Talnaspeki – húmbúkk eða hjálpleg aðferð?
Í gegnum tíðina hefur maðurinn reynt að finna aðferðir til þess að skýra og lýsa hegðun og persónuleika sem og að spá fyrir um framtíðina. Talnaspeki er ein af þeim aðferðum sem maðurinn hafa þróað til þess arna og á sér 2500 ára sögu.
Talnaspekin gengur út á það að allir eigi sér tölustaf eða tölustafi og þessir tölustafir eiga að lýsa persónueinkennum, örlögum og lífsgöngu. Talnaspekingar eiga því samkvæmt þessu að geta ráðið fólki heilt út frá tölustöfum sem þeir reikna út.
Í talnaspeki er m.a. hægt að finna út forlagatölu og lífsleiðartölu.
Forlagatala (Destiny number) – Tala fundin út frá nafni
Samkvæmt talnaspekinni segir forlagatalan í raun frá hæfileikum okkar og persónueinkennum. Hún segir okkur hvað við eigum að afreka í lífinu.
Samkvæmt kenningum talnaspekinnar hefur hver stafur í stafrófinu númer. Hér að neðan má sjá hvaða númer hvaða stafur hefur.
1 A J S Æ
2 B K T Ö
3 C L U
4 D M V
5 E N W
6 F O X
7 G P Y
8 H Q Z
9 I R Þ
Ekki er gerður greinamunur á d og ð, i og í, a og á o.s.fr.
Svokölluð forlagatala er reiknuð út frá nafni. Hér má sjá hvaða forlagatölu ég hef.
H A F R Ú N K R I S T J Á N S D Ó T T I R
8+1+6+9+3+5 = 32 => 3+2 = 5. 2+9+9+1+2+1+1+5+1+4+6+2+2+9+9 = 63 => 6+3=9. 9+5=14 => 1+4=5.
Forlagatala mín er því 5.
Samkvæmt því hef ég marga hæfileika og get gert margt vel. Ég mun þroskast á þann hátt að ég get auðveldlega kynnt hugmyndir og mun vita hvernig ég á að nálgast fólk til þess að fá það sem ég vil frá þeim. Ég get verið óþolinmóð og jafnvel þótt að ég sé klók þá á ég það til að gera sömu mistökin aftur og aftur. Hér má sjá betur hvað forlagatalan 5 þýðir.
Samkvæmt talnaspekinni er beint orsakasamband á milli þess hvað við heitum og hvers konar persónueinkennum eða hæfileikum við búum yfir og sömuleiðis þess hvað við eigum líklega eftir að afreka í lífinu. Hvernig nafn okkar á að geta haft bein áhrif á það hver við erum og hvernig líf okkar mun verða er með öllu óljóst. Af þessu má því leiða að foreldrar geta fyrirfram ákveðið hvaða hæfileika og persónuþætti barn þeirra ber með því einu að velja viðeigandi nafn. Þetta er jafnvel hægt að gera áður en getnaður á sér stað.
Mér verður hugsað til móður minnar. Mamma mín heitir Elín Þórjónsdóttir. Amma og afi höfðu ákveðið að mamma skildi heita Elín Þuríður Þórjónsdóttir. Þegar presturinn spurði afa minn hvað barnið ætti að heita sagði afi minn hátt og snjallt nöfnin tvö sem þau amma höfðu valið. Svo illa vildi til að presturinn var farinn að missa heyrn og hreinlega heyrði ekki Þuríðar-nafnið, sleppti því alfarið og skýrði móður mína Elínu. Samkvæmt talnaspekinni hafði presturinn þarna úrslitaáhrif á örlög móður minnar.
Það virðist ekki vera samkomulag um það meðal talnaspekinga hvort notast eigi við skírnarnafn við útreikning á forlagatölu eða hvort að eðlilegt sé að notast sé við gælunöfn eða nöfn sem fólk tekur sér þegar liðið er á ævina. Ef ekki er nauðsynlegt að notast við skírnarnafn getum við í raun valið okkur persónueinkenni og örlög. Það sem meira er, persónueinkenni og örlög geta breyst á einu augabragði, t.d. við giftingu. Það er sem sagt möguleiki á því að við getum endurvalið þau örlög og þau persónueinkenni sem foreldar okkar völdu fyrir okkur með nafngiftinni.
Lífsleiðartalan (life path number) – Tala fundin út frá fæðingardegi
Lífsleiðartalan er sögð mikilvægasta talan í talnaspekinni. Lífsleiðartalan á að segja til um ferðalag okkar í gegnum lífið.
Ég er fædd 20.nóvember 1979. Lífsleiðartala er því 2+0+1+1+1+9+7+9 = 30 => 3+0 = 3.
Ég er því þristur. Samkvæmt því er ég m.a. skapandi og bý yfir yndislegum samskiptahæfileikum. Ég mun lifa lífinu til fullnustu og hef sjaldnast áhyggjur af morgundeginum. Ég er viðkvæm sál. Ég á auðvelt með að leysa vandamál. Ég get verið skapvond og óþolinmóð. Hér er ítarlegri útlistun á mér fyrir áhugasama
Samkvæmt talnaspekinni á orsakasamband að vera milli þess hvenær maður er fæddur og hvernig persóna maður er og hvernig lífi maður mun lifa. Að því sögðu verður að hafa í huga að tímatalið er mannanna verk. Á vísindavef HI stendur eftirfarandi: „Raunar var ekki farið að miða við meint fæðingarár Jesú fyrr en á fyrri hluta 6. aldar. Það var Dionysius Exiguus sem gerði það árið 525 en hann vann þá að því að framlengja töflur yfir tímasetningu páskanna fyrir Jóhannes I. Páfa.“ Einnig segir á sama stað: „Ekki er vitað með vissu hvaða aðferð Dionysius beitti en hann komst að þeirri niðurstöðu að Jesús hefði fæðst í desember á 753ja ári frá stofnun Rómaborgar og miðaði upphaf tímatals síns við næsta ár á eftir, það er árið sem hófst viku eftir meintan fæðingardag Jesú, og nefndi það 1“
Forsendur talnaspekinnar byggja því á ansi veikum grunni svo ekki sé meira sagt. Í raun má segja að samkvæmt talnaspekinni byggi vegferð okkar allra á reiknikúnstum og ákvörðunum Exiguus. Kúnstum og ákvörðunum sem afskaplega lítið er vitað um. Auk þessa verður að velta því fyrir sér hvort talnaspeki nái ekki yfir þá sem lifa við annað tímatal en okkar.
Mennirnir tóku ákvörðun um það að telja að barn væri komið í heiminn þegar búkurinn allur er komin út úr móðurinni. Tæknilega séð hefði verið hægt að ákveða að barn væri komið í heiminn þegar það dregur fyrst andadráttinn eða þegar klippt er á naflastrenginn. Þegar barn kemur í heiminn er litið á klukkuna sem er inn á stofunni um leið og barnið er allt komið út. Þetta er einungis gert ef aðstæður leyfa. Ef aðstæður leyfa ekki er litið á klukkuna um leið og hægt er og áætlað hvenær barnið kom í heiminn. Augljóst er því að ekki er alltaf nákvæmur fæðingatími skráður á fæðingavottorð. Fjölmargt getur orsakað það, svo sem það að klukkan á fæðingastofunni er ekki hárrétt. Af þessu leiðir að skráður fæðingatími getur verið eina mínútu yfir tólf á miðnætti en raunverulegur fæðingatími er eina mínútu í miðnætti. Þessi örlitla og ómerkilega skekkja getur því samkvæmt talnaspekinni haft úrslitaáhrif á persónuleikaeiginleika og lífsgöngu þess einstaklings sem á í hlut.
Niðurstaðan er því sú að persónueinkenni, mannkostir, örlög og lífsganga okkar markast af því hvaða nafn foreldar okkar velja okkur, reikniaðferðum Dionysius Exiguus, nákvæmni klukkunnar á fæðingastofunni, nákvæmi ljósmóðurinnar í skráningu á fæðingatíma og mögulega heyrn prestsins sem skírir okkur. Góðu fréttirnar eru hins vegar þær að ef við erum ósátt við örlög okkar og persónueinkenni þá getum við bara tekið upp annað nafn!
Öllum sem vita vilja ætti að vera ljóst af ofansögðu að talnaspeki byggir á afskaplega veikum grunni. Í raun er það svo að talnaspeki stenst enga skoðun. Talnaspeki er húmbúkk.
En má ekki hafa gaman af talnaspekinni? Líta á hana sem einhvers konar dægradvöl? Eflaust er það svo. En sú er ekki alltaf raunin. Talnaspeki er lifibrauð ótalmarga, fólk tekur pening fyrir að ráðleggja öðrum eftir þeim leiðum sem notaðar eru hér að ofan. Ástæða þess að ég settist niður og kynnti mér talnaspeki er sú að á Útvarpi Sögu er vikulegur þáttur þar sem hlustendur geta hringt inn og talnaspekingur finnur út lífsleiðatölu hlustandans og ráðleggur honum út frá henni. Ráðleggingar spekingsins eru oft hreinlega hættulegar. Nú ber svo við að talnaspekingurinn er farinn að auglýsa að hann geti ráðlagt fólki sem upplifir mikla óvissu, kvíða og óöryggi vegna ástandsins í þjóðfélaginu, að sjálfsögðu gegn greiðslu! Þegar svo ber við er talnaspeki ekki einhvers konar dægradvöl heldur fjárplógsstarfsemi af verstu gerð.
Heimildir:
http://en.wikipedia.org/wiki/Numerology
http://www.astrology-numerology.com/numerology.html
http://thedreamtime.com/spirit/numerology.html
http://www.wikinfo.org/index.php/Numerology
Höfundur: Hafrún Kristjánsdóttir
Þessi færsla var rituð
2. febrúar 2009 kl 15:32 og flokkuð undir Óflokkað.
Þú getur ritað ummæli, eða tilvísun frá eigin vefsíðu.
2. febrúar, 2009 kl 17:14
Flott grein! Algjörlega samála þér, undarlegur þessi „spámaður“ á útvarpi Sögu. Verst að það er til fólk sem trúir á þessa speki.
2. febrúar, 2009 kl 17:30
Haha, „lífsleiðatala“. Skemmtileg tvíræðni þar:)
2. febrúar, 2009 kl 18:44
Þessi röksemdafærsla gengur ekki upp nema foreldrar velji nafn á börnin sín af handahófi. Hver segir að þau geri það? Eru nöfn i.i.d.? Ef þú myndir nú líta upp úr bókunum þínum og skoða heiminn í kringum þig sérðu að svo er ekki.
- Höfundur hefur enga trú á talnaspeki en er hins vegar á móti falsvísindamönnum þ.e. þeim sem misnota vísindin til að koma ómerkilegum skoðunum sínum á framfæri.
2. febrúar, 2009 kl 20:35
Arnar ertu að segja að ef að foreldrar velja nöfn ekki að handahófi þá gangi talnaspekin upp?
Nei ég hef ekki trú á talnaspeki. Ég kynnti mér hana og sá að hún gengur einfaldlega ekki upp. Getur þú bent mér á einhverja rannsókn sem stenst aðferðafræðilegar kröfur sem sýnir fram á að eitthvað vit sé í talnaspeki.
Ég hefði getað notað mikið fleiri dæmi í þessum pistli en ég geri til þess að sýna fram á hvernig þetta gengur ekki upp. Ég vildi bara ekki hafa þetta of langt. Auk þess þá fannst mér þetta nú alveg nóg til þess að hrekja þessi fræði. ‘Þú ert greinilega ekki sammála.
Ég get þó sagt að þessi lýsing sem ég fékk á mér (sem fimmu og þrist) passar bara ansi vel við mig. Það er þó ekki talnaspekinni sem slíkri að þakka. Hér ræðir um svokölluð Barnum áhrif. Þetta eru allt Barnum setningar. Flettu því upp á t.d. wikipediu og þá skilur þú afhverju talnaspekingar virðast oft hitta naglan á höfuðið þegar þeir lýsa fólki.
Ég skil ekki alveg hvað þú ert að fara í seinni hluta síðari málsgreinar og get því ekki svarað því.
Bestu kveðjur
Hafrún Kristjánsdóttir
3. febrúar, 2009 kl 17:37
Mér finnst eftirtektarvert að stafrófið er líka mannasetning, engu síður en tímatalið. Stöfum er ekki raðað upp eftir einhverjum eðlisfræðilögmálum eða einhverri röklegri nauðsyn, heldur í besta falli eftir geðþótta eða tilviljun. Það virðist hins vegar engin tilviljun hvernig tölur eru paraðar við stafi þarna í þessari töflu og ekkert sem skýrir afhverju tölur ættu endilega að vera paraðar við stafi á nákvæmlega þennan hátt; það virðist hins vegar auðvelt að læra þetta – kannski það sé aðal hugsunin.
En hvað þá ef einhver vill breyta stafrófinu? Getur talnaspekin átt við þá? Eða breytast mín forlög ef Evrópusambandið eða Sameinuðu þjóðirnar eða einhver álíka alþjóðasamtök taka ákvörðun um að hér eftir skuli stöfunum raðað á annan hátt? Og hvernig virkar talnaspekin á fólk sem skrifar nafnið sitt í kírilísku letri, eða grísku… japönsku… kínversku…? Eru bara til forlagatölur fyrir fólk sem skrifar nafnið sitt í rómversku letri?
4. febrúar, 2009 kl 17:48
Arnar, hvort fer talnaspekin eftir gregoríanska eða júlíanska tímatalinu? Breyttust lífsleiðartölur allra Rússa 1918 þegar þeir tóku upp gregoríanska tímatalið?
9. febrúar, 2009 kl 10:14
Nú heiti ég Kristín Anna Ólafsdóttir Briem. Ég get því haft mismunandi lífstölur eftir því hvort ég er Kristín Anna Ólafsdóttir Briem, eða Kristín Anna Ólafsdóttir, Kristín Anna Bríem, Kristín Briem, Anna Ólafsdóttir Briem, Anna Briem, eða Anna Ólafsdóttir!!!!
Ekki nóg með það að ég var tekin með bráðakeisaraskurði 5 vikum áður en áætlaður fæðingartími var.
Flott síða hjá þér og skemmtileg að lesa. Einkum finnst mér skrifin um einhverfu áhugaverð.
9. febrúar, 2009 kl 15:56
Verð nú bara að segja það, Barnum eða ekki Barnum, að þessi lýsing á þér Hafrún er það nákvæm að maður sjokkerast!!
En ég veit það bara að talnaspekingur sagði konunni minni árið 2003 að hún ætti von á mörgum milljónum árið 2006 og fjárhagsleg framtíð okkar hjóna yrði trygg um aldur og ævi. Við erum hinsvegar ennþá að bíða en samt furðulegt að ef við fáum milljónir t.d. í ár eða það næsta þá hefur talnaspekingurinn ruglast á ártölum…. kannski hefur hann óvart snúið við 6 og 9 og milljónirnar koma því í ár. En ef það bregst þá nota ég bara Secret …
12. febrúar, 2009 kl 20:02
Mér finnst alveg merkilegt að fólki skuli taka svona kerfi alvarlega. Ekki bara vegna ástæðanna að ofan, og því að engin ástæða sé fyrir því að bókstafir skuli paraðir við tölur nákvæmlega í þeirri röð að bókstafirnir eru í stafrófsröð. Það er líka hvergi gefin ástæða fyrir því af hverju leggja skuli tölur saman í upphafi, svo klippa sundur niðurstöðuna og leggja saman tölu í hundruðsæti, tugasæti og einingasæti. Af hverju er ekki notaður frádráttur? Deiling? Margföldun? Eitthvað annað?
En það sem mér finnst eiginlega skrítnast við svona kerfi, og það sem gerir það ótrúverðugast fyrir mér, er að það skuli flokka alla einstaklinga í einungis 9 flokka. Eru þá bara 9 gerðir af persónuleikum til? Á allt mannkynið bara 9 mismunandi framtíðir fyrir sér? Jafnvel ef við tökum saman spár fyrir fólk með lífsleiðatölu annars vegar, og forlagatölu hins vegar, þá erum við bara að tala um 9 x 9 = 81 mismunandi samsetningar. 81 mismunandi framtíðir eru nokkuð fáar fyrir 6 milljarðir manneskja.
Þetta kemur líka fyrir í stjörnuspeki; í okkar evrópsku stjörnuspeki eru bara 12 mismunandi persónuleikar, eftir því í hvaða mánuði í úreltu tímatali maður fæðist; í asískri stjörnuspeki eru 12 mismunandi persónuleikar, eftir dýri ársins sem þú fæðist. Þannig að í Asíu eru allir eins sem fæðast á sama ári, í Evrópu eru allir eins sem fæðast í sama mánuði. Meikar sens, ekki satt?
13. febrúar, 2009 kl 1:14
Legopanda finnur hér að því að um einsleita flokkun á persónuleika er að ræða í kerfum eins og talnaspeki. Það er kannski aðeins út fyrir efni greinarinnar að svara þessu eins og mig langar til að gera vegna þess að mín athugasemd fjallar ekki neitt um talnaspeki., Ég sé mig samt knúinn til að gera það vegna þess að ég er ekki viss um að einsleitni í slíkri flokkun sé í sjálfu sér slæmur eiginleiki.
Persónuleikasálfræði nútímans er líklega á margan hátt gagnrýniverð, en í engum sambærilegum skilningi og talnaspeki eða stjörnuspeki. Sú gagnrýni snýst um allt aðra hluti og ætla ég ekki að ræða það hér (enda langt útfyrir efni greinarinnar). Ég get þó sagt að gagnrýnin á þáttakenningar persónuleikasálfræði snýst ekki um flokkunina sjálfa jafn mikið og hún snýst um aðferðina við að komast að henni. Öflugustu kenningar persónuleikasáfærði nútímans (og það má sjálfsagt deila mikið um hversu öflugar þær eru) flokka hins vegar persónuleika niður í aðeins þrjár eða fimm víddir sem er umtalsvert minna en 9 eða 12. Það sem Legopanda er þó sennilega að finna að er líklega það að talnaspeki og stjörnuspeki fjalla ekki um sitt flokkunarkerfi sem víddir heldur einsleita hópa. Það fá allir með lífsleiðar töluna 9 fyrirvaralaust sömu lýsinguna. Persónuleikasálfræðin gerir hins vegar ráð fyrir að um víddir sé að ræða og að menn séu staðsettir einhverstaðar á öllum þessum víddum. Sumir eru mjög taugaveiklaðir og ekkert tilfinningalega óstöðufir, en nokkuð innhverfir. aðrir eru mjög taugaveiklaðir og líka mjög tilfinningalega óstöðugir en ekkert innhverfir, Allir eru staðsettir einhverstaðar á þessum víddum, en staðsetning á einni vídd segir ekkert til hvernig menn eru á öðrum víddum. Það skiptir þannig séð ekki máli hvar maður er á taugaveiklunarrófinu, maður getur verið hvar sem er bæða á innhverfu rófinu og í tilfinningalegum stöðugleika. Slík flokkun nær vonandi utanum margbreytileika mannlífsins þannig að legopöndu sé fullnægt.
Ástæðan fyrir að ég set þetta hérna inn er ekki til að draga úr réttmæti athugasemdar legopöndu heldur til að fyrirbyggja það að þáttakenningar í persónuleikasálfræði verði notaðar af fólki sem skilur þær ekki til að gera lítið úr athugasemdinni eða annarri gagnrýni sem kemur úr röðum þeirra sem aðhyllast þessar sálfræðikenningar.. Það er eitt að vera með fáa mjög einsleita flokka. Það er töluvert annað að gera ráð fyrir enn færri víddum en miklum breytileika innan þeirra. Það er nefnilega munur á flokkum og víddum. Það var líklega það sem ég vildi koma á framfæri.
Ég vona loks að þessi athugasemd skiljist öðru fólki en þem sem hafa sett sig inn í þessar kenningar.
Annars fór ég að velta öðrum hlut fyrir mér í sambandi við talnaspeki. Afhverju sjá menn ástæðu til að vera bæði með forlaga tölu og lífsleiðartölu? Eru forlög ekki einhverskonar fyrirheit um hvernig lífsleiðin ákvarðast?
25. febrúar, 2009 kl 8:22
Takk fyrir málefnalega athugasemd, Baldur Heiðar. Ég vildi alls ekki að fólk skildi mig þannig að sömu rök myndu gera lítið úr þessum kerfum sem þú nefnir í sálfræði.
Ég var heldur nákvæmleg að tala um þessa einsleitu flokkun á fólki; ekki bara að fólk skiptist í 12 grófa flokka, sem hver um sig hefur ákveðna vídd, eða 7 flokka, eða 113 flokka; það er svo margt sem spilar inn í þegar kemur að persónuleikum að það þessar yfirflokkanir eru eflaust tilraun til að halda utan um heildarskalann sem spannar mögulegar mannlegar persónur.
Mér finnst ekkert benda til þess að þessar talnaspekitölur geri ráð fyrir vídd þegar kemur að öllum sem fá forlagatöluna 3, ekki að öðru leyti en að redda sér fyrir horn með því að hafa framtíðarspár nógu óljósar að þær gætu átt við hvern sem er.
Það sem mér fannst sérstaklega kjánalegt við stjörnuspekirnar, var það að persónur skuli flokkast í svona stór knyppi; allir sem fæðast í sama mánuði eru með sama persónuleika, eða allir sem fæðast á sama ári (og á tólf ára fresti) eru með sama persónuleika.
Jafnvel þó við værum að tala um mögulega persónuleikavídd, þá er það bara svo ólíklegt að fólk geti raðast svona, tölfræðilega séð, að ég verð að fá einhver haldbær rök fyrir því.
Og já, mér finnst einmitt líka frekar skrítið að það skuli þurfa að vera forlagatala og lífsleiðartala. Var þetta ný markaðssetning á sams konar þjónustu?