Blogg Jónu Ingibjargar

Sólarkysst í bak og fyrir

rakst ég á eldrauð blóm

sem ýttu mér inn í gufugeimskip

á plánetunni Laugum

-hugleiðing í tilefni endurbættrar Laugardalslaugar, til hamingju allir!

Þriðjudaginn 17. apríl verð ég með fyrirlestur handa starfsfólki tauga-og hæfingasviði á Reykjalundi. Fyrirlesturinn ber heitið Kynheilbrigði, lífsgæði og taugasjúkdómar. Per Olov Lundberg, sænskur taugalæknir, hefur skrifað manna mest um efnið og er ég búin grúska í efni frá honum og öðrum. Er sjálf orðin mun fróðari um á hvern hátt ýmsir taugasjúkdómar og skaði á taugakerfinu geta raskað kynverund fólks. Mest er vitað um áhrif mænuskaða enda mikið verið rannsakað.

Nú læðist inn í þjóðarsálina nýtt orðatiltæki; að kunna að hafa.

Þetta sést víða.

Byrjaði með lagatæknilegu orðlagi: lántakendur kunna að hafa betri rétt, ra-dí-dar-rí-ra….

Svo er kórinn tekinn við…

Þóra kann að hafa….

Kynlíf unglinga er löngu byrjað fyrir 15,6 ára aldur. Margir virðast gleyma því að kynlíf er líka fólgið í annarskonar kynhegðun en leggangasamförum, svo ekki sé minnst á kynhegðun og ástir samkynhneigðra.

Kynhegðun er þróun líkt og með aðra hegðun okkar mannanna. Því er beinlínis rangt að segja að kynlíf byrji við x aldur! Stingur æ oftar í augun hvað það er skringilegt orðalag!

Það sem átt er við er að 15,6 ár sé meðaltalsaldur gagnkynhneigðra unglinga við fyrstu leggangasamfarir. Enn meira upplýsandi væri að nota miðgildistölu, þ.e. á hvaða aldri flestir unglingar eru þegar þeir prófa fyrst þessa kynlífsathöfn.

Í þessum fyrirlestri tek ég annan vinkil á umræðuna um karlmennskuna og fjalla aðallega um mennskuna.

Örlar á smá réttlæti í þessu landi þrátt fyrir allt?

Ég trúi þessu varla.

Þjáningabræður og systur senda hvort öðru núna hamingjuóskir á bloggi, fésbók og með tölvupóstum!

Og lögfræðingurinn var að senda hamingjuóskir til okkar.

Nú fær maður kannski smá vinnufrið.

Á árlegum fræðadögum Heilsugæslu höfuðborgarsvæðisins verður m.a. þemadagskrá um kynverund barna og unglinga.

Þar verða flutt ýmis áhugaverð erindi sem eiga erindi við starfsfólk Heilsugæslu höfuðborgarsvæðisins og reyndar fleiri. Sjálf flyt ég tvo fyrirlestra; einn um heilbrigðan kynferðisþroska barna og unglinga og annan um ákveðna aðferð við að ræða og meta hvort um eðlilega kynhegðun sé að ræða meðal barna og unglinga.

Það má nefnilega ekki gleyma að gera ráð fyrir heilbrigðum og eðlilegum kynferðisþroska hjá þessum aldurshópum. Það kann ekki góðri lukku að stýra að gera ráð fyrir að flest kynhegðun barna og unglinga sé varasöm nema annað sé sannað. Það er álíka slæmt og að gera ætíð ráð fyrir því versta í samskiptum fólks nema annað komi í ljós.

Stöðugar fréttir af misnotkun og ofbeldi í kynferðislegum farvegi á börnum og þeim sem minna mega sín geta því miður gert að verkum að fagstéttir, foreldrar og forráðamenn hafa veigrað sér við því að fjalla um ofangreint viðfangsefni; heilbrigðan kynferðisþroska barna og unglinga.

Það er komin tími til að setja upp „ný gleraugu“. Í bókinni minni skrifaði ég m.a. kafla um ofangreint viðfangsefni.

Steve Jobs er allur. Blessuð sé minning hans.

Árið 2004 greindist hann með briskrabbamein. Ári síðar flutti hann þessa frábæru útskriftaræðu í Stanford háskólanum í Bandaríkjunum.

Ég bið lesendur að gefa upp fullt nafn ef þeim langar að koma með athugasemdir á bloggið mitt, í það minnsta gefa upp nafn á innra athugasemdakerfinu.

Mig langar ekki að eiga orðastað við þá sem vilja ekki standa með skoðunum sínum.

Þeim athugasemdum er hent út eins og skot!

Hvarvetna sem ég kem hristir fólk höfuðið yfir sýndarmennsku Jóhönnu, Árna Páls og annarra í ríkisstjórninni.

Það hristir höfuðið þegar stjórnvöld halda því blákalt fram að mikið hafi verið gert fyrir lántakendur.

Hið sanna er að lántakendur eru látnir bera, af fullum þunga, afleiðingar forsendubrest lána. Og verðtryggingarhryllingurinn æðir áfram.

Það er enn ekki búið að leiðrétta þennan forsendubrest. Sama hvað reynt er að halda öðru fram.

Afleiðingin er sú að fólk skynjar ekki að það búi í réttlátu samfélagi. Og það er ekki uppskrift að farsælu sam-félagi.

Þess vegna var Austurvöllur troðfullur í dag.

Þegar alþingismenn gengu yfir í Dómkirkjuna rigndi eggjum yfir þá. Meirihluti fólksins á Austurvelli lét það hins vegar eiga sig, þar á meðal ég.

Ef alþingismenn hysja ekki upp um sig brækurnar og sýna í verki að þeir eru í umboði þjóðarinnar en ekki fjármálakerfisins mun grassera um sig áframhaldandi gremja. Það er ekki gott.