Ég komst ekki hjá, frekar en aðrir Eyjulesendur, að reka glyrnurnar í skrif Svans Sigurbjörnssonar læknis um „Djúsdagafokk“ eða „detox/afeitrunarprógramm“ Jónínu Benediktsdóttur og fleiri hafa lagt orð í belg.
Eins og ég hef áður sagt er ég alls ekki að segja að allt sem flokkast undir „nýaldarkenningar“ eða „óhefðbundnar“ (ekki „vestrænar“) lækningar sé slæmt, enda hef ég sjálf fengist við slíkar lækningar. En það er hörmuleg staðreynd að margir sem kenna sig við „alternative“ lækningar, gera út á örvæntingu og fávisku fólks.
Ég er alls ekki að segja að Jónína sé að gera það; ég veit að hún meinar vel og hefur hjálpað mörgum að öðlast betri heilsu og trúir fullkomlega á það sem hún er að gera og eins og hún segir, það skaðar sennilega engan að éta grænmeti í tvær vikur (það er hið besta mál) og fá nokkrar „nútíma-ristilskolanir*“ (sjá athugasemd). Ég hef ekki átt þess kost að fara á „djúsdaga“ (ég hef hins vegar farið í „ristilhreinsun“ og það var hryllilega óþægileg reynsla sem þyrfti að borga mér fyrir að endurtaka), en samkvæmt vefsíðunni gengur prógrammið út á afar stífan „kúr“ eða „mataræði, sem er að mestu lífrænt ræktað grænmeti og ávextir (um 500 hitaeiningar á dag)“ heilbrigðri hreyfingu (gönguferðir og létt leikfimi), sogæða- og bólgueyðandi nuddi, gufuböðum, hvíld og slökun.“ Fyrir komuna, skilst mér á vefsíðunni, þarf einnig að drekka ákveðna detox drykki sem „sjúklingurinn“ þarf að kaupa í ákveðnum verslunum.
Það segir sig auðvitað sjálft að éti maður grænmeti og ávexti (ekki meira en 500 hitaeiningar á dag) og fari í göngur þrisvar á dag, þá MUN maður léttast, hvort sem maður borgar ISK 300,000 eða 170,000 fyrir það eða ekki. Hið sama á við um „hreinsun“ líkamans með fæðuvali – ef maður leggur áherslu á að neyta hollrar fæðu (fiskur, grænmeti, gróft korn, ávextir) og hættir að láta ofan í sig djúpsteikta kjúklingabita og franskar, pulsur með öllu, bjór og brennivín (alkóhól er t.d. eitur) o.s.frv., sem leggur mikla vinnu á lifrina, hreinsunarlíffærið, þá mun líkaminn þakka manni í formi betri heilsu, aukinnar vellíðunar og betra útlits, og aftur án þess að maður þurfi að borga neitt sérstaklega fyrir það eða að um kraftaverk sé að ræða. Þetta er bara heilbrigð skynsemi.
Það þarf ekki súperbrain til að sjá að manni mun líða vel eftir nokkurra daga eða vikna hvíld, nudd, slökun, hreyfingu og hollan mat og það er hið besta mál ef fólk hefur efni á því að fara í svona „spa“ meðferð í einhvern tíma – oft þarf fólk á aðstoð að halda við að breyta um lífsstíl og svona meðferð getur verið spark í uh, rassinn á mörgum til að koma sér af stað. Kínversk læknisfræði (TCM, eins og mér a.m.k. var hún kennd) mælir hins vegar ekki með jafn drastískum aðferðum og hér eru viðhafðar, að minnka hitaeiningafjölda niður í 500 hitaeiningar á dag og djúskúrar eru ekki vel séðir. Þetta fer í bága við „yin og yang“ fílósófíu þeirra kenninga, sem ganga út á að helst skuli leitast við að leita jafnvægis; góð heilsa er jafnvægi og við meðferð á einnig að hafa jafnvægi að leiðarljósi.
Ég man reyndar vel eftir heitum umræðum úr náminu um kúra af þessu tagi og bætiefni alls konar og skoðanir voru skiptar rétt eins og hér, en kennararnir sátu fastir við sinn keip. Um „ristilskolun“ eða stólpípur sagði einn kennarinn, „Ég er með nokkra sjúklinga sem svo er komið fyrir að þeir geta ekki lengur komið frá sér kúkssparði nema þeir fái stólpípu (ég veit að hann var að tala um „nútíma-ristilskolanir“) í rassinn.“ Hann bætti því við að það sem honum fyndist verst í þessu væru öfgarnar, fólk teldi þetta vera allra bóta mein, en endaði svo með að eyðileggja eðlilegan „elimination mekanisma“ líkamans.
Ég er því sammála; að halda því fram að meðferðin geti „læknað“ öll þau mein sem á síðunni eru listuð eru óheiðarlegar staðhæfingar í besta falli og brot á lögum í versta falli: „Dæmi um mál sem landlæknir lítur alvarlegum augum er ef aðili sem stundar óhefðbundnar lækningar villir á sér heimildir. Einnig ef slíkur aðili beitir hættulegum aðferðum, heldur fram ósönnuðum áhrifum, heldur fólki frá hefðbundnum lækningaaðferðum, til dæmis með því að ráðleggja fólki að hætta hefðbundinni lyfjameðferð eða er augljóslega að hafa fólk að féþúfu.“ Haukur Valdimarsson heimilislæknir og aðstoðarlandlæknir, Læknablaðið, 3.tbl. 2002.
Auk Jónínu, sem er íþróttakennari að mennt, starfa með henni hjúkrunarfræðingur og læknir frá Póllandi, Agneska Lemanczyk, sem detox.is segir að sé „virtur læknir í Póllandi“ ((“hámenntaðurr innkyrtlasérfræðingur“ (sic) segir í umsögn eins þátttakanda)). Ég sendi Jónínu póst þar sem ég sagði henni að ég hyggðist skrifa um þetta og bað hana að senda mér frekari upplýsingar um prógrammið ef hún vildi (hún benti mér á vefsíðuna), ásamt CV (curriculum vitae) Dr. Lemanczyk, en hef hvorugt fengið.
Ég leitaði að upplýsingum um Dr. Lemanczyk – ef hún er „virtur læknir“, „virtur innkirtlasérfræðingur,“ bjóst ég við að finna einhvers konar umfjöllun um hana, ef til vill faglegar greinar eftir hana, upplýsingar um sérnám hennar, við hvaða háskóla hún hefði lært, starfsnám á hvaða spítala – en það eina sem ég fann um hana fyrir utan auglýsingasíður frá detox-klíníkum var nafn hennar á þessum lista á Kościerzyna Hospital: „Agnieszka MD Lemańczyk, younger assistant – rezydentka.“
Ég fékk loks póst frá Dr. Lemanczyk þar sem hún spurði hvers vegna, „í hvaða tilgangi,“ ég vildi CV hennar sem ég og sagði henni og ég hef ekki heyrt orð frá henni síðan. Mér finnst eðlilegasti hlutur í heimi að fólk sem er að selja almenningi ákveðnar vörur eða þjónustu - tala nú ekki um ef það er eitthvað sem snertir heilsu og líf almennings - sé tilbúið að veita upplýsingar um sig sjálft (flestir eru reyndar æstir í það), en ástæðan fyrir minni upplýsingaleit er sá augljósi hluti af góðri blaðamennsku að afla sér upplýsinga um það sem maður er að skrifa um.
Holl fæða, hreyfing, hvíld – þetta er undirstaða góðrar heilsu. Hafi maður vanrækt þetta munu afleiðingarnar skila sér fyrr eða síðar í hinum ýmsu sjúkdómum, sem miserfitt er að lækna, en þeir verða yfirleitt ekki þurrkaðir út á nokkrum vikum með matarkúrum og „nútíma-ristilskolunum.“ Ef þetta væri allra bóta mein, hvers vegna er það fyrst nú á síðustu árum að meðalaldur fólks á vesturlöndum er að nálgast heila öld?
Fólk vitnar oft með andakt í “ævigamlar náttúrlegar læknismeðferðir,“ þ.á.m. stólpípur, sem menn hafa verið að setja í rassinn á sér í mörg hundruð ár, til stuðnings lækningamáttar þeirra, en staðreyndin er sú að meðalaldur fólks fyrir tilkomu nútíma læknavísinda, þ.e. fram á 20. öld, var langt innan við 40 ár. Egyptar álitu saur vera orsök flestra sjúkdóma í líkamanum og notuðu mikið stólpípur og hægðalyf. Þeir álitu heilann líka vera ómerkilegt líffæri og töldu ekki ástæðu til að varðveita hann við líksmurningana sem þeir eru frægir fyrir.
Ummæli (36)
Sigrún // 1.11 2009 kl. 21:18
Vildi minna sérstaklega á að framfarir hvað varðar heilsufar og langlífi er lítið að þakka nútíma læknisfræði.
Eins og alkunna er og viðurkennt, er bætt heilsufar undanfarna áratugi fyrst og fremst vegna framfara í hreinlæti, mataræði, umhverfi og aðstæðum fólks og þar með bættum lífsháttum almennt.
Læknisfræðin er dýrmæt en hún í og fyrir sig hefur ekki mest áhrif á bætt heilsufar og lífslengd.
Örn // 1.11 2009 kl. 22:01
Það voru ekki síst læknar sem börðust fyrir bættu hreinlæti ( t.d. Guðmundur Hannesson læknir ) og gera enn
- betra mataræði
- og bættum aðstæðum fólks hér áður fyrr
- Við eigum þeim mikið að þakka og einnig læknisfræðinni –
Þetta stólpípudæmi er bara enn eitt dæmið hversu auðvelt er að glepja fólk t.d. bara með nafninu “ detox “
Gleymum þessu ekki
Íris Erlingsdóttir // 1.11 2009 kl. 22:37
Sigrún: Takk fyrir þína athugasemd. Fólk dó úr sjúkdómum sem okkur þykja smámál í dag vegna þess að við höfum sýklalyf og bólusetningar, þökk sé nútíma læknisfræðum. Handþvottur, ein mikilvægasta „uppgötvun“ læknisfræðinnar http://www.waterandhealth.org/newsletter/new/feb-1998/right.html og hollt mataræði skipta auðvitað höfuðmáli, en þegar „patógeninn“ hefur komið sér fyrir í líkamanum er alveg sama hvað maður þvær sér oft um hendurnar.
Sigurður Páll // 1.11 2009 kl. 22:51
Mig vantar segularmband og snákaolíu.
Vitið þið hvort Jónína Ben. selur það líka?
Eða kanski það verði á boðstólum hjá Jóni Geraldi Sullubergi…
Jónína Ben // 2.11 2009 kl. 00:24
Blaðamaðurinn ætti að kynna sér betur muninn á nútíma ristilskolun og stólpípum. Blaðamaðurinn skrifar síendurtekið að ég stundi stópípur á viðskiptavinum mínum. Það er eins og allt annað sem frá henni fer í þessari grein bull og vitleysa. Ég býð ekki upp á stólpípur.
Ég er að gera hér mjög góða hluti og hér býð ég fólki upp á hámarks þjónustu og ef þú Íris færð nautn af því að rífa niður ævistarfið mitt í 29 ár þá máttu vel njóta. Ég tek ekkert mark á þínum skrifum héðan í frá.
Jónína Ben // 2.11 2009 kl. 00:27
Annað þú skrifar að þú eyðir skítkasti. Ég held þú ættir að eyða þessari grein þinni í heild sinni.
Allt sem ég tel upp á heimasíðunni get ég sannað fyrir þér að virkar í meðferðinni. Þú bara veist það ekki. Líkt og hefur þú komið til Álandseyja ? Svar: Nei
En trúir þú því að þær séu til ?
Íris Erlingsdóttir // 2.11 2009 kl. 01:00
Íris Erlingsdóttir // 2.11 2009 kl. 00:55 (Breyta)
Ég veit vel hvað “nútíma ristilskolun“ er, Jónína og þó útbúnaðurinn sé annar og fullkomnari en var fyrir 100 árum er hugmyndin sú sama (mér er ánægja að taka út orðið “stólpípa” og setja “nútíma-ristilskoðun” í staðinn, ég sá að þú reyndar notaðir orðið “stólpípa” sjálf í einhverri athugasemd á netinu).
Ef þú getur sannað að meðferðin lækni eða “virki á “Umframþyngd, maga- og ristilsjúkdómum, hjarta- og æðasjúkdómum, gigt, liðagigt og vefjagigt, kvíða, stressi og svefnleysi, þunglyndi, ofnotkun lyfja, sykursýki II, húðsjúkdómum, eituráhrifum, sýkingum o.fl.”, þá endilega gerðu það. Ég vænti þess að sannanirnar séu í formi rannsókna sem hafa verið gerðar á ákveðnum markhópum yfir ákveðinn tíma, þ.e. að t.d. X árum eftir meðferðina sé viðkomandi sjúkdómur með öllu horfinn hjá ákveðnum fjölda sjúklinga.
Ég, og áreiðanlega allur hinn vestræni heimur, mun bíða spennt eftir að lesa um að loksins er komin lækningameðferð við sykursýki, hjarta- og æðasjúkdómum, alkóhólisma, eiturlyfjafíkn, geðsjúkdómum, o.fl. o.fl. Ég skil annars ekki að Dr. Lemanczyk skuli ekki vera búin að skrifa um þetta í New England Journal of Medicine, synd að halda þessu frá umheiminum.
Ég fæ ekki séð hvernig mín gagnrýni á “nútíma-ristilskolun” jafngildir “niðurrifi ævistarfs” þíns. Það virðist a.m.k. ekki vera hörgull á fólki sem trúir á lækningamátt þess. Þú hefur ef til vill ekki lesið alla greinina: “ég veit að hún [Jónína] meinar vel og hefur hjálpað mörgum að öðlast betri heilsu og trúir fullkomlega á það sem hún er að gera.” Ég biðst afsökunar á að hafa sagt þetta; eins og þú segir sjálf hlýtur það að vera “eins og allt annað sem frá henni [Írisi] fer í þessari grein bull og vitleysa.”
Jónína Ben // 2.11 2009 kl. 07:29
Pólsku læknarnir sem rannsaka detox hafa báðir sagt við mig að þær þori ekki að birta nokkuð um detoxið af ótta við að vera drepnar af lyfjafyrirtækjunum.
Ristilskolkun er allt annað en stólpípa.
Telur þú að þú sért virtur blaðamaður ?
Báðir þessir læknar sem ég vinn með eru virtir læknar. Fólk streymir til þeirra í virðingu fyrir þekkingu þeirra reynslu, áræðni og árangri. Það dugar mér. Þær hakka ekki niður störf annarra, setja sig í dómarsæti, né upphefja sig á kostnað annarra. Þær rakka ekki niður það góða sem fólk gerir, hvað þá sem heil þjóð gerir. Þær vinna í jákvæðninni.
Rannsóknin mín er áhugaverð, þér er velkomið að koma á næsta fyrirlestur hjá mér ef þú vilt kynna þér niðurstöðurnar. Nei rannsókn þarf ekki að vera ómarktæk þó svo að hún taki ekki ár. Það er rangt hjá þér.
Hefur þér dottið í hug að skrifa um rannsóknir lyfjafyrirtækjanna ? Svanur vinur þinn sem þú vitnar stöðugt í vegna detox meðferðar minnar getur örugglega frætt þig mikið um afleiðingar þess að fólk er á 15 tegundum af lyfjum. Það hljóta að liggja að baki áratuga rannsóknir á þeim kokteil. Íris þú ert á villigötum. Skrifaðu í jafnvægi um hlutina og gagnrýndu detox með rökum. Það gæti ég gert t.d. Eins og það að við ketosu framleiðum við asinton sem þarf að skola út. Þetta er stærsta áhyggjuefnið í tengslum við detoxmeðferðina. En nú argaþrasast ég ekki lengur við þig. Ekki rífa niður Ísland eða Íslendinga á alþjóðavettvangi. Það er nóg komið. Já það er fullt af fólki sem kemur aftur og aftur í detox. Af hverju ?
Linda María // 2.11 2009 kl. 08:36
Jónína: ,,… Já það er fullt af fólki sem kemur aftur og aftur í detox. Af hverju ?´´
Ég[LM] hallast að því að svarsins geti verið að leita í tilvitnun sem kemur fram í texta Írisar ,,Meira um dítox´´.
“Ég er með nokkra sjúklinga sem svo er komið fyrir að þeir geta ekki lengur komið frá sér kúkssparði nema þeir fái stólpípu´´
Fullorðnu (andlega heilu) fólki hlýtur að leyfast að láta blekkja sig en ég kýs , eftir að hafa reynt hvort tveggja, að brúka ,,frjálsa aðferð´´ við úrgangslosun, enda er það list sem við höfum leikið frá fæðingu.
Jónína Ben // 2.11 2009 kl. 08:51
http://www.detox.is/img/rakel_vikurfrettir.jpg
Helga Möller // 2.11 2009 kl. 11:30
Góðan daginn!
Ég má til með að leggja orð í belg í þessa umræðu. Ekki það að ég sé einhver sérfræðingur í þessum málum , þá er ég i detox meðferð hér hjá Jónínu og kann því vel. Hér er allt til fyrirmyndar, starfsfólkið fullkomlega reyslumikið, maturinn eldaður af ástríðu og meðferðirnnar frábærar….hvar sem á er litið.
Í nútíma samfélagi er fólk að leita að lausnum og ein lausn hentar þér og önnur mér. Ég hef hitt fjöldan allan af fólki sem kemur hér aftur og aftur vegna þess hve vel því líður og þakkar þessari meðferð bætt lífsskilyrði.
Við höfum val og það er okkar að velja.
Þórhallur Ólafsson // 2.11 2009 kl. 12:14
Þeir sem muna eftir þáttunum The Truth about food, sem voru sýndir á Rúv muna eflaust eftir þættinum um Detox meðferðina.
sjá link.
http://www.bbc.co.uk/sn/humanbody/truthaboutfood/young/detox.shtml
Auðunn Gunnar Eiríksson // 2.11 2009 kl. 14:10
Áhugaverð grein. Nú veit ég ekki hvort Jónína les þetta eða ekki en þá verð ég að gagnrýna röksemdarfærslu Jónínu. Jónína á að vita það að til þess að vera talin trúanleg þá verði maður að koma með einhverrjar sannanir á því að hlutinir séu að virka eins og lofað er. Það þýðir ekki að benda á eitthvað viðtal við einhver hjón sem fannst voða fínnt að vera í spa.
Það er enginn að segja að þetta sé ekki flott aðstaða og að Jónína sé að gera þetta illa. Held að það megi alveg bóka það að þetta er gert eins vel og hægt er. Enda er ekki verið að gagnrýna það. Heldur það hvort þetta virki í raun og veru. Það getur vel verið að fólki fynnist það hafa það mikið betra eftir svona meðferð en hversu lengi endast þessi áhrif t.d.? Það alvitað bæði innan læknisfræðinnar og fleiri fræðigreina hið svokallaða placebo áhrif. Sumir hafa talið sig læknast af hinum ýmsu kvillum með því einu að taka inn magnyl töflur. Þannig að jú Jónína þú þarft að hafa langtíma rannsóknir.
Hvernig ætlastu til þess að fólk trúi því að læknari þori ekki að koma fram með einhverjar kenningar af hræslu við viðbrögðunum. Ef það er hægt að sýna fram á þetta með rökum og staðreindum þá er voðalega erfit að mótmæla því.
Guðmundur Guðmundsson // 2.11 2009 kl. 14:12
Það er auðvitað að bera í bakkafullan lækinn að argaþrasast út af Jónínu, en þessa staðhæfingu hennar er bara ekki hægt að láta í friði:
„Skrifaðu í jafnvægi um hlutina og gagnrýndu detox með rökum. Það gæti ég gert t.d. Eins og það að við ketosu framleiðum við asinton (sic) sem þarf að skola út.“
Ketósa er ástand sem skapast í líkamanum við föstu (sultarviðbragð) og við dekarboxyleringu myndast aceton, sem er jú vissulega eitrað – ef þú drekkur það. Líkaminn sér hins vegar ágætlega fyrir því litla magni sem myndast með því að skilja það út í andardrætti og þvagi.
Jónína er sem sagt að ýta undir ketósu með sínu kukli og ætlar svo að hreinsa það út úr fólki með því að skola því út úr ristlinum þar sem það er ekki að finna!
Íris Erlingsdóttir // 2.11 2009 kl. 14:56
Jónína: Ég hef aldrei haldið því fram að ég sé „virtur blaðamaður“ eða „virt“ eitthvað “ eða „þekkt“ eða „reynd“ í einu né neinu.
Þú segir: „Rannsóknin mín er áhugaverð, þér er velkomið að koma á næsta fyrirlestur hjá mér ef þú vilt kynna þér niðurstöðurnar.“ Ég á þess ekki kost að fara á fyrirlesturinn hjá þér, sem er einmitt ástæðan fyrir þvi að ég hafði samband við þig áður en ég skrifaði stafkrók um þetta og bað þig að senda mér fleiri gögn um meðferðina, en þú bentir mér á vefsíðuna. Þér hefði verið í lófa lagið að senda mér niðurstöður þinna rannsókna þá ef þú vildir að ég sæi þær.
Björn S. Lárusson // 2.11 2009 kl. 17:52
Guðmundur Guðmundsson er með athyglisvert innlegg og skýringin á vellíðan eftir dítoxið er líklega þessi (tilgáta): Ef þu sveltir líkamann í hálfan mánuð og innibyrðir 500 hitaeiningar, skolar með stólpípu reglulega og drekkur bara jukk þá hlýtur líkamanum að líða vel þegar hann loks fær almennilegan hollan mat á eftir. Rétt eins og maður sem kemur úr eyðimörkinni eftir að hafa liðið þorsta í einhvern tíma.
Svanur Sigurbjörnsson // 2.11 2009 kl. 18:04
Sæl Íris
Fín grein hjá þér og gott framtak að reyna að fá einhver gögn frá Jónínu og pólska lækninum. Enn og aftur kemur það fram að Jónína og pólsku læknarnir hennar hafa ekki neinar rannsóknir til að styðja við detox tilgáturnar. Þessi saga Jónínu um ótta pólsku læknanna við lyfjafyrirtækin er hreint hlægileg og ef að Jónína trúir henni, þá sýnir hún hversu auðtrúa hún er. Annað hvort ljúga þessir „læknar“ að henni (efast reyndar um að þeir séu læknar) eða hún lýgur þessu að okkur.
Þessi lygasaga „læknanna“ þjónar þrennum tilgangi. Í fyrsta lagi gefur hún í skyn að það sem þeir séu að gera sé það öflugt að fólk geti farið af lyfjum og í öðru lagi skapar lygasagan fína afsökun og flóttaleið fyrir þá gagnvart þeirri sjálfsögðu kröfu að þeir sýni alvöru rannsóknir til sönnunar á ágæti meðferðarinnar. Í þriðja lagi skapar sagan drama sem laðar fólk að.
Flott con-art.
Ég hef einnig leitað upplýsinga um þessa meintu lækna og hef ekki fundið stafkrók um rannsóknir frá þeim í gagnagrunnum læknisfræðinnar. Staðan er:
Íris 10 : Jónína Ben 0
Kristján Kristjánsson // 2.11 2009 kl. 18:30
Einu rökin sem hægt er að nota í þessari umræðu þyrfti að byggja á vitnisburði þeirra sem hafa reynt meðferðina alla. Það er augljóst að Íris er hér eins og aðrir niðurrifs bloggarar, að hrópa út fordómum sínum sem leiðir eingöngu til sönnunar á eigin fáfræði. Ef aðeins helmingur gagnrýnisbloggara hefðu upplifað málin áður en til gagnrýni kæmi þá væri þessi bloggheimur kannski örlítið trúverðugari. Íris verður náttúrulega að gera sér grein fyrir að hún er ekki að blaðra í lokuðum saumaklúbbi, hún er að tjá sig við allan heiminn, því allur heimurinn hefur aðgang að hennar orðum. Því væri ábyrgt af henni að skrá sig í meðferðina, upplifa hana og tjá sig útfrá eigin reynslu. tökum dæmi: Ég missti af tónleikum með ákveðinni hljómsveit en mér skilst að þeir hafi verið leiðinlegir, get ég þá útfrá eigin skynsemi, takandi ábyrgð á eigin orðum, tjáð mig um hve leiðinlegir tónleikarnir voru? Nei, þá væri ég vissulega að niðurlæga mínar skoðanir, minn smekk og mitt sjálfstæði.
Að lokum, ég er fullorðinn og ég þarf að taka ábyrgð á eigin orðum, rétt eins og þið öll.
Björn S. Lárusson // 2.11 2009 kl. 18:34
Gott hjá þér Svanur.
Íris – með skrifum þínum ertu að vega að fjárhagslegum grundvelli Jónínu Ben en ekki heiðri eða starfi. Fjárhagslegur grundvöllur byggir á (of)trú fólks á því sem hún er að gera.
Nákvæmlega það sama og þegar ég gagnrýndi Herbalife. Það var hraunað yfir mig með sömu rökleysunni og Jónína beitir þig. Ég var nefnilega að vega að fjárhagslegu öryggi píramýdasölu en ekki efninu sem slíku sem ég hafði engar forsendur til að meta. Það eina sem Jónína er beðin um og svarar aldrei er; hvaða vísindaleg gögn styðja meðferðina?
Af hverju er enginn Íslenskur læknir fáanlegur til að taka undir að meðferðin virki? Líklega vegna þess að engar vísindalegar rannsóknir styðja það auk þess sem engin gögn hafa verið birt um pólska lækninn (feluleikur).
Við vorum með pólska lækna við byggingu álvers Alcoa á Reyðarfirði og þeir þurftu að sanna réttindi sín fyrir landlækni. Það var nóg af skottulæknum í Póllandi sem vildu koma en gátu ekki sýnt fram á réttindi. Svo er með þennan pólska lækni Jónínu á meðan hún sýnir ekki fram á menntun og reynslu (CV).
Ari Kolbeinsson // 2.11 2009 kl. 19:09
Íris, leyfðu Jónínu að vera reið, sár og í persónulegu skítkasti.
Haltu þig frá því (meira að segja tilvitnunum í það sem hún hefur látið út úr sér) og einbeittu þér að faglegu niðurrifi á dítox bullinu.
Það er hægt að finna rannsóknir á mörgu því sem þessar meðferðir eiga að gera. Talaðu við einhvern sem kann að leita (og lesa) í gegn um alvöru rannsóknir, t.d. lækni eða líffræðing.
Góður hluti þess sem á að læknast af ristilskolunninni myndi brjóta í bága við alla líffræði, og einstaka sinnum eðlisfræði. Svo ekki sé minnst á heilbrigða skynsemi.
Annars er það nú ekki mín sérgrein, ég er meira í hlutum eins og afhverju fólk trúir skrýtnum hlutum, semn er mjög áhugavert og tengist þessum dítox/heilsu bransa sterkum böndum.
Jónína, ef skrif um þau vandamál og rökleysu sem hrjá bransa þinn eru „niðurrif ævistarfs“ þá þarf að hugsa aðeins út í á hverju það ævistarf er byggt.
Spyrjið þarmasérfræðing út í ristilskolun sem meðferð. Ég gerði það. Viðbrögðin voru afgerandi, rökföst og fræðandi. Svo ekki sé minnst á að þau voru byggð á skilningi á virkni mannslíkamans.
Björn S. Lárusson hér að ofan bendir líka réttilega á hversu vafasamir læknarnir hennar Jónínu eru.
Þar til réttindi þeirra eru staðfest (vísbending: fagmenn eru MJÖG glaðir að sanna réttindi sín) eru þeir vafasamir með meiru. Kannski eru þetta eðal réttindamenn. En Jónína þyrfti að sýna fram á það sér til stuðnings.
Og munið alltaf, það er ekki mitt að sýna fram á að þetta virki ekki, það er Jónínu að sýna fram á að meðferðin virki. Þar liggur sönnunarbyrðin í vísindum.
Jón H. Eiríksson // 2.11 2009 kl. 19:20
„Detox“ Jónínu Ben. er enn ein skyndilausnin fyrir ofalið nútímafólk.
Ég veit bara þetta um þá sem fara í „detox“ til að léttast:
Þetta er ekki að virka fyrir offitusjúklinga sem eiga við átraskanir að stríða. Eftir svelti kemur ofát. Ef fólk með ofáts átröskun getur vitnað um eitthvað þá er það þessi staðreynd: „Eftir svelti kemur ofát“. Og þá skiptir nákvæmlega engu í hvaða búning sveltið er klætt.
Mér finnst ólíklegt annað en að Jónína Ben. viti þetta innst inni og myndi viðurkenna ef einhver manndómur væri í henni. En Jónína Ben er í viðskiptum og gerir út á megrunariðnaðinn sem er uppfullur af skyndilausnum og húmbúkki.
There is no quick gratification!
Fólk ætti að hafa það í huga áður en það lætur plata sig í enn eina skyndilausnina.
Besservisser // 2.11 2009 kl. 19:39
Geturðu lagað insúlín háða sykursýki Jónína?
Stefán Vilberg Leifsson // 2.11 2009 kl. 20:07
„Allt sem ég tel upp á heimasíðunni get ég sannað fyrir þér að virkar í meðferðinni. Þú bara veist það ekki. Líkt og hefur þú komið til Álandseyja ? Svar: Nei
En trúir þú því að þær séu til ?“
„Pólsku læknarnir sem rannsaka detox hafa báðir sagt við mig að þær þori ekki að birta nokkuð um detoxið af ótta við að vera drepnar af lyfjafyrirtækjunum.“
Jónína, þakka þér kærlega fyrir að leyfa mér að hlæja aðeins, þú ættir kannski að byrja með einhverskonar hlátursmeðferð. Þú virðist vera hinn fínasti skemmtikraftur, hvort sem þú áttar þig á því eða ekki. Skilar líklegast meiri árangri en þetta detox þitt.
Iris Erlingsdóttir // 2.11 2009 kl. 20:39
Já Björn S. Talandi um Herbalife – þessi umræða mig á grein sem ég skrifaði fyrir nokkrum árum á Iceland Review online um Herbalife eftir að hafa lesið í íslenskum fjölmiðlum að 18 manns hefðu verið lagðir inn á sjúkrahús af völdum varanna, þar af 11 með lifrarbólgu. http://www.icelandreview.com/icelandreview/search/news/Default.asp?ew_0_a_id=262337
Viðbrögð lesenda létu ekki á sér standa og skiptust lesendur í andstæðar fylkingar – sumir þökkuðu fyrir greinina og aðrir úthúðuðu mér sem agent andskotans; að lokum varð ég að loka tölvupóstinum sem var tengdur við greinina vegna rætinna haturspósta frá sölufólki Herbalife.
Í greininni sagði ég frá því þegar mér var boðið að selja vörurnar á sama tíma og ég var í fjögurra ára erfiðu námi ((að læra „hefðbundnar kínverskar lækningar/Traditional Chinese Medicine“ þ.e. nálarstungur (sem margir álíta skottulækningar, en ég ætla ekki að fara út í þá sálma núna)) og jurtalækningar) í Los Angeles.
Ég hafði ekki áhuga á að selja þær vegna þess að mér fannst fyrirtækið (ekki frekar en flestir aðrir bætiefnasalar) ekki selja þessar vörur á ábyrgan hátt; mér fannst ekki rétt að hver sem er væri að selja fólki vörur sem hugsanlega gætu skaðað heilsu þess. Ekki endilega að vörurnar væru per se skaðlegar – ég ætlaði ekkert að leggja dóm á það – en jurtir eru ekki hlutlaus, „heilbrigð“ efni, bara vegna þess að þær eru „náttúrulegar“; einmitt vegna þess að jurtir hafa lækningamátt (vegna kemískrar samsetningar þeirra) verður að sýna aðgát í meðferð þeirra rétt eins og um lyf sé að ræða. Sumar jurtir geta haft stórskaðleg áhrif á fólk sem t.d. á við hjartasjúkdóma eða við of háan blóðþrýsting að stríða og margir „bætiefna“kúrar geta verið varhugaverðir svo ekki sé meira sagt fyrir t.d. sykursýkissjúklinga.
Svo mér fannst að fólk, sem ekki væri með a.m.k. lágmarks heilsu/næringarfræðimenntun, hefði hreinlega engan bisniss með að vera að selja jurtir og vítamín. Ekki frekar en ég ætti að setja upp skilti eftir helgarnámskeið í hjartalækningum eða telja mig færa að leggja rafmagn í húsið þitt eftir eitt Rafmagn-fyrir-idjót námskeið.
Við Íslendingar látum gjarna stjórnast af hjarðarhætti fremur en heilbrigðri skynsemi, eins og súpan sem við nú sitjum í eftir hrunið er dæmi um, og erum sérlega ginnkeyptir fyrir alls kyns snarfixum og silfurkúlulausnum. En eins og ég sagði hér, er yfirleitt auðvelt að þekkja slíkar lausnir. Þær ganga út á að gefa fólki, sem er vansælt, ráðvillt, á við veikindi eða erfiðleika að stríða, þjáist af lífsleiða, sífellt leitandi að grænni beitihögum, “leyndarmál”, markmið, skipulag/aga (í formi svitakofa, sérstaks mataræðis, “bætiefna,” lífsvenja) og láta það borga morðfjár fyrir það. Prangarinn, sem þarf að hafa sjálfstraust og sjarma, lofar breyttri og betri framtíð með orðum eins og “byltingarkennd, stórkostleg, árangursríkt, magnað…” og “Leyndarmálið” sem á að selja þér er líka “einfalt, auðvelt, fullkomið, svarið.” Skottulausnarboðinn býr yfir leyndarmálinu, en “þú ert ekki tilbúin/n ennþá…” en þú verður það og færð leyndarmálið aðeins eftir að þú hefur gengið í gegnum/keypt það sem verið er að selja.
Mikilvægur hluti af þessu er einnig að fabrikera upp ágreining eða deiluefni um eitthvað sem enginn ágreiningur er um í raun (t.d. mataræði, bólusetningar, þróunarkenningu) og draga fólk í dilka – “við” á móti “þeim,” (hinum heimsku, illu, óupplýstu, “óhreinu”) – því þeir eru ekki “frelsaðir” enn, eru ekki “in” á “leyndarmálinu” eins og “við.” Allri gagnrýni er svo svarað á einn veg: með persónulegu skítkasti á þá sem voga sér að vera ósammála.
Steinunn Rósa // 2.11 2009 kl. 22:31
Eina sem talað er um hér er stólpípu þetta og stólpípu hitt. Ef farið er inn á heimasíðu Detox þá sér fólk að það er val hvers og eins.
Ég hef farið til Jónínu og líkaði mjög vel. Við vitum öll að við þurfum að borða holt til að léttast eða líða vel. Hjá Jónínu var frábær fræðsla frá íslenskum grasalæknum og næringafræðing.
Ef heilsuhælið í Hveragerði er nauðsynlegt þá er þetta ekki síður nauðsynlegt. Þarna er farið yfir matarræði, hvíld, hreyfing, skemmtun og umfram allt þá gefur Jónína sér tíma með öllum þeim sem koma. Er þetta eitthvað ósvipað í Hveragerði?
Ég segi bara að fólk þurfi að prófa þótt það væri ekki nema eina helgi áður en það setur út á þetta.
Við þurfum mörg að fá aðstoð við að byrja og fræðslu þrátt fyrir að vita hvað á að gera.
Ég tala af reynslu minni og hvet alla til að fara til Jónínu og kynna sér þetta. Þessi aðferð er ekki að koma upp í dag. Jónína vill bjóða upp á þessa aðferð til að hjálpa þeim sem vilja breyta lífsstíl. Margt að því sem boðið er upp á hér á landi er ekki fundið upp hér heldur þorir einhver að fara af stað líkt og MC donalds.
Prófum áður en við gagnrýnum og umfram allt spáum í hvað þetta getur gert fyrir landið okkar. Aðstaðan er til fyrirmyndar og gæti selt mörgum útlendingum sæludaga á Íslandi. Ekki veitir okkur að. Stöndum saman íslendingar frekar en að rakka hvort annað niður.
kjarri // 3.11 2009 kl. 03:48
Ágæt grein. Ég ætla ekki að segja að þetta virki ekki (hef bara ekki hugmynd um það). Hins vegar fynst mér Jónína oft svara gagnríni með „skítkasti“. Hún kann ekki að taka á móti og meðhöndla gagnríni. Sem manneskja í viðskiptum að þá þarf hún að læra það og reyna að svara gagnríninni málefnalega án þess að úthrópa að fólk sé bara að eyðileggja fyrir henni og veit ekki neitt. Ættla samt ekkert að dæma um meðferðina (vil ekki dæma um eitthvað sem ég veit ekki neitt um). Þó virðist sem ýmislegt þurfi að fá svör við (eins og til dæmis um læknana). En auðvitað er þetta val fólsk og á meðan ekki er hægt að segja að meðferðin skaði fólk að þá ræður það sjálft í hvað það lætur sína peninga. Takk fyrir annars ágæta grein
Kjarri
http://www.thaiiceland.com
Sveinn Þórhallsson // 3.11 2009 kl. 09:46
Meiri vitleysan sem fólk leyfir að láta út úr sér sem rök fyrir detoxi.
Nokkrir telja upp reynslusögur og skora á gagnrýnendur að prófa áður en þeir gagnrýna. Þessir aðilar virðast ekki átta sig á að bæði þekkt lyfleysuáhrif og væntingar (e. confirmation bias) gera út af við vísindalegt vægi reynslusaga. Það skiptir heldur ekki neinu einasta máli hversu margar reynslusögur hægt er að koma með, 100 sinnum núll er ennþá núll.
Aðrir, þ.á.m. Jónína sjálf, reyna að höfða til þjóðerniskenndar gagnrýnenda. „Stöndum saman Íslendingar frekar en að rakka hvort annað niður“. Bíddu hvað á það eiginlega að þýða? Þvílík fjarstæða.
Ekki vottur af neinu máli detoxsinna til stuðnings. Þess vegna kemur þetta skítkast. Þess vegna er verið að reyna að höfða til tilfinninga (þjóðerniskenndar) fólks frekar en vitsmuna.
Komiði með vísindalegar rannsóknir sem sýna fram á jákvæð áhrif detox takk fyrir.
Annars mæli ég með góðri grein Svans Sigurbjörnssonar um detox sem má auðveldlega finna á netinu ef nafn hans er googlað.
Gunna // 3.11 2009 kl. 18:32
Sælir allir sem segja að maður verði að prufa til að mega segja nokkuð um málið…
Þessi rök heyrði ég hjá gömlum vinum í menntaskóla þegar þeir voru að reyna að sannfæra mig um að prófa e-töfluna, hass og önnur efni. Er ég þá að skilja rétt að ég hefði átt að prufa áður en ég ákvað að segja NEI vegna yfirgnæfandi gagna og vitneskju sem sagði mér að þetta væri slæmt fyrir mig? Það var greinilega algert bull að andmæla eiturlyfjum því ég hafði ekki prufað þau. Gott að fá þetta á hreint!!
Það er eitt sem hefur enn ekki komist á hreint hér í þessari umræðu sem ég væri til í að fá skýringu á; hver er munurinn á stólpípu og nútíma ristilskolun??
Í stólpípu er volgu vatni og annaðhvort olíu eða öðru efni blandað í vatnið sett í ristilinn á fólki gegnum stóra þykka slöngu- svo kúkar fólk. Hvað er gert í nútíma ristilskolun ??
Það virðist vera nokkuð sjálfsagt að sönnunarbyrgðin á virkni detox meðferðarinnar liggi hjá Jónínu. Ekki gegnum álit þeirra sem hafa prufað heldur samanlögðum gögnum úr gæðarannsóknum. Ef Jónína getur ekki birt þetta þá ber mér engin skylda til að trúa henni. Íris er í fullum rétti á að óska eftir þeim gögnum og gagnrýna þessa meðferð. Ef fólk þolir ekki gagnrýnini þá ber því að skoða í eigin barm.
kjellingin // 4.11 2009 kl. 15:45
Góð grein hjá þér Íris! Eins og einhver benti á hér að framan er auðvitað voða næs að vera í einhverjar vikur í nuddi, gönguferðum og að láta elda ofan í sig (þó það sé bara grænmeti og 500 hitaeiningar!)… og auðvitað léttist maður! Það er örugglega fínt út af fyrir sig ef fólk er tilbúið að borga allan þennan pening fyrir það. En málið er að þetta er bara ekkert auglýst sem „megrunar-eitthvað“ eða „vatnslosandi-þetta“ heldur sem afeitrun sem eigi að losa fólk við allskonar sjúkdóma og lyf sem fólk tekur vegna þeirra. Það held ég að sé hættulegra en 2ja vikna fasta.
Mér finnst að það eigi að vara fólk við þessu og ég vil bara að landlæknir taki á þessu.
Einar // 5.11 2009 kl. 18:27
Það eru ýmsar meðferðir í boði fyrir fólk sem þarfnast aðstoðar.
Fyrir áfengis og fíkniefnasjúklinga er boðið upp á t.d læknismeðferð sem lýsir sér í niðurtröppun með lyfjagjöf og síðan tekur við eftirmeðferð sem vinnur í andlega vandanum.
Detox virðist vinna mjög svipað. Þarna kemur fólk sem á við ýmiskonar vandamál, hvort sem það er vegna offitu eða hverju. Og þarna fær það ýmsa aðstoð. T.d hjálp við að komast á betra mataræði og síðan er það þessi ristilskoðun, sem eru skiptar skoðanir á árangri af því.
En ég þekki nokkrar manneskjur sem hafa farið í detox til Jónínu. Allir koma þaðan alsælir og líða mun betur.
Vægast sagt sérstakt að fólk taki það svona að sér að rífa niður hluti.
Hvaða hagsmunir hefur blaðamaður í þessu máli?
Eru þetta leiðindi, eða fór hún í detoxmeðferð sem ekkert hjálpaði henni.. eða hvað er málið? Afhverju tekur blaðamaður svona að sér að ráðast að detoxmeðferðinni og Jónínu?
Hvaða hvatir eru þarna?
Ef þetta hjálpar fólki og fólki líður betur eftir að það kemur þaðan, hvað er þá vandamálið? ég hef ekki séð að neinn sé að neyða fólk til að fara í þetta.
Furðuleg hegðun hjá blaðamanninum, sem og þessum Svani skottulækni.
Íris Erlingsdóttir // 5.11 2009 kl. 19:21
(Fólk hefur líka komið alsælt úr lobotómíum… eða „recovered-memory“ sálfræðimeðferðum! Tilgangurinn helgar sem sagt meðalið. „If it makes me feel good, then it must be good.“ Íslenska rökhugsunin klikkar aldrei.)
Í fyrsta lagi er hér um að ræða lögbrot. „Detox“ er auglýst sem allra handa lausn sem „vinnur á“ – og svo kemur hálf Merck handbókin á eftir. Þeir sem standa að Detox hafa ekki sýnt fram á neinar sannanir eða rannsóknir sem styðja þessar staðhæfingar, en jafnvel þó þeir gerðu það breytir það því ekki að íslensk lög (17. gr. l. 53. 1988) banna auglýsingar læknastarfsemi. Læknum er bannað að auglýsa nema bara rétt nafn, síma, heimilisfang o.þ.h. Jónína er ekki læknir, þannig að samkvæmt lögunum fellur slíkt athæfi undir 22. grein lagana um „skottulækningar.“ Læknirinn sem starfar með henni hefur heldur ekki leyfi landlæknis til að starfa á Íslandi, eins og 1. grein læknalaganna krefst. Ég veit að það er ís/lenska að gefa skít í lög og reglur og fólk getur haft alls konar skoðanir á lögum, þau séu asnaleg eða óréttlát, en svona eru lögin eigi að síður.
Í öðru lagi er þessi „Detox“ meðferð afar umdeild, bæði meðal „vestrænna“ lækna (sem langflestir fordæma hana) og meðal margra „óhefðbundinna“ eða „náttúru“ lækna, af ástæðum sem bæði ég og Svanur höfum lýst áður og ég ætla ekki að endurtaka hér.
Þeir sem taka stórt upp í sig (og brjóta lög) og lofa árangri sem öll samanlögð læknavísindi veraldarinnar hafa ekki geta komið upp með, gefa að sjálfsögðu tilefni til spurninga og gagnrýni. Að kalla slíkar spurningar og vangaveltur „leiðindi“ eða „rífa niður hluti“ eða „furðulega hegðun“ finnst mér bera vott um fáfræði og „furðulegan“ skort á rökhugsun.
PS: (Svanur „skottulæknir“? – ég geri ráð fyrir að þú munir bara skella þér í detox ef þú færð hjartaáfall eða magasár eða botnlangabólgu…)
Steinunn Rósa // 5.11 2009 kl. 22:33
Einhversstaðar var talaðu um að Jónína væri í svo mikilli vörn. Mér sýnist Íris vera komin í hana líka miðað við síðustu línur
.
Björn // 6.11 2009 kl. 12:08
Hmmm „af ótta við að vera drepnar af lyfjafyrirtækjunum“
Þessi lyfjafyrirtækji stóðu örugglega fyrir morðinu á JFK og þetta er allt eitt stórt samsæri……fjármagnað af útrásarvíkingunum
Þóra Kristín // 8.11 2009 kl. 00:19
Tek ofan hattinn fyrir þér Íris.
Að nýta sér neyð fólks rangt.
Ef fólk hefur neytt rangar fæðu og er komið í vandræði. Þá veit ég að leiðin út er nýr lífstíll, En allir hafa gott af því að komast sem næst fjöllum, í kyrrð og ró, í gott nudd og stunda innhverfa íhugun, já og lestur góðra bóka. Það vill svo til að hér á Íslandi eigum frábæra lækna, frábæra nuddara, sálfræðinga og geðlækna. Og yndisleg fjöll og margar frábærar bækur.
Mín persónulega skoðun er sú að í vel upplýstu samfélagi eru loddarar ekki lausnin
Það vill svo til að réttmæti gagnrýni á okkur sjálf og aðra passar örugglega í skárargatið og opnar leiðina að nýju og innihaldsríkara lífi.
Ólafur Sæmundsson // 15.11 2009 kl. 14:46
Sæl Íris og þakka þér fyrir faglega umfjöllun á dítox. Ótrúlegt að svona öfgar fái viðgengist í eins menntuðu þjóðfélagi og við íslendingar erum sífellt að stæra okkur af! Sem starfandi næringarfræðingur finnst mér t.d. hreint með ólíkindum að fólk skuli hafa sig í dítox-næringarmeðferð þar sem það sötrar grænmetis-/ávaxtasafa sem gefur aðeins 500 hitaeiningar daglega og það í tvær vikur. Sorglegt!
JB // 12.2 2010 kl. 20:03
1) þó mig langaði til að prófa detox þá er það mér algjörlega ómögulegt að borga meira en mánaðarleigu, jafnvel tvöfalda þá upphæð fyrir detox-helgi. Það þýðir samt ekki að við getum ekki lifað heilsusamlegu lífi
2) Ég veit ekki hvort þetta sé gott eða slæmt frá læknisfræðilegu sjónarhorni, en ég leyfi mér að efast um hollustu þess að svelta líkamann tímabundið (við þurfum á milli 1500-2500 kaloríur daglega)
3) Fólk þarf að finna milliveginn í sínu lífi, ekki fylgja tískubylgjum, það sem er gott og hollt núna gæti verið talið óhollt eftir 10 ár
4) svona heilsuhótel er ágætis leið til að koma erlendri mynt inn í landið, okkur veitir ekki af í dag
Rita ummæli