Kveðið úr kútnum

Mamma er meðlimur í samtökum aldraðra, sem byggðu Aflagranda 40, blokkina sem hún hefur átt heima í síðan 1989.

Félagið er samvinnufélag, eins og KRON og Sambandið voru.

Hún er ekki viss hvort hún ætti að vera meðlimur í samtökunum lengur af því hún er búin að kaupa íbúðina og finnst hún ekki fá neitt fyrir félagsgjaldið, því samtökin viðhalda ekki húsinu, þau byggja bara ný hús.

Þegar hún hafði samband og vildi ganga úr félaginu var henni sagt að það bara væri ekki hægt. Hún vildi betri rök því það má ekki banna fólki að ganga úr félögum.

Henni var þá bent á að hún myndi missa réttindi og tilkall til sjóða ef hún hætti í félaginu, en hver réttindin eru kemur hvergi í ljós á heimasíðunni, né heldur sjóðirnir sem aðgengið er að.

Hún bað mig að líta yfir fundargerðir og reglur félagsins og sjá hvort ég ræki augun í eitthvað.

Ég sit því nú og les. Ég hef lítið kynnst samvinnufélögum, þarf að kynnast þessu rekstrarformi betur. Mamma er víst eigandi íbúðarinnar en má samt ekki selja hana á opnum markaði, því félagið hefur forkaupsrétt og verðið má ekki ákvarða út frá framboði og eftirspurn. Skrýtinn félagskapur.

Ég rak hins vegar upp stór augu þegar ég rakst á þessa málsgrein:

3.3 [...] Verði félagsmaður ber að því að spilla áliti félagsins eða vekja tortryggni hjá félagsmönnum er stjórninni heimilt að víkja honum úr félaginu. [...] Við úrsögn getur félagsmaður ekki gert neitt tilkall til sjóða félagsins.

Seinna, í samþykktum fyrir Húsnæðissamvinnufélag samtakanna er þessi málsgrein:

5.2 [...] Félaginu er heimilt að brottvísa hverjum þeim sem viðhefur sviksamlegt athæfi gagnvart félaginu [...]

Sé félagsmanni vikið úr félaginu [...] skal viðkomandi þegar rýma íbúðina.

Eru þetta alvanalegar reglur hjá félögum? Spyr sá sem ekki veit. Eru þær ætlaðar til þess að hræða félagsmenn frá því að vera með uppsteyt eða er þetta alltaf svona?

Vita lesendur meira en ég um þessi samtök? Mamma vill bara vita hvort hún á að greiða greiðsluseðilinn áfram.

Við sjáum jafnvægisleysi og breytingar en undir niðri er jafnvægi. Allt er síbreytilegt í forgrunninum en bakgrunnurinn breytist ekki.

Ef þú sérð hlutina án þess að taka eftir þessum bakgrunni sérðu bara þjáningar og jafnvægisleysi. En ef þú sérð bakgrunn tilverunnar skilur þú að þjáningin gefur lífinu merkingu.

Í Zen leggjum við oft áherslu á ójafnvægið eða handahófið.

Hefðbundin málaralist var orðin formleg og líflaus, þess vegna þróaðist nútímalist. Listamenn vildu æfa sig í því að setja púnkta á pappír handahófskennt. Það er erfitt. Þótt þú reynir að gera hlutina af handahófi verður einhver regla á þeim. Þú heldur að þú hafir stjórn á handahófinu, en þú hefur það ekki. Það er nánast ómögulegt að setja púnktana niður tilviljanakennt.

Þannig er það líka með lífið.

Þótt þú reynir að stjórna fólki, getur þú það ekki. Besta leiðin til að stjórna mönnum er að fá þá til að vera uppátækjasama. Þá munu þeir lúta stjórn í víðari skilningi.

Besta leiðin til að stjórna fé eða nautgripum er að gefa þeim stórar engjar. Þannig er það líka með menn. Leyfðu þeim að gera það sem þeir vilja en fylgstu með þeim. Það er besta stefnan. Það er mjög slæmt að hunza þá, og það er næstum því jafn slæmt að reyna að stjórna þeim. Best er að horfa á þá, án þess að reyna að stjórna þeim.

Sama aðferð gagnast líka fyrir sjálfan þig. Ef þú vilt finna innri ró þegar þú æfir Zen kyrrsetur, þá skaltu ekki reyna að stjórna myndunum sem skjótast upp í hugann þegar þú slakar á, láttu þær koma og fara. Þá nærðu tökum á þeim. Þetta er ekki eins auðvelt og það hljómar, það þarf æfingu. Hún er leyndarmálið við Zen kyrrsetur.

Segjum að þú reynir að stunda Zen þegar mikið gengur á. Ef þú reynir að róa hugann mun þér ekki takast að sitja kyrr og ef þú reynir að vera í friði munt þú samt ekki ná tökum á hugleiðslunni.

Það eina sem þú getur gert er að telja andartökin, einbeita þér að innöndun og útöndun. Einbeiting er samt ekki það sem Zen gengur út á. Þú vilt horfa á hlutina eins og þeir eru, fylgjast með en láta samt hlutina fara einhvern veginn. Það köllum við að hafa stjórn á hlutunum í víðasta skilningi hugtaksins.

Zen æfingar víkka skilning, hjálpa okkur að tengjast við stóru meðvitundina sem spannar heiminn. Ef þú vil skilja hvað Zen þýðir í daglegu lífi þarftu að skilja hvers virði það er að vera meðvitaður um öndunina og hvernig þú situr. Þú þarft að æfa daglega þar til meðvitundin verður þér eiginleg. Það er eina leiðin til að finna frelsið í Zen.

Fullkomið frelsi fæst ekki án reglna. Fólk, sérstaklega ungt fólk heldur að frelsi sé leyfi til að gera það sem það vill, að í Zen séu engar reglur. En það er bráðnauðsynlegt að hafa reglur.

Það er ekki þar með sagt að fólk þurfi alltaf að lúta stjórn. Þegar þú hefur reglur áttu möguleika á að vera frjáls. Að reyna að leita frelsins án þess að þekkja reglurnar er merkingarlaust. Við viljum fullkomið frelsi, þess vegna iðkum við Zen.

Þýtt úr Zen Mind: The Beginner’s Mind – Control eftir Shunryu Suzuki

Orðið „Elíta“ er mikið notað af sjálfstæðismönnum á vefsíðum eins og amx.is.

Í félagsfræði er „Elíta“ lítill hópur sem ræður hlutfallslega miklu í þjóðfélaginu, er með forréttindastöðu, hefur peninga og völd. Ef hópurinn ræður í pólitík tekur hann yfirleitt stjórnunarstöðurnar sér til handargagns.

Valdaelíta er lítill hópur sem hefur hlutfallslega mikil völd, aðgengi að auði, forréttindum og ákvarðanatöku.

Hugtakið var fyrst skilgreint í bók eftir Charles Wright Mills í bók frá 1956, „The Power Elite“. Þar er þessi hópur sagður samanstanda af fólki í iðnaði, bönkum, hernaði, pólitíkusum, fólki í akademíu og blaðamönnum.

Mér heyrist að elítan á Íslandi séu auðmenn, þeir sem eiga kvóta, lönd, fyrirtæki.  Eru þetta ekki dæmigerðir kjósendur sjálfstæðisflokksins?

Af hverju hefur þessi hugtakanotkun snúist við? Þótt einn og einn kommi fái að tjá sig í útvarpi eða sé lögmætt kjörinn á þing gerir það hann ekki að „Elítu“ landins í mínum huga.

Ég gef mér að þeir sem standa að baki AMX.is séu á vegum útvegsmanna og sjálfstæðismanna, þeirra sem ég hef alltaf hugsað um sem elítu landsins.  Sjálfir virðast þeir telja sig vera málsvara „litla mannsins“, eins konar Bubba í Ísbirninum og að þeir sem starfa við háskóla eða hjá CCP séu Elítan, þeir sem „Litli maðurinn“ er í stríði við.

Ég á mjög erfitt með að sjá hlutina með þessum augum, verð ég að segja.

Ég bý í vesturbæ Reykjavíkur.

Mér bjóðast tvö störf. Annað er í Garðabæ þar sem hjólastígar liggja ekki, ég get ekki hjólað þangað og haft gaman af því. Ég verð að keyra.

Ef ég þigg starfið í Garðabæ þá þarf ég að keyra eina klukkustund á dag til og frá vinnu. 20 klukkustundir á tímakaupi gera 70 þúsund krónur á mánuði. Rekstur bíls er 85 krónur á hvern kílómetra samkvæmt FÍB svo hann kostar 38 þúsund krónur vegna ferðanna til og frá vinnu. 38+70 = 108 þúsund krónur á mánuði.

Þetta eru útgjöld sem ég þarf að borga með því sem ég fæ útborgað eftir skatta, svo ég þarf meira en 108 þúsund krónum hærri laun vegna bíltúranna.

Starfið í austurbænum er hins vegar minna en 10 mín hjólatúr í burtu eftir góðum hjólastíg. Hjólatúrinn er líkamsrækt sem ég hefði hvort eð er þurft að stunda svo ekki reikna ég tímakaup fyrir hann. Hjólið er svo ódýrt að ég reikna ekkert kílómetragjald.

Þess vegna vil ég fá að minnsta kosti 110 þúsund krónum hærri mánaðarlaun ef ég þigg starf í Garðabæ en í austurbæ Reykjavíkur.

Ég veit ekki hvort aðrir hugsa eins og ég, en sveitafélög ættu að hafa í huga að bær án innviða er bara samsafn af húsum.

Það sem ég vil aðallega benda á, er að mér finnst Garðabær dálítið gamaldags.

Ég held að bæjarstjórnin haldi að fólk á hjólum sé að viðra sig í hverfinu um helgar eða þá fátækt, bílprófslaust eða bæði.

Það er til stækkandi hópur fólks sem hefur ágætis laun og vill hjóla á milli staða. Þess vegna ættu sveitastjórnirnar að hittast og skoða saman kort af höfuðborgarsvæðinu með gleraugum þess sem ætlar ekki á bíl.

Það er ekki í lagi að hjóla í gegnum göturnar á Arnarnesshæðinni og í gegnum nýja Sjálands hverfið fyrir þá sem eiga ekkert erindi þangað, þótt það sé góð samnýting á leiðum sem er búið að gera fyrir fólkið sem á heima þar.

Ég skora á bæjarstjórnirnar að finna stystu leiðina t.d. frá miðbæ Kópavogs og yfir í fjölbrautarskólann í Garðabæ á reiðhjóli. Þetta eru tveir sléttir kílómetrar í loftlínu og ætti því að vera sex mínútur á hjóli ef hjólakerfið væri í lagi.

Landakortið er hér: http://ja.is/kort/#x=358399&y=403132&z=8

Þetta er heimabakað brauð.  Sneiðin er 48 grömm, þungt í því pundið.

Ég get bakað þrjú svona brauð fyrir andvirði hveitipoka.

Næsta brauð er keypt í bakaríi sem heitir Kornið.  Brauðneiðin er skorin til í sömu stærð og heimabakaða brauðið.

Seinni sneiðin er 14 grömm.  Ég get ekki smurt sneiðina því hún hrynur í sundur.  Ég man ekki hvað brauðið kostaði en það hékk í fimmhundruðkallinum.

Ég mæli með því að fólk læri að baka sjálft.

Þrjú brauð, þrautreynd uppskrift

Mælið í skál:

1. 900 g brauðhveiti
2. 500 g heilhveiti
3. 120 grömm sykur eða brúnsykur
4. 1 msk salt
5. 4 msk ger (duft)
6. 80 g matarolía (til dæmis ISIO-4)

Það er sniðugt að setja skálina á tölvuvog og vigta beint í skálina, núlla vogina á milli.

Mælið í skaftpott:

1. 500 g mjólk
2. 500 g vatn

• Hitið í 35-40c, ekki meir því annars drepst gerið (ég nota kjötmælinn)
• Hellið vökvanum í skálina
• Hrærið saman við þurrefnin
• Látið hræruna standa í 40 mín.  Nú verður teygjan til í deiginu

…40 mín síðar…

• Kýlið deigið niður
• Bætið við 300 g brauðhveiti og hnoðið
• Skiptið í þrennt (brauðin verða 1000 g stykkið) og hnoðið
• Veltið uppúr dálitlu hveiti svo brauðin festist ekki í mótunum
• Setjið í mót  (Gott er að eiga teflon mót!)
• Leyfið brauðunum að lyfta sér í 30 mínútur undir viskustykki

…30 mín síðar…

• Bakið 25 mínútur við 180 gráður í miðjum ofni með blæstri og undirhita
• Hvolfið úr mótunum á grind til að kæla
• Frystið tvö brauð, byrjið á því þriðja  :)

Ef ríkið hefði unnið vinnuna sína fyrir hrun hefði Icesave ekki komið upp. Nú spyr ríkið mig hvort borga eigi Icesave eða ekki, í stað þess að vinna vinnuna sína.

Í fyrsta lagi er ég ekki á launum við að taka þessa ákvrðun, og í öðru lagi hef ég ekki fengið þjálfun til þess, hvorki í lögfræði eða pólitík. Ég var ekki spurður hvort við ættum að opna banka í útlöndum svo hvers vegna að spyrja mig núna?

Meiri hluti þingmanna hafði ákveðið að við ættum að borga. Þess vegna ætla ég að mæta á kjörstað og segja „JÁ“, að við eigum að borga, leyfa þeirra ákvörðun að standa.

Ég hef á tilfinningunni að þeir sem vilja borga, og þeir sem vilja ekki borga hafi báðir eitthvað til síns máls, en viti allt of lítið. Mér heyrast flestir hafa ákveðið sig fyrirfram og tínt svo til rökin eftirá. Hvorug sagan finnst mér sannfærandi. Hér eru rökmolarnir sem ég man í fljótu bragði:

1. Menn eiga að borga skuldir sínar
2. Borgum ekki skuldir óreiðumanna
3. Ef bretar og hollendingar væru með málstað færu þeir í mál
4. Það er betra að semja en borga lögfræðingum, siðað fólk þarf ekki lögfræðinga
5. Það er best að borga strax það sem maður skuldar
6. Greitt lán er glatað fé
7. Frestur er á illu bestur
8. Illu er best aflokið
9. Síðast þegar við sögðum nei fengum við miklu betri kjör
10. Ef við segjum nei verðum við ekki lengur tekin vettlingatökum
11. Þorskastríðið borgaði sig að lokum, þetta verður endurhvarf til góðu gömlu daganna, Ísland-Bretland!
12. Íslendingar unnu þorskastríðið vegna þess að Bandaríkjamenn sögðu Bretum að láta okkur í friði. Þeim er sama um okkur núna.
13. Það er góð realpolitik að borga, svo við fáum láns og viðskiptatraust aftur
14. Ef við borgum missum við virðingu þeirra sem eru á móti global kapítalisma, við gætum orðið byrjun á nýrri byltingu gegn alþjóðavæðingunni!
15. Borgum til að sýna Davíð hvað hann var vitlaus að einkavæða bankana, þá getum við sagt við hann á eftir: „You did this to me!“
16. Borgum ekki því það er veikleiki. Það sem okkur vantar núna er sterkan leiðtoga, sem byggir upp sjálfstraust þjóðarinnar, sér til þess að strætisvagnarnir keyri á réttum tíma og sundstaðir opni snemma, og sýnir öðrum þjóðum í tvo heimana. (Hljómar kunnuglega?)
17. Fjármálakerfi heimsins er að fara til fjandans svo það skiptir engu máli hvort við borgum
18. Ekki borga, bara til að sjá hvað gerist. „This will be fun!“
19. Maður á aldrei að skuldbinda sig í erlendum gjaldeyri, endurgreiðslan fer ekki fram í krónum svo samningurinn er óviðunandi
20. Lee Bucheit hefur náð ótrúlega góðum samningum miðað við hvað íslendingar voru miklir nígeríusvindlarar, „let’s go while the going is good!“
21. Íslendingar eru blásaklausir hárskerar og smiðir sem gátu ekki vitað hvað var að gerast í London, af hverju eiga þeir að borga? Íslendingar eru jú ekki skuldbundnir af skuldbindingum ríkisstjórnar Íslands skv. nýrri kenningu sem er í þróun
22. Borgum til að losna við málið úr fréttum, svo við fáum frið til að pakka í ferðatöskur, það er alltaf hægt að flytja til Evrópu ef við töpum málinu og komast þannig í vinningsliðið aftur

Þetta eru auðveldu tilfinningarökin sem ég man í bili. Lögfræðirökunum hef ég ekkert vit á, en það eru þau sem munu skera úr um málið þegar upp er staðið. Þess vegna segi ég „Já“.

Beðið eftir fundi Jóns Briem

Fjölmiðlar bíða í ofvæni eftir fréttamannafundi Jóns Briem,
deildarforseta í lyfjafræði í dag. Þar verður meira spurt um Önnu Jónu
og framtíð hennar hjá deildinni en birtingu deildarinnar á grein í
tímariti annað kvöld.

Hvort þeir fá meira um málið útúr Jóni er önnur saga en Anna Jóna er nú
orðuð við Félagsfræðideild og Hagfræðideild eftir að það spurðist út að
hún hefði neitað að skrifa undir nýjan samning við lyfjafræði. Hún á
hálft annað ár eftir af núgildandi samningi.

Karl Andrésson, deildaforseti hagfræðideildar vildi ekki láta draga sig
inní málið á fréttamannafundi sínum í gær. „Þið verðið að spyrja
Jóhönnu um kaup á nýjum starfsmönnum“, sagði hann og vísaði alfarið á
rektor skólans, Jóhönnu Sveinsdóttur.

Nokkrir fjölmiðlar fullyrða í dag að grannadeildirnar í skólanum séu að
undirbúa risatilboð í Önnu Jónu og 17,6 milljarðar króna eru nefndar í
því sambandi. Dagblaðið segir að Anna Jóna muni fá 4,6 milljarða króna
í árslaun hjá Hagfræðideild.

Skilaboðin frá Lögfræðideild eru hingvegar þau að þar séu
fræðimannastöður fullmannaðar. Við erum með tvo frábæra fræðimenn, Svein
Loftsson, og Ágúst Loft sem geta birt 60 greinar saman á tímabili“,
sagði Þröstur hjá lögfræðideild.

… hér er upphaflega fréttin úr Mogganum …

Beðið eftir fundi Fergusons

Enskir fjölmiðlar bíða í ofvæni eftir fréttamannafundi Alex Fergusons,
knattspyrnustjóra Manchester United í dag. Þar verður meira spurt um
Wayne Rooney og framtíð hans hjá United en leik liðsins við Bursaspor í
Meistaradeild Evrópu annað kvöld.

Hvort þeir fá meira um málið útúr Ferguson er síðan önnur saga en Rooney
er nú orðaður við Manchester City og Chelsea, ásamt Real Madrid og
Barcelona, eftir að það spurðist út að hann hefði neitað að skrifa undir
nýjan samning við Manchester United. Hann á hálft annað ár eftir af
núgildandi samningi.

Carlo Ancelotti, knattspyrnustjóri Chelsea, vildi ekki láta draga sig
inní málið á fréttamannafundi sínum í gær. „Þið verðið að spyrja Roman
um kaup á nýjum leikmönnum,“ sagði Ítalinn og vísaði alfarið á eiganda
félagsins, Roman Abramovich.

Nokkrir fjölmiðlar fullyrða í dag að grannarnir í Manchester City séu að
undirbúa risatilboð í Rooney og 100 milljónir punda eru nefndar í því
sambandi. Daily Star segir að Rooney muni fá 26 milljónir punda í
árslaun hjá City.

Skilaboðin frá Real Madrid eru hinsvegar þau að þar séu
framherjastöðurnar fullmannaðar. „Við erum með tvo frábæra sóknarmenn,
Gonzalo Higuaín og Cristiano Ronaldo, sem geta skorað 60 mörk saman á
tímabili,“ sagði Jorge Valdano hjá spænsku risunum.

Sjónvarpið er á breytingarskeiði.

Það er ekki nóg með að sjónvörpin séu orðin stór og flöt og þunn heldur er loftnetstengið á útleið.

Ég ólst upp við að sami aðili framleiddi innlent efni, flutti inn erlent efni og dreifði öllu saman. Það var ríkissjónvarpið sem átti stúdíóin og sjónvarpssendana. Nú eru þessi þrjú hlutverk orðin aðskilin.

Myndlyklar í dag hala niður videó eins og heimilistölvan gerir og eru tengdir sama nettengli. Hingað til hafa myndlyklar verið tengdir við einkanet Símans eða Vodafone og tengst efnismiðlurum þeirra en tæknilega er ekkert því til fyrirstöðu að þeir tengist sjálfu Internetinu án þess að Síminn eða Vodafone séu milliliður.

Þarna eru tímamót og best að fylgjast vel með.

Fyrirtækin Tivo, Apple, Google og Microsoft eru öll að undirbúa sjónvarpssendingar á internetinu og sölu á myndlyklum. Þau eru því á leið í samkeppni við Vodafone og Símann. Nýtt „Apple TV“ box kemur á markað í september. Boxið tengist iTunes netversluninni en þar eru bíómyndir til leigu. Sky TV er þegar í boði yfir Internetið í gegnum Microsoft XBOX sem er þegar komið inn í stofuna dulbúið sem leikjatölva.

Google er að koma með sambærilegan kassa fyrir sitt Google TV.

Þessir nýju myndlyklar munu líka nýtast til að heimsækja venjulegar vefsíður hvort sem þær bjóða uppá vídeó eða texta. Vefsíður eins og www.comedycentral.com, www.ted.com og www.youtube.com eiga fullt erindi við sjónvarpið í stofunni, og textavarpið er úrelt í samanburði við venjulegar vefsíður.

Möguleikar íslendinga til að kaupa þessa myndlykla og tengjast þessum erlendu efnisveitum aukast því Internet samband inn á heimilin verður sífellt betra.

Gagnaveitan býður uppá 100 MBit net með ljósleiðara, og Síminn hjálpar óvinum sínum með því að taka hið ódýra Breiðband úr sambandi en bjóða þess í stað uppá hraða nettengingu yfir gömlu koparvírana (þessi þjónusta kallast Ljósnetið og er eiginlega ADSL á sterum).

Það ætti að verða auðvelt að veita innlendum markaði aðhald.

Í dag þarf áskrift að Stöð 2 til að sjá „Simpsons“, þætti sem eru í ólæstri dagskrá í öðrum löndum. Stöðvar eins og „HBO“ og „National Public Radio“ í Bandaríkjunum eða „TV2″ í Danmörku eru ekki í boði hér né heldur „Sci-Fi channel“ eða „TNT“, samt eru þetta vinsælar rásir erlendis.

Ég er sjálfur með Breiðband símans, en horfi á 11 af 60 stöðvum þess. Þær eru samt í sitthvorum pakkanum svo ég enda á að borga fyrir pakkann sem heitir „Allt“. Ég er því síður en svo ánægður viðskiptavinur og það verður auðvelt að ginna mig.

Síminn er þessa dagana að slökkva á sínu ódýra Breiðbandi og rukka inn aftur myndlyklana sem tilheyrðu því. Notendur Breiðbandsins neyðast því til að fá sér myndlykil sem notar netsamband. Mamma mín sem var með Breiðbandið á enga tölvu en þarf samt að fá áskrift að netinu með tilheyrandi vefsíðuplássi og tölvupóstfangi. (Starfsmaður Símans benti henni á að fá sér örbylgjuloftnet).

Mamma tilheyrir hópi notenda sem vill bara sjá RÚV í sæmilegum gæðum og telur sig þegar hafa borgað fyrir áhorfið. Það vilja ekki allir borga 5-7 þúsund krónur í netaðgang til að geta horft á sjónvarp. Þessi hópur ætti að tengja sjónvarpið aftur við gömlu sjónvarpsgreiðuna uppá þaki eða kaupa sér örbylgjuloftnet eða gerfihnattadisk.

Svo er hópur fólks sem vill borga fyrir sjónvarpsgláp en mun ekki nauðsynlega vilja íslenskan myndlykil. Þessi hópur mun kaupa lykla sem fara beint á netið (Apple, Google) og fara fram hjá íslenskum dreifingaraðilum. Þeir munu horfa á bíómyndir af videóleigum iTunes eða Google og þætti frá youtube.com og comedycentral.com.

Svo er hægt að vera í báðum hópunum, horfa á innlent efni með loftneti en hafa myndlykil fyrir erlent efni.

Hver verður í þriðja hópnum sem kaupir áskrift að myndlyklum Vodafone og Símans? Hvernig munu fyrirtækin marka sér sérstöðu? Var þeim ætlað að vera efnisveitur eða bara dreifingaraðilar?

Gömlu myndlyklarnir frá Vodafone og Símanum eru „ókeypis“ enda borga neytendur fyrir þá með afnotagjaldinu. Það er því freistandi að vera með þá áfram. Það er samt ekki útilokað að Apple og Google bjóði líka uppá „ókeypis“ myndlykla og nái kostnaðinum inn með afnotagjöldum.

Ef ég þekki Ísland rétt verður verð á erlendu gagnasambandi hækkað þar til erlendir myndlyklar geta ekki borgað sig og samkeppninni þar með eytt. Þetta verður gert með einhverri óguðlegri reglugerð sem á að tryggja íslenskum fyrirtækjum samkeppnisgrundvöll. Þá verður komin enn ein ástæðan til að ganga í ESB en það er önnur saga…

Svo getur verið að íslensk fyrirtæki keppi í framboði og gæðum og fari með sigur af hólmi !?

Nokkrir púnktar í lokin:

Blöðin fylgjast lítið með þróun mála en mér sýnist póst og fjarskiptastofnun veita innlendum fyrirtækjum aðhald til að tryggja aðgengi að erlendum efnisveitum, enda hefur hún innleitt tilskipanir evrópusambandsins.

Framleiðendur sjónvarpstækja eru farnir að setja tölvur inn í sjónvarpstækin svo hægt sé að stinga þeim beint í samband við internetið. Breytingar eru svo örar að ég myndi ekki þora að kaupa slíkt sjónvarp. Mér finnst líklegt að eitthvað box verði við hliðina á sjónvarpinu áfram.

Ég get ekki séð að Blue-Ray spilarar eigi mikla framtíð fyrir sér í þessari framtíðarsýn, salan á þeim hefur verið mjög dræm og litlar líkur á að það breytist. Hvers vegna að kaupa bíómyndina útí búð ef hún er til á netinu, (löglega eða ólöglega)?

Ég ætla að hætta mér út á hálan ís. Brandararnir eru allir fengnir af vefsíðu þar sem Gyðingar halda sínum húmor til haga.

…

Gyðingaamman var á ströndinni með barnabarnið þegar holskefla reif það út á haf. Gamla konan bað til Guðs sem aldrei fyrr og fyrir kraftaverk skolaði alda barninu aftur á land. Gamla konan tók barnið í fangið. Eftir smástund horfði hún til himins og hrópaði: „Það var með hatt!“

…

Gyðingur fór örvinglaður í bænahús og bað til Guðs um hjálp því sonur
hans væri búinn að skipta um trú, ætlaði að gerast kristinn. Eftir
nokkra stund á hljóðri bæn heyrir hann rödd sem sagði: „Halló“. „Hver er þetta?“ spyr maðurinn. „Þetta er Guð. Ég er með sama vandamál“.

…

Mótmælendaprestur og tveir Rabbínar fengu sér göngutúr í skógi til að ræða trúarleg málefni. Þeir voru farnir að rífast um ákveðið smáatriði í trúmálum sem skiptir ekki öllu máli hvað var. Rabbínarnir voru báðir sammála, og á öndverðri skoðun við kristna prestinn sem ávarpaði Guð og sagði: „Sýndu þeim að ég hef rétt fyrir mér!“. Viti menn, elding úr heiðskíru lofti klauf tré við hliðina á þeim. Rabbínarnir voru nokkuð skeknir en svo sagði annar þeirra: „Jæja, nú eru tveir á móti tveim“.

…

Lúterskur prestur, Katólskur og Rabbíni báru saman bækur sínar: Hvenær hefst lífið? Sá katólski sagði: „Við getnað“. Sá lúterski sagði: „Við fæðingu“. Rabbíninn sagði: „Þegar krakkarnir flytja að heiman og húsið er greitt að fullu“.

…

Lúterskur prestur, Katólskur og Rabbíni báru saman bækur sínar: Hvernig skiptið þið fénu sem kemur í baukinn eftir messu? Sá lúterski sagði: „Ég dreg hring á gólfið og kasta peningunum upp. Það sem kemur niður innan hringsins fæ ég, það sem lendir utan hans tilheyrir Guði“.

Sá katólski sagði að hjá honum væri þetta öfugt, það sem kæmi utan hringsins fengi hann, það sem lenti innan hans fengi Guð.

Rabbíninn sagði: „Ég kasta peningunum upp. Það sem kemur niður aftur fæ ég“.

…

Í þorpinu þar sem þessir þrír bjuggu, var safnað fyrir nýjum sjúkrabíl
sem var vígður með athöfn á torginu þar sem sýnagógan og kirkjurnar voru til húsa.

Fyrst kom lúterski presturinn út úr sinni kirkju með sinn söfnuð og
blessaði bílinn með vígðu vatni. Næst kom sá katólski með sitt reykelsi og kórdrengi og gerði það sama. Síðastur kom rabbíninn, einn síns liðs en með járnsög. Han kraup fyrir aftan bílinn og sagaði 1 cm af púströrinu.

…

Í lokin er Zen gáta (Koan) sem gæti allt eins verið brandari, og sem á vel við í pólitíkinni hér heima.

Zen múnkur spyr lærlinga sína: „Þið eruð á leið til bæna þegar þið sjáið kött fastan uppi í tré. Eigið þið að mæta á réttum tíma til bæna og skilja köttinn eftir hjálparlausann, eða hjálpa kettinum og koma of seint“?

Eftir nokkra þögn sagði einn lærlingurinn: „Hvurn fjárann var kötturinn að vilja uppí tréið?“ Múnkurinn lét sér svarið vel líka. (Ég skil söguna sem svo, að menn eigi ekki að láta teyma sig í annaðhvort/eða umræður að ástæðulausu).

Fleiri Zen gátur má t.d. finna hér

Ég hef oft saknað þess að hafa ekki nöfn á fiskitegundum þegar ég er að kaupa inn erlendis.

Hér er listi sem ég bjó til með fiskaheitum á íslensku, frönsku og ensku.

(Taflan er geymd sem töflureikniörk í Google Docs. Ef ég breyti henni þar, uppfærist vefsíðan hér. Þetta er sniðugt!)

Ef þið hafið leiðréttingar eða viðbætur, látið mig vita!