nóvember 2008

Þeir hafa þetta greinilega öðruvísi á Indlandi  en hér á Íslandi

Þar voru framin hryðjuverk, sem þessi ráðherra persónulega stóð ekki fyrir eða stuðlaði að.

Samt sem áður hefur hann ákveðið að bera siðferðislega ábyrgð eins og hann kallar það, segja af sér, því þetta gerðist á hans vakt sem innanríkisráðherra.

Magnað!

Þessi frétt er alveg mögnuð.

Skv. henni þá reynu fulltrúar Seðlabanka á fundi Viðskiptanefndar í fyrrakvöld, að koma þeirri ordru í gegnum þingið, að ekki þyrfti samþykki Viðskiptaráðherra fyrir reglum Seðlabanka varðandi gjaldeyri.

Þessu var hafnað.

Komið hefur fram að Davíð upplýsti ekki bankamálaráðherrann um að hluti láns AGS væri kominn til landsins.

Hvað er þetta – er Davíð núna kominn í persónulega för gegn ráðherranum? Af hverju talar hann ekki við ráðherrann? Svo mætir hann ekki fyrir viðskiptanefnd eins og óskað var eftir.

Hversu lengi ætlar ríkisstjórnin að una við þessi vinnubrögð?

Þar til Davíð hefur komið á fund Viðskiptanefndar! Það er algerlega ótækt að þessi maður, sem virðir Alþingi svona lítið, taki á móti öllum milljörðunum.

Ég krefst þess (ekki sem HR ingur – og ekki sem Vesturbæingur heldur bara ég sjálf ef mig skyldi kalla … sbr fyrri færslu) að við frestum því að taka á móti þessum fjármunum þar til Davíð hefur mætt þinginu og skýrt sitt mál!

Þar sem ég er byrjuð í próflestri ætlaði ég mér að halda mig frá þessum fjára, þ.e. blogginu.. en oft var þörf en nú er það algjört möst… að skrifa smá línu. geri því svona topp tíu.. og sé svo hvort ég endist í tíu… kannski verður þetta bara svona topp fimm… eða þrír.

1. HR – Egill Helgason  fer mikinn á síðunni sinni um Háskólann í Reykjavík.Það er vegna þess að einhverjir krakkar tóku upp á því að mótmæla á facebook-inu  ræðu Katrínar Oddsdóttur, laganema við HR. Krakkarnir mótmæla því að ræðan sé sett á heimasíðu HR.

Egill kýs að drulla yfir allan skólann vegna þessara krakka. Persónulega finnst mér það fáránlegt af þeim að vera að skipta sér af því hvað skólinn setur á heimasíðu sína, því ef skólinn ætlar að birta á síðunni greinar og ræður eftir nemendur og kennara þá ræður hann því, og á þá ekki að ritstýra því sem þangað fer inn eftir skoðunum vefstjóra. Skólinn hefur ákveðið að nota svæðið undir svona hluti og er það bara flott mál. En mér finnst líka fáránlegt af Agli að dæma heilan skóla vegna nokkurra krakka. Það hafa, Guði sé lof,  alltaf verið alls konar einstaklingar í Háskólum landsins og heimsins og það að ætla að dæma heilan Háskóla vegna skrifa nokkurra einstaklinga er út í hött. Ég get allt eins sagt, hvað er að þessum ÍSLENDINGUM sem leyfa ekki ungri lagastúdínu að segja orð sín á Austurvelli án þess að gagnrýna. Ég gæti allt eins sagt, hvað er með þessa villinga í Vesturbæjarskólanum.. og jafnvel bara hvað er með þessa villinga í fyrsta bekk í Vesturbæjarskóla bara vegna þess að einhverjir tveir slást eða kasta snjóbolta í gamla konu…. (Egill liggur vel við höggi þarna eigandi fagran dreng í 1. bekk vbs). Ég spyr því sömuleiðis – hvar er frelsi einstaklingsins til að hafa sína skoðun, hver svo sem hún er? Þetta hefur ekkert með akademíu að gera. Þetta er skoðun þessara einstaklinga og mér finnst það frábært. Egill hefði kannski frekar átt að hrósa skólanum fyrir þessa ungu ræðukonu sem veigrar sér ekki við að standa fyrir framan alþjóð með SÍNA SKOÐUN!

Varðandi fjármál skólans þá hvet ég Egil til að fá Svöfu í þáttinn til sín. Þá getur hún sýnt honum svart á hvítu hvernig á að reka fyrirtæki! Mættu margir læra af henni.

2. BB. Hann var ekki menntamálaráðherra þegar ég átti samtalið við hann, á ganginum fyrir utan dyrnar inn á dagskrárdeild útvarpsins, heldur dómsmálaráðherra. Það að hann hafi ekki oft verið spurður í Spegilinum kom nú einnig til af því að þegar eftir svörum var leitað var hann oftar en ekki of upptekinn, rétt eins og á mánudaginn var þegar borgarafundurinn var haldinn, til að komast í þáttinn eða taka á móti okkur. Það var líklega ekkert persónulegt, bara mjög upptekinn maður enda nóg að gera.

3. Kjósendur var með vísan í hann en ekki mig. Kjósendur átti að vísa í eitthvað með lýðræðið og eigendur útvarpsins…  – hefði mátt skýra betur.. en óyfirfarið blogg fór svona og í raun ekkert sem ég þarf að útskýra betur með það…  þetta voru vissulega hlustendur mínir en kjósendur hans enda ég ekki í framboði.

4. Agnes – heyrði í henni  í morgunþættinum á Bylgjunni í gærmorgun þar sem hún bísnaðist þessi ósköp yfir ófagmennsku G. Péturs Matthíassonar og því að þetta væri eins og hún færi að draga upp alls konar viðtöl frá löngu liðnum tíma. Ég vænti þess að hún hafi að minnsta kosti sömu skoðun á fyrrum ritstjóra sínum Matthíasi Johannesen, sem ekki tók gömul viðtöl og birti – heldur gömul einkasamtöl.. sem alls ekki voru ætluð til birtingar, hvorki þá né nú. Það að eitthvað gerist í anddyri forsætisráðuneytis í vitna viðurvist er nú ekki beint brot á trúnaði.

5. Pétur Blöndal – heyrði í honum í morgunþættinum á Bylgjunni í morgun. Þar spurði Kolla hann út í grein Jóns hagfræðings í bretlandi og þau orð að lagaumhverfið hér varðandi viðskipti á fjármálamarkaði hafi einfaldlega verið allt of rúm og mun rýmri en víða í kringum okkur. Pétur var fljótur til, kannski full fljótur, og hélt hann væri kominn í feitt. Svaraði því til að þetta væri nú allt ESB mál, því við hefðum bara tekið þá löggjöf sem hentaði okkur ekkert og sett inn sem hluta af EES. Þá benti Kolla honum á að reglurnar í löndum eins og Danmörku og Bretlandi væru mun strangari og væru þar þó um ESB ríki að ræða. SVaraði Pétur þá, eftir stutt hik „Já að hans mati“ eins og fyrst hann væri ekki að drulla yfir ESB þá væri þetta „bara að hans mati og lítið mark á takandi“ Hann byrjaði svo að tala eitthvað um skattheimtu sem væri strangari og eitthvað sem átti að afvegaleiða en þau Heimir og Kolla náðu að benda honum á að verið væri að ræða löggjöf og regluverk á fjármálamarkaði.

6. Morgunþátturinn á Bylgjunni – Í býtið – Heimir, Kolla, Þráinn og Gissur – Þið eruð að standa ykkur alveg ferlega vel! Ég er mjög ánægð með ykkur og hlusta orðið alltaf á ykkur. Ég hef verið algjör Rúvari – og er í grunninn algjör rúvari (tala eins og þetta sé einhver þjóðflokkur .. sem þetta er að vissu leyti) en þarna eruð þið algjörlega að skora. TAKK!

7.  Grímur – segir ýmislegt um ósýnilega og óþekkta vestfirska drengi…. ekki fleira um það. Látum hann um það.

þetta varð þá topp sjö… í bili..

Hvað gengur Páli Magnússyni til að krefjast þess að G. Pétur afhendi myndband það sem hefur verið á veraldarvefnum í nokkra daga. Þetta er auðvitað algjör steypa.

Það er löngu vitað að fjölmiðlamenn eiga í fórum sínum margar margar upptökur, sögur og minningar frá samtölum og samskiptum við ráðamenn sem ekki þola dagsins ljós. En í dag, hvet ég alla til að segja frá. Það hefur svo ótrúlega margt gengið á, margt miklu verra en í þessu samtali G. Péturs við Geir sem þó er alveg nógu slæmt finnst mörgum.

Sjálf var ég einu sinni tekin á beinið af Halldóri Ásgrímssyni. Ég á það því miður ekki á bandi, því ég hafði gengið frá öllum upptökugræjum ofan í tösku. Ég var tiltölulega nýbyrjuð í Speglinum og var stödd í ráðuneytinu við Rauðarárstíg til að tala við ráðherrann.

Eftir viðtalið, sem snérist meðal annars um þátttöku okkar í árárinni á Írak, missti Halldór stjórn á skapi sínu og ákvað að lesa yfir hausamótunum á fjölmiðlakonunni. Hvernig við voguðum okkur að halda uppi þessum áróðri í ríkisútvarpinu, að við værum greinilega í persónulegu agenda varðandi þetta stríð og að við yrðum að gæta okkar verandi hjá ríkisfjölmiðli. Þetta upphlaup mannsins kom nokkuð á óvart – því ég átti því ekki að venjast að ráðamenn væru að æpa á mig. En ég var nokkuð óskammfeilin þarna og svaraði hástöfum og af fremsta megni. Á endanum fór ég út af skrifstofunni og upp í útvarp, sorrý yfir því að hafa ekki haft tækið á upptöku á meðan á yfirhalningunni stóð.

Annað dæmi get ég nefnt. Í því tilfelli var það Björn Bjarnason sem hringdi í gsm símann minn. Hann var sömuleiðis að skamma mig fyrir umfjöllun í Speglinum. Benti mér sömuleiðis á að ég skyldi vara mig á því að þetta væri ríkisfjölmiðill og því ekki sjálfsagt að vera með umfjöllun þar sem gagnrýndi stjórnvöld svona. Undir lá vissulega að hann hefði völd til að láta mig fara. Þetta var á þeim tíma sem Spegillinn átti fótum sínum fjör að launa í samskiptum við útvarpssstjórann Markús Örn Antonsson og fleiri innanhússmenn sem ég nenni ekki að nefna. Hírakíið var algjört, stjórnmálamennuppnefndu útvarpsþáttinn og millistjórnendur ræddu við umsjónarmanninn sem átti svo að koma skilaboðum áleiðis til vinnudýranna. Aldrei nokkurn tímann, ekki einu sinni, fundum við fyir því að við nytum stuðnings þeirra sem við störfuðum hjá. Eingöngu sívaxandi hlustun á þáttinn, auk hróss frá almennum kjósendum hvatti okkur áfram á þeirri braut sem við vorum á.

Við vorum í raun á nokkurs konar eylandi, því við vildum ekki vera með eintóma kranablaðamennsku fyrir ríkjandi stjórnvöld (sem þarna voru Reykjavíkurlisti í borg og B og D í ríki og því í raun allir flokkar og því ekki herferð gegn einum flokki). Við vildum spyrja gagnrýnna spurninga, vera ákveðin og spyrja en ekki lúffa og taka upp gamlar fréttatilkynningar. Þetta er hlutverk fjölmiðla og þeir bara mega ekki guggna á því. Ekki einu sinni þegar ráðherrar hringja með hótanir um uppsögn.

Fljótlega eftir þetta hætti ég á Speglinum.

Háskólabíó var fullt af kurteisu fólki sem var tilbúið til að hitta ráðamenn þjóðarinnar, og í staðinn fyrir að ráðamenn óskuðu vægðar og þökkuðu fólkinu fyrir að nenna yfirleitt að eyða tíma sínum í þau þá mætti fólkinu hrokinn einn.

Magnað

Við réðum þetta fólk til starfa. Þau voru ekki að vinna vinnuna sína, og við viljum segja þeim upp. Þau segja bara nei, það viljum við ekki og þið ráðið þessu ekki.

Jú – við ráðum þessu.

Ég hlustaði á Ingibjörgu á flokksstjórnarfundinum á laugardaginn og gat skilið sjónarmið hennar varðandi kosningar.

En í dag þá skil ég ekkert. Ég skil ekki hvers vegna stjórnmálamenn þurfa að eyða allri sinni orku í kosningabaráttu. Þetta er ekkert venjuleg kosningabarátta. Vissulega tekur tíma fyrir nýtt fólk að koma sér í umræðuna, því við hljótum að óska eftir nýju fólki um borð. En við hljótum líka að geta gert þá kröfu að stjórnmálamenn hlaupi ekki bara frá öllu sínu í marga mánuði til að taka þátt í kosningabaráttu. Hvernig er það í venjulegu árferði, er landið bara stjórnlaust svo vikum og mánuðum skiptir þegar kosningar eru í nánd?

Það er eitthvað það hrokafyllsta í heimi að halda að maður sé svo ómissandi að stór hluti þjóðarinnar megi ekki segja skoðun sína. Þið eruð ekkert klárari eða betur til þess fallin en aðrir til að klára þetta dæmi. Þið eruð bara ósköp venjulegt fólk. Það er bara óvart þannig að þessa samsetningu af ríkisstjórn vill þjóðin ekki lengur – og já ég segi þjóðin þó að ég geti bara talað fyrir mig sjálfa. Drjúgur hluti þjóðarinnar hefur sagt að hún vilji ekki þessa ríkisstjórn og því eigið þið að hlýða.

Ykkur ber að segja af ykkur og boða til kosninga sem fyrst á komandi ári.

Okkar þolinmæði er á þrotum!

Jóhannes Gunnar Skúlason ljósmyndari tók þessa snilldar mynd. Takk fyrir að leyfa mér að hafa hana hér á síðunni, því ég var ósvífin og spurði ekki leyfis – en Jóhannes leyfir mér samt að nota hana áfram. TAkk fyrir það Jóhannes.

Mig langar reyndar í svona merki – barmmerki þ.e og ætla að reyna að redda mér því á næstu dögum. Það er reyndar annar höfundarréttarstuldur.. well.. hmmm..

Hvort á maður að hlægja eða gráta? Geir vill ekki valda óstöðugleika með kosningum. Telur brýnt að halda í stöðugleika? Hvaða stöðugleika ætli hann sé að tala um? Hvar hefur hann verið? Hann segir alla verða að standa í lappirnar því annað sé uppgjöf.

Hefur maðurinn aldrei heyrt talað um ábyrgð? Það er ekki það sama að segjast vera sekur og að axla ábyrgð sína. Ráðherrar fá borgað fyrir að bera ábyrgð. Þeir fá borgað aukalega fyrir það að þeir bera ekki bara ábyrgð á eigin orðum og eigin gjörðum heldur ýmsu öðru sem heyrir undir þá. Það felst í starfi þeirra. Ef það svo klikkar á þeirra vakt, þá verða þeir að axla þá ábyrgð. Það gera þeir með því að víkja, þeir eru ekki að gefast upp með því heldur viðurkenna að það hafa orðið mistök á meðan þeir áttu að vera að fylgjast með.

Geir viðurkenndi nokkrum sinnum í Kastljósinu í kvöld að honum hefðu orðið á mistök, og að það hefðu verið gerð mörg mistök. Af hverju í ósköpunum heldur hann þá áfram að vera forsætisráðherra? Hann er ekki ómissandi. Hann er ekkert aðalmaðurinn og alls ekki eini maðurinn sem getur gegnt þessu embætti og ég tek það fram að konur eru líka menn í þessari tölu.

Það er allt í lagi að standa á fætur því það kemur maður í manns stað. Enginn er ómissandi og allra síst í stjórnmálum sem ku vera stút full af gríðarlega hæfileikaríku liði.

Svo Geir, axlaðu ábyrgð þína og farðu af vettvangi. Það er heilbrigðast að leyfa fólki að kjósa að nýju svo við getum þá veitt ykkur umboð okkar að nýju. Þú ert í vinnu hjá okkur, nú er komið að starfsmannaviðtalinu og við höfum ákveðið að þú eigir að fara í frí um óákveðinn tíma. Að minnsta kosti fram yfir kosningar.  Kannski munum við svo endurráða þig seinna, hver veit, en núna ert þú því miður ekki réttur maður á réttum stað.

… einmitt vegna þess að við þurfum að koma á þeim margumtalaða stöðugleika sem þú og þinn flokkur glutruðuð svona skemmtilega niður.

Var að glugga í greinargerð til eigenda vegna áhættu og arðsemi Landsvirkjunar vegna Kárahnjúkavirkjunar.

Þar fann ég ekki út, og finn ekki í fljótu bragði annars staðar hvenær Landsvirkjun þarf að endurnýja lán sín vegna Kárahnjúkavirkjunar.

En æpandi er í greinargerðinni sú staðreynd að þær forsendur sem þar eru gefnar eru algjörlega út í bláinn í dag.

Gert er ráð fyrir að dollarinn sé í 87,5.

Gengisvísitala krónu  132,5.

En vill einhver segja mér hversu hátt lánið er sem tekið var, og hvenær á að endurfjármagna.

Meira um þetta síðar…

Takk Grímur fyrir þitt bréf.

Takk Hallgrímur fyrir þitt bréf.

Ég vona og treysti á það að forysta Samfylkingar komi til byggða og hlusti á okkur. Þetta snýst nefnilega ekkert um Samfylkinguna eða Sjálfstæðisflokkinn. Þetta snýst um velferð, siðferði, sjálfsmynd og heilsu heillar þjóðar.