyggjan er ein af fúlustu pyttunum sem gæfulaust mannkyn stakst á höfuðið ofan í á nítjándu öld og svamm þar í ógeðinu sem þar þrífst alla tuttugustu öldina.
Fínt veganestið hjá þessum „ljóshærða Hvergerðingi“ inn í tuttugustu og fyrstu öldina – eða hitt þó heldur.
Þótt græðgin hafi fellt íslenskt alþýðufólk um tíma, þá vona ég að þeir falli ekki nokkurn tímann í eymd kynþáttahyggjunnar. Jarðarbúar lifa og deyja allir undir sama tunglinu og svona skoðanir eins og Sigríður B. viðrar eru ekki til annars en að hæðast að þeim.
En þær ber að taka alvarlega. Og það er sama hvernig þær eru á litinn. Því kynþáttafordómarnir – þeir koma í öllum litum og finnast í öllum samfélögum. Alqaida samtökin eru dæmi um afar hættuleg rasistasamtök og sama má segja um frú Palin frá Alaska. Snoðinkollar norðan og vestan Alpa sem SB er í slagtogi við munu ekki gera almenningi í heiminum meira gagn en það fólk.
Ísland er örþjóð – minnihlutahópur í veröldinni og unnendur íslenskrar menningar eiga að berjast í liði með þeim sem virða siði annarra, en berjast gegn yfirgangi og forheimskun rasismans, hvaðan sem það kemur. Þakka þér fyrir Páll – fín grein.
Hlynur Þór Magnússon // 24.1 2011 kl. 16:58
Þetta er svo sem eftir öðru í athugasemdadálkum – að hengja sig í Hveragerði í stað þess að fjalla um efni pistilsins …
Arinbjörn Kúld // 24.1 2011 kl. 17:56
Ein jörð, eitt tungl, ein sól, eitt mannkyn. Er það ekki nóg fyrir okkur til að lynda við náungann?
Kveðja að norðan.
Jónas // 24.1 2011 kl. 19:11
Persónulega finnst mér sjálfsagt að mæta með nazistafánann til mótmæla við Alþingi. Það gæti t.d. verið í þeim tilgangi að mótmæla skrípaleik stjórnmálamanna sem meðhöndla almenning sem fífl. Nazistafáninn getur vísað í margskonar óánægju. Hér fengu menn óáreittir að stunda kerfisbundin og stórtæk hryðjuverk gagnvart almenningi. Þessir menn ganga enn lausir og munu aldrei þurfa að svara fyrir hryðjuverk sín svo neinu nemur – sérstaklega vegna þess að hér þrífst óvenjumikil spilling, lydduháttur og glæpamennska í stjórnkerfinu.
Að mótmæla með nazistafánanum er m.a. túlkun mótmælenda á því að hér er stjórnað af ósanngirni og kúgun- svipað og gert var í ríki nazista.
Magnus Björgvinsson // 24.1 2011 kl. 19:31
@Jónas // 24.1 2011 kl. 19:11
Þú hlýtur að vera að grínast hér að ofan! Nazistafánin stendur ekki fyrir neitt annað er þjóðernisofstæki og kynþáttaofstæki. Og hefur ekkert með stjórn landsins að gera. Við búum í réttarríki þar sem menn eru dæmdir í fangelsi en ekki settir í fangelsi til að þóknast fólki. Og held að þú ættir að kynna þér aðeins betur út á hvað Nazismi gengur áður en þú ferði út í svona bollaleggingar. Enda mætti fólk með þennan fána til að að vekja athygli á málstað Blóð og heiður/Combat18 Ísland sem gengur út á yfirburði hvíta kynsofnsins. Og það gerðu Nazisar þ.e. þeir réðust á þá sem ekki flokkuðust sem aríar. Þ.e. Gyðinga, fatlaða, samkynhneigða og fleiri. Þannig að samlíking þín við Ísland er út í hött. Minni þig á að í dag var birt að Ísland var „12. farsælasta þjóð í heimi árið 2010 ef marka má lista Legatum stofnunarinnar yfir þau lönd heims sem njóta mestrar velmegunar.
Löndum er raðað á listann byggt á átta flokkum, efnahag, nýsköpun, stjórnafari, menntun, heilbrigði, öryggi, persónulegu frelsi og félagsauð. Alls eru það 89 atriði sem eru skoðuð til að fá skorið í ólikum flokkum. Ísland er alls staðar metið yfir meðallagi, nema hvað varðar efnahag. Írland er einu sæti ofan við Ísland á listanum.“
Og þó ekki hafi allir efni tímabundið á að kaupa sér nýja bíla og sjónvörp og þurfi kannski að leigja sér íbúð í nokkur ár í viðbót, þá hefur fólk það hér betra en um 70% af íbúum jarðarinnar.
aagnarsson // 24.1 2011 kl. 20:39
Mannskepnan á þessum hnetti er alt sama tegundin !
Árni kristjánsson // 24.1 2011 kl. 23:50
Komdu sæll Páll
Ég er hræddur um að Nasistminn eigi upp á pallborðið hér á Íslandi, því miður.
Hvernig getur annars „Hitlersgerfi“ hlotið 1. verðlaun á grímuballi hjá samtökunum Komið og dansið eins og meðfylgjandi tengill sínir;
http://public.fotki.com/komidogdansid/stridsaraball/strsraball2117.html
Kveðja Árni Guðnýjar
Reynir Sigurðsson // 28.1 2011 kl. 00:00
Góður pistill Páll.
En það er leitt og lýsir vaxandi smekkleysi að margir skuli ekki skynja að snilldar ending á pistlinum krafðist þess að Hveragerði væri títt nefnt.
Rita ummæli