- Svartir straumar og annað kjaftæði -
Samkvæmt kenningunni um jarðarveiki (geopathic stress) eru svartir straumar (black streams) sem flæða eftir orkulínum jarðarinnar og mynda svokölluð jarðfræðileg streitusvæði. Straumarnir eiga að myndast vegna vatnsæða og steinefna í jarðveginum og eiga að hafa skaðleg áhrif á gróður, heilsu manna og dýra. Þeir sem aðhyllast hugmyndina vara fólk við því að búa þar sem svartir straumar flæða og sérstaklega að hafa rúmstæði sitt staðsett þar sem þeir krossast. Meintir rannsakendur svartra strauma (sem aðhyllast hugmyndina) segja að straumarnir valdi hjónaskilnuðum, krabbameinum, þunglyndi, hegðunarröskunum, gnístan tanna í svefni og svitaköstum, geðvonsku, pirring og nánast öllum sjúkdómum og geðröskunum sem greindar eru. Sem dæmi má nefna að gjarnan tala þeir um „krabbameinshverfi” og „krabbameinsgötur” þar sem orkumiklir svartir straumar eiga að liggja (Valdemar G. Valdemarsson, 2009).
Á Íslandi hefur nuddarinn Brynjólfur Snorrason rannsakað svarta strauma. Fljótlega eftir að hann tók að starfa við nudd fór hann að furða sig á því hversu margir þeirra sem fengu hjá honum góða bót versnuðu fljótt aftur. Brynjólfur rannsakaði húsakost þessa fólks og útskýrir afturför skjólstæðinganna með því að undir húsum þeirra liggi svartir straumar. Að hans sögn hefur hann þróað tæki, svokallaða spólu, sem eyðir áhrifum svörtu straumanna og myndbandsupptökuvél sem greinir jarðárur og orkusvið í umhverfi mannslíkamans (Valdemar G. Valdemarsson, 2009).
Í bókinni „Are you sleeping in a safe place?” (Valdemar G. Valdemarsson, 2009) eru sagðar reynslusögur af fólki sem á að hafa orðið veikt vegna svartra strauma. Höfundur bókarinnar missti son sinn úr krabbameini, en rétt fyrir andlát hans komst höfundurinn að því að rúm sonarins væri yfir svörtum straumum. Í bókinni er meðal annars sögð saga af stúlku sem greindist með hvítblæði í byrjun árs 1984. Stúlkan fór í lyfjameðferð og mergskiptingu og var síðan útskrifuð af spítalanum í nóvember sama ár. Þegar stúlkan kom heim til sín var hún látin sofa í rúmi móður sinnar og byrjaði henni jafnt og þétt að batna. Í byrjun mars 1985 flutti stúlkan í sitt eigið rúm og nokkrum vikum síðar fór hún í læknisskoðun og kom í ljós að henni hafði hrakað og hún væri dauðvona.
Í neyð sinni fékk fjölskyldan til sín „mælingarmann” sem komst að því að undir rúmi stúlkunnar krossuðust svartir straumar. Rúmið hennar var fært til og stúlkan var laus við hvítblæðið nokkrum mánuðum síðar (Valdemar G. Valdemarsson, 2009).
Kennslukonan Kathe Bachler gaf út bók sem nefnist „Discoveries of a dowser” (Valdemar G. Valdemarsson, 2009) en þar styður hún kenningar sínar um svarta strauma með reynslu sinni af þeim. Hún segist hafa komist að því að 95% barna sem eigi erfitt með nám megi rekja til þess að skrifborð þeirra í kennslustofunni séu yfir svörtum straumum. Við að færa skólaborðin til segir Bachler að börnin hafi náð betri árangri en áður í náminu.
Ennfremur segja þeir sem aðhyllast hugmyndina um svarta strauma að rannsóknir þeirra á fornum menningar-samfélögum, til dæmis í Kína og S-Ameríku, sýni að nánast aldrei hafi hús verið staðsett yfir svörtum straumum. Telja þeir að hér geti ekki verið um tilviljun að ræða (Mercola, 2000).
Þeir sem mæla svarta strauma notast gjarnan við pendúl, stálprjóna eða spákvist. Þegar notast er við stálprjóna á að halda á einum prjón í hvorri hendi, og á sá sem mælir að einbeita sér að neikvæðum straumum. Síðan á fólk að ganga rólega áfram og ef prjónarnir snúast er fólk búið að finna svarta strauma.
Önnur leið til að mæla svarta strauma á að vera að fylgjast með svefnhegðun ungra barna. Fylgjendur hugmyndarinnar segja að ung börn skynji hvort tilteknir staðir séu hættulegir heilsunni eða ekki. Ef ungbarn breytir um stellingu í svefni og hjúfrar sig saman öðru megin í rúmið getur það verið vísbendi um að svartir straumar séu undir rúminu (Mercola, 2000).
Rökin sem fylgjendur hugmyndarinnar um svarta strauma nefna eru flest á svipuðum nótum og dæmin hér að ofan. Dæmisögur af mjög veiku fólki sem batnar eftir að rúmstæði þeirra er fært til eru algengar. Slíkar dæmisögur skýra ekki neitt. Sá sem reynir eina meðferð getur ekki vitað hvað hefði gerst ef hann hefði gert eitthvað allt annað. Bati sem næst skyggir á alla aðra reynslu. Þannig er ekki vitað hvað hefði gerst hefði stúlkan með hvítblæðið sofið ennþá í rúmi móður sinnar. Gangur sjúkdóma er oftast í rykkjum, með slæmum og góðum tímabilum. Fólk leitar sér oft meðferðar þegar líðanin er verst. Þannig getur hvaða meðferð sem er virst bera árangur þrátt fyrir að vera gagnslaus því líklegast er að fólki skáni eftir að hafa liðið illa lengi (tölfræðilegt aðhvarf). Nuddarinn Brynjólfur Snorrason hefur ekki skilning á tölfræðilegu aðhvarfi og áttar sig ekki á því að skýra megi afturför kúnnanna með tölfræðilegu aðhvarfi í stað svartra strauma. Eða einfaldlega vegna þess að hann sé slæmur nuddari?
Bættan námsárangur nemenda Kathe Buchler má skýra á marga aðra vegu heldur en með svörtum straumum. Sem dæmi mætti nefna að líklegt er að Kathe hafi sýnt þessum nemendum meiri athygli, eftir að hún færði skrifborð þeirra til, sem gæti hafa aukið áhuga þeirra á náminu. Það er líka tekið fram að Kathe byggir hugmyndir sínar um svarta strauma á eigin reynslu en ekki raunprófunum.
Eins er það engin röksemdarfærsla að halda því fram að tilviljun geti ekki hafa ráðið röðun húsa í fornum menningarsamfélögum. Tilviljun gæti einmitt hafa ráðið því hvernig húsin röðuðust.
Notkun stálprjóna við að finna svarta strauma á rætur sínar að rekja til þjóðtrúar að finna megi vatn (olíu, gull og fleira) með því að ganga um jarðir haldandi á trjágrein og þar sem trjágreinin snúist í átt að jörðu sé vatn að finna. Fjöldi rannsókna hafa ítrekað sýnt fram á að þessi aðferð virkar ekki neitt til að finna vatn, eða aðra hluti, og líklegasta skýringin á því að prjónarnir snúist sé vegna handahreyfinga þess sem heldur á þeim (skepdic.com, 2004). Ég vil benda lesendum á myndskeið máli mínu til stuðnings, en myndskeiðið má finna á eftirfarandi vefslóð: http://www.youtube.com/watch?v=_VAasVXtCOI
Það er fráleitt að telja að svefnhegðun ungra barna sanni tilvist svartra strauma. Sá sem efast ekki um tilvist svartra strauma getur talið sér trú um að allskyns hlutir renni stoðum undir kenningar sínar án þess að nokkuð vit sé í þeim. Þetta er dæmi um slíkt.
Heimildir
Mercola, J. (2000). Geopathic stress. Sótt af internetinu þann 7. Febrúar 2009 af vefslóðinni http://articles.mercola.com/sites/articles/archive/2000/08/13/geopathic-stress.aspx
Skepdic.com (2009). Sótt af internetinu þann 7. Febrúar 2009 af vefslóðinni
http://www.skepdic.com/dowsing.html
Valdemar G. Valdemarsson (2009). Orkulínur. Sótt af internetinu þann 7. febrúar 2009 af vefslóðinni http://www.isholf.is/vgv/geopstr.htm
Höfundur: Brynjar Halldórsson
Þessi færsla var rituð
16. febrúar 2009 kl 10:13 og flokkuð undir Óflokkað.
Þú getur ritað ummæli, eða tilvísun frá eigin vefsíðu.
22. febrúar, 2009 kl 14:33
Þetta er allveg hreint ágætis grein. Saknaði svolítið að farið væri í grundvallar eðlisfræðilega misskilninginn bakvið þessar hugmyndir og útskýrt útfrá því afhverju þetta er kjaftæði. En það er svosem óþarfa vinna þegar um er ða ræða eitthvað sem er svona augljóslega rugl.
Gangi ykkur annars bara vel með þennan vef. Ég mun reyna að heimsækja ykkur reglulega.
23. febrúar, 2009 kl 17:25
Lifi baráttan gegn hindurvitnum og hjáfræði. Þetta er sannarlega þakkarvert framtak.
2. mars, 2009 kl 22:12
Ég skil vel að þú eigir erfitt með að skilja þetta fyrirbæri út fá þessu sjómarhorni.
Það átti ég líka í eina tíð. Það er áður en ég lenti sjálfur í óvæntri reynslu.
Þannig var að ég var ásamt öðrum manni að leita eftir rafmagnskapli í sumarbústaðalandi. Kapalinn hafði verið settur þarna og notaður fyrir mörgum árum síðan. En nú var hann ótengdur í báða enda og stóðu þeir upp úr jörðinni.
Okkur vantaði að finna kapalin ca. 1/3 frá endanum til að setja þar tengibox fyrir nýtt hús. Við höfðum grafið í ca. tvö tíma en fundum hann ekki, það fannst okkur mjög furðulegt því okkur var sagt að hann væri þarna.
Þá kom kona mín til okkar og hló innilega að okkur en bæti svo við, því færðu þér ekki tvo prjóna og beygir þá í vinkil. Ég veit að þú munt finna kapalinn strax með þessari aðferð sagði hún við mig mér til mikilar furðu.
Ég starði á hana furðu lostil og sagði að ég kynni ekki á svona og vissi ekki hvernig þetta væri gert. Hún hló bara meira og fór, kom svo aftur og hafði úrbúið svona prjóna og rétti mér. Ég sagði að hún gæti bara gert þetta sjálf úr því að hún væri svona viss.
En hún hélt nú ekki og sagði að ég væri rétti maðurinn til þessa ?
Ég tó við teinunum og velti vöngum yfir þessum furðulegheitum sem ég vissi lítið sem ekkert um. En ég hafði nú samt margsinnis reynt hana af að hafa rétt fyrir sér með svona skrítna hluti.
Ég gekk ca. 5 metra í norðvestur og setti upp spekingslegan svip hélt á prjónunum eins og ég hafði einhvertíman séð á mynd, kom svo gangandi rólega að skurðinum
og passaði vel að halla ekki höndunum til hliðar og viti menn allt í einu ruku prjónarni í sundur mér til mikilar furðu. ég bað Pétur að setja stein þarna og gekk svo ca. 5 mtr til suðaustur og endurtók leikinn og viti menn það sama gerðist á sama stað.
Ég var nú orðin verulega forviða, en fór aftur ca.: 5 mtr í vestur og nákvæmlega það sama endurtók sig aftur. alltaf hló konann mín að mér og glotti mikið.
Jæja grafið þið þarna sagði hún, en þetta var ca. 1/2 metra frá þeim stað sem við vorum búnir að vera að grafa nokkru áður en vorum komnir á aðra skoðun og farnir að grafa þar þegar ballið byrjaði hjá henni. Viti menn þarna fundum við blessaðan kapalinn beint undir steininum góða. Til að gera langa sögu stutta þá velti ég mikið vöngum yfir þessu og gat alls ekki skilið. En síðan gerðist það smásaman með ransóknum (tilraunum) og margskonar pælingum að ég hef fundið út að þetta hefur ekker með eðlisfræði að gera eða aðrar raunvísindis hugsanir. þetta er algjörlega andleg fyrirbæri. Og því er líkaminn eina mælitækið sem virkar.
Útskýrir það kannski hvers vegna menn eru svona mistækir þarna því þeir vita ekki hvernig og hversvegna þetta virkar stundum. en ég glópaðis á réttu skilyrðin og hugsunina þarna í þetta sinn. Það veit ég nú. Síðan eru liðin mörg ár og hefur mér tekist að útvíka þetta fyrirbæri með mikilli leit og margskonar tilraunum sem ég ætla ekki að fara nánar út í. En það virkar þegar maður kann og veit að maður veit.
2. mars, 2009 kl 23:49
Sæll Skrypill,
Ef þetta er rétt sem þú segir ættir þú að sanna mál þitt undir tilraunaaðstæðum. Hagstæðast fyrir þig væri auðvitað að gera það hjá James Randi, en hann býður hverjum þeim sem getur sýnt fram að yfirnáttúrulega hæfileika sína upp á milljón dollara. Hér getur þú sótt um:
http://www.randi.org/site/index.php/1m-challenge/challenge-application.html
Hingað til hefur engum tekist þetta, og margir hafa mjög svipaða sögu að segja og þú.
Ég skil ekki alveg…ef þetta er algjörlega andlegt fyrirbæri hvernig getur þá líkaminn verið eina mælitækið sem virkar?
3. mars, 2009 kl 19:46
Þú varst líka að leita að rafmagnskapli. Er rafmagn andlegt fyrirbæri?
Nú vakir ekki fyrir mér að reyna að útskýra (hef enga skýringu) hvernig á því stendur að prjónarnir hreyfðust í fyrsta skipti. Hins vegar er vel hægt að ímynda sér að andaglasáhrifin hafi haft einhver áhrif á það þegar þú reyndir að endurtaka leikinn úr suðaustri og vestri á sama kapalinn. Þú hafðir nefnilega væntingar til þess hvar prjónarnir myndu hreyfast vegna fyrri reynslu. Það má kannski kalla væntingar andleg áhrif, en þá eru það líka væntingarnar en ekki svartir straumar og máttur prjónanna sem veldur þessu. Slík endurtekning getur ekki talist vera neinn prófsteinn á kenninguna.
Varðandi þessar tilraunir sem þú hefur gert en segist ekk ætla að fara nánar útí. Þú þarft einmitt að fara nánar útí þær ef þessi athugasemd á að hafa eitthvert gildi. Hvernig gerðirðu þessar tilraunir? Nákvæmlega hvað mældirðu? hvernig framkvæmdirðu tilraunina og hvernig stjórnaðirðu tilraunaaðstæðunum?
Við verðum nefnilega oft fyrir mjög fríkí og dularfullri reynslu. Nákvæmlega hvernig best sé að skýra þessa reynslu er það sem við eigum erfitt með. Þess vegna telst reynslan dularfull. Það er hins vegar frekar ódýr lausn á þeim vanda að búa til kenningu um yfirnáttúruleg fyrirbæri sem þarfnast ekki frekari skýringa. Þessi yfirnáttúrulegu fyrbæri þarfnast nefnilega frekari skýringa. Spurningarnar sem vakna hjá mér við þessa frásögn þína eru nefnilega. Hvaða andlegu kraftar eru þetta sem þú ert að tala um, og hvernig orka þær á efnisheiminn? Þessu þarf að svara því prjónarnir eru úr efni, þú ert úr efni, og rafmagn er efni.