október 2008

Eitt sinn urðu viðlíka ummæli óskaplega fræg. Það var önnur kona og það var maður sem sagði þetta við aðra konu.

Núna, daginn eftir stórkostlega tónleika í Gamla bíói get ég ekki sagt annað en

Ellen – ég elska þig

Tónleikar Ellenar Kristjáns í gærkvöldi voru heilandi (líka heillandi) . Eftir eril undanfarinna vikna settist maður þarna inn og hlustaði á þessa dásamlegu konu, flytja bestu lögin sín og annarra með frábæru bandi. Eyþór Gunnars (sem nefndur var kallinn í gærkvöldi… enda fjórfaldur afi ) Pétur Ben, Ómar Guðjóns, Óskar Guðjóns og trommuleikarinn Magnús með langa nafnið.  Bakraddirnar Sigga, Beta og Elín Eyþórsdætur, upphitunarbandið Pikknikk og svo leynigestirnir KK og svo auðvitað aðal lagahöfundurinn Maggi Eiríks. Ég held það sé ekki á neinn hallað þó ég fullyrði að Ellen Kristjánsdóttir er besta og fjölhæfasta söngkona sem við eigum. Allt frá sálmum yfir í poppið og rokkið og blúsinn og hvaðeina. Hún getur þetta allt… og svona líka fjári sjarmerandi.

Þetta var æðislegt kvöld – og ég held að ég ætti að breyta fyrirsögninni úr Ellen – ég elska þig yfir í Ellen – við elskum þig öll. Takk fyrir þitt framlag til menningarinnar á Íslandi.  Ég ætla ekki með þig í útrás – ég tími því ekki.

Mogginn lýgur ekki.. nema í .. fréttaskýringum sumra… Sjáiði bara

Fiskar: Allt mun enda vel, ef þú neitar að hafa áhyggjur. Þegar þú finnur að þú ert að keyra út af í huganum, beindu þá hugsununum aftur inn á beinu leiðina.

Vaxtahækkun, skammvinn aðgerð

Ingibjörg Sólrún Gísladóttir, utanríkisráðherra.

Ingibjörg Sólrún Gísladóttir, utanríkisráðherra, segist ekki geta annað en stutt ákvörðun um hækkun stýrivaxta í 18%. Hækkunin hafi þó ekki verið ákvörðun eða skilyrði Alþjóðagjaldeyrissjóðsins. Þó hafi vaxtahækkun verið talin algjör forsenda þess að gjaldeyrismarkaður myndaðist.

Stýrivaxtahækkun sé skammvinn aðgerð og mikilvæg til að tryggja að gjaldeyrir flæði til landsins.

« Til baka

Ha? er þetta rétt? Er það rétt að þetta hafi bara verið ákvörðun þessara stórkostlegu Seðlabankastjóra?

Hvaða rugl er þetta?

og hér er brot af fréttatilkynningu Seðlabankans:

Í liðinni viku gerði ríkisstjórnin samkomulag við sendinefnd Alþjóðagjaldeyrissjóðsins. Í samkomulaginu, sem lagt verður fyrir framkvæmdastjórn hans til staðfestingar á næstu dögum, felst m.a. að Seðlabankinn skuli þá hafa hækkað stýrivexti í 18% sem nú hefur verið gert. Við þá ákvörðun er vísað til þess að við hrun bankakerfisins og harkalegar ytri aðgerðir sem í kjölfarið fylgdu lamaðist gjaldeyrismarkaður þjóðarinnar á svipstundu. Þótt aðstæður hafi síðan lagast nokkuð eru takmarkanir á gjaldeyrisviðskiptum óhjákvæmilegar.

Hér eru svo ummæli Árna Matt:

Árni Mathiesen fjármálaráðherra, tók í sama streng í samtali við fréttamann Stöðvar 2 í gær þar sem hann sagði engin skilyrði hafa verið sett fyrir þessu af hálfu sjóðsins. Hins vegar sé hækkunin í samræmi við það samkomulag sem gert var við IMF.

Hver er að bulla? Eruð þið til í að hætta að ljúga!

Spurning, kæru stjórnvöld.

Hvenær ætlið þið að beita ykkur fyrir breytingu á námslánunum svo að þau verði ekki eftir á greidd eins og er í dag? Til hvers erum við að moka peningum í bankastofnanirnar?

Núna þegar stýrivextir eru 18 % er ljóst að vextirnir af yfirdráttarláninu, sem námsmenn neyðast til að taka hjá bönkunum, stefna í 30% eða meira. Þetta er klár skerðing á láninu og mér finnst algjörlega óþolandi að þessu sé kastað sísvona á nemendur þessa lands.

… og ég nenni ekki að heyra eitthvað baul um að við getum sjálfum okkur um kennt að vera í námi og að einhver eigi ekki að borga fyrir námið mitt… ég er að taka námslán… ekki námsstyrk!

Nei, ég get ekki gert mikið fyrir ríkisstjórnina, en vil þó nesta hana með einu ljóði sem henni er frjálst að fara með næst þegar hún hittir fulltrúa Alþjóðagjaldeyrissjóðsins og önnur yfirvöld af veraldlegum toga, en það heitir einmitt Síðasta tilboð Íslendinga og er að finna í ljóðabók með því viðeigandi nafni: Í auga óreiðunnar.

Því miður, herra framkvæmdastjóri,
ég hef ekkert að bjóða
í þessum samningaviðræðum
nema þrjú tonn af kokteilsósu,
örfá eintök af dýrafræði Jónasar frá Hriflu
og allar hljómplötur Árna Johnsens.

Höfundur er rithöfundur

Byrjum á því jákvæða.

Fór að sjá Brák í Landnámssetrinu í Borgarnesi í gærkvöldi. Þetta er algerlega frábær sýning. Brynhildur Guðjónsdóttir stendur sig glimrandi vel, og það urðu þvílík áhrif í lokin á sýningunni að mig langaði barasta að stökkva upp og faðma hana.

Það er einhvern veginn þannig að þegar maður hefur orðið fyrir einhverju áfalli þá verður allt svo miklu raunverulegra, eins og hlutirnir snerti mann meira, maður tengir meira við og svona. Nú hafa Íslendingar orðið fyrir nokkru áfalli og þá var svo ótrúlega magnað að sjá Brák, þessa ambátt sem flutt var hingað frá Írlandi. Egill og Skalla – grímur. En Brák var bara langflottust og Brynhildur var líka alveg meiriháttar.

Matur á undan í setrinu, leikhús og svo heim undir hafnarfjallinu.. í myrkrinu og snjónum. Þetta er frábær upplifun og ég hvet alla til að mæta og sjá.. ekki bara á mánudaginn í næsta mánuði heldur núna.

Hafði áður séð Benedikt Erlingsson gjörsamlega fara hamförum í MR. Skallagrímsson á sama stað… svo kannski á maður bara að taka dirty weekend í Borgarnesi, sjá Brák fyrst og Skallagrímsson svo. Mæli með því.

annað.

Mætti með börnin í dag í mótmæli milli 3 og 5. Svona eins og ein bíóferð.. fyrir þá sem hafa ekki tíma til að mótmæla. Þetta voru tvenn mótmæli.. sem bæðevei er algerlega ótrúlegt.. en

… mér fannst leitt að það þyrfti að koma til illinda milli hópa mótmælenda, og að sá hópur sem fannst á sér traðkað skyldi eyða hálfum fundi í að tala um að „hinir illu traðkarar“ væru að fara illa með sig. Þetta hefði vel getað runnið saman, enda var það raunin fyrir fjölmarga sem mættu á báða staðina. En fyrir þá sem kannski voru að mæta í fyrsta sinn, virkaði þetta ekkert sérlega vel.

… heyrði fólk tala um að stefna til bálfarar (ekki blysfarar) upp í hádegismóa vegna drottningarviðtals Agnesar við Björgólf, eiganda Morgunblaðsins. Kæri Óli STeph… fólk er ekki að fíla þetta, bara svona að segja þér í trúnaði. Það barasta gengur ekki að ætla Agnesi að taka gagnrýnið viðtal við Björgólf á þessum örlagatímum. Hefði frekar fengið Björgu Evu í málið, eða Ragnhildi Sverris… eða Höllu Gunnars… bara ekki Agnesi.. þ.e. ef Morgunblaðið vill láta taka mark á sér.

Svo ég skildi þetta með bálförina… vona bara að fólk kveiki ekki í hádegismóunum… nóg er nú samt.

og já… þetta er ekkert persónulegt.. en Davíð verður að fara úr seðlabankanum og VIÐ VERÐUM AÐ FÁ KOSNINGAR!

Við verðum bara að biðja um hjálp:

„Af hverju gerði enginn neitt þegar viðvaranir komu úr öllum áttum?“ Þannig spyr Lars Christensen, hagfræðingur hjá greiningardeild Danske Bank, en hann er aðalhöfundur frægrar skýrslu um ofhitnun íslenska bankakerfisins sem birt var snemma árs 2006.

Christensen segir í samtali við DV að nú gagnist ekki að horfa til fortíðarinnar og þess sem sagt var árið 2006. Mest sé um vert fyrir Íslendinga að semja sem fyrst um aðstoð og ráðgjöf Alþjóðagjaldeyrissjóðsins til þess að koma höktandi íslensku hagkerfi í gang.

„Það er óumflýjanlegt og bráðnauðsynlegt úr því svona fór. Ég má ekki til þess hugsa hvað gæti gerst ef þið farið ekki rétt að. Þið verðið líka að semja við Breta. Það er ekki þeim að kenna hvernig fór. Tjónið í Bretlandi stafar af íslenskum banka í einkarekstri sem íslensk yfirvöld leyfðu að hegða sér stjórnlaust og án eftirlits. Ábyrgðin hlýtur að vera hjá íslenskum stjórnvöldum, Seðlabankanum og Fjármálaeftirlitinu sem leyfðu bönkunum að vaxa eftirlitslaust þrátt fyrir viðvaranir úr ýmsum áttum.

Ég vil sérstaklega taka fram að ég hef engan áhuga á að vera með umvandanir og vísa til viðvarana í skýrslu okkar frá árinu 2006. Það vill enginn að Ísland sökkvi í botnlausa kreppu og skuldafen en þið þurfið að hlusta á þá sem vilja rétta hjálparhönd. Sumar þjóðir bjóða aðstoð af því að þær hafa hagsmuna að gæta vegna tjóns sem einstaklingar og fyrirtæki hafa orðið fyrir í viðskiptum við íslensku bankana. Þetta á tæplega við um Norðurlöndin. Þar er tjónið ekki mikið í viðskiptum við bankana sem nú hafa verið þjóðnýttir. Þau vilja hjálpa vegna þess að Norðurlöndin eru frændþjóðir. En það væri barnaskapur að ætla að enginn setji skilyrði. Það skrifar enginn ávísun og réttir öðrum skilmálalaust.“

Bæti þessu við af EYJUNNI. 

Norska sendinefndin, sem hefur fundað með forsætisráðherra, Seðlabanka, Fjármálaeftirliti og viðskiptaráðherra, fer af landi brott í dag.
Norska nefndin hafði það verkefni að fá yfirlit yfir efnahagsvandann og meta þörfina á aðstoð.  Martin Skancke, formaður nefndarinnar, segir að af hálfu Norðurlandanna
sé vilji til að hjálpa Íslendinga í þrengingunum, en grundvallaratriði sé að Ísland óski eftir aðstoð.

Enn hafi Ísland ekki gert það, en upplýsingar sem sendinefndin aflaði sér hér á landi verði lagðar fyrir fund forsætisráðherra Norðurlandanna á þingi Norðurlandaráðs í næstu viku.

Upplýsingarnar verði notaðar til að meta hvers konar aðstoð komi Íslendingum best.

RÚV sagði frá þessu í morgun.

Það er ekkert að því að óska aðstoðar. Við þurfum ekkert að drepast úr stolti. Við höfum sagt okkur endalaust að þetta sé um allan heim og reynum bara að hugsa það þegar við leitum aðstoðar Alþjóðagjaldeyrissjóðsins og förum inn í ESB. Það má biðja um hjálp þegar maður þarfnast hennar og við verðum ekkert verri fyrir það. Við verðum bara betri og lærum af þessu.

SÓSÍALISMI 
Þú átt 2 kýr. 
Þú gefur nágranna þínum aðra þeirra. 

KOMMÚNISMI 
Þú átt 2 kýr.
Ríkið tekur þær báðar og gefur þér mjólk.

FASISMI
Þú átt 2 kýr.
Ríkið tekur þær báðar og selur þér mjólk. 

NASISMI
Þú átt 2 kýr.
Ríkið tekur þær báðar…og skýtur þig svo.

SKRIFRÆÐI
Þú átt 2 kýr.
Ríkið tekur þær báðar, skýtur aðra þeirra, mjólkar hina og hellir svo allri mjólkinni.

HEFÐBUNDINN KAPITALISMI 
Þú átt 2 kýr.
Þú selur aðra þeirra og kaupir naut. Þú stofnar kúabú og hagnast vel. Þú hagnast vel, selur kúabúið og sest í helgan stein

SÚRREALISMI
Þú átt 2 gíraffa.
Ríkið krefst þess að þú farir í harmonikkunám.

BANDARÍSKA FYRIRTÆKI
Þú átt 2 kýr.
Þú selur aðra þeirra og þvingar hina til að gefa af sér mjólk á við fjórar kýr. Þú ræður svo sérfræðing til að komast að því hvers vegna hún datt niður dauð. 

ÁHÆTTUFJÁRFESTINGAR  - Íslendingar 
Þú átt 2 kýr.
Þú selur 3 þeirra til fyrirtækis á opnum markaði með veði í gervifyrirtæki mágs þíns, gengur svo frá yfirtöku með vísan í skráningu á markaði þannig að þú færð allar 4 kýrnar tilbaka og skattaívilnanir vegna einnar til viðbótar. Afurðarétturinn af kúnum 6 er færður yfir á fyrirtæki í Karíbahafinu, en leynilegur meirihlutaeigandi þess selur þér aftur réttinn að öllum 7 kúnum. Samkvæmt ársskýrslu á fyrirtækið nú 8 kýr, með eigendarétti að einni til viðbótar. Þú selur eina kú til þess að þóknast ónefndum stjórnmálamanni og átt þá níu kýr. Rétturinn að nautinu er seldur almenningi í hlutafjárútboði.

FRANSKT FYRIRTÆKI
Þú átt 2 kýr.
Þú ferð í verkfall, skipuleggur mótmæli og tefur umferð…vegna þess að þú vilt eiga þrjár kýr.

BRESKT FYRIRTÆKI
Þú átt tvær kýr.
Báðar eru með gin-og klaufaveiki

… og komu óteljandi fleiri ríki.. sem ég ákvað að setja ekki þarna inn..

Þú upplýstir nú rétt áðan í Kastljósinu að þér fyndist ekki rétt að skipta út handónýtri stjórn í Seðlabankanum af því að það mætti ekki persónugera vandann sem væri í þjóðfélaginu.

Þetta hefur ekkert með persónur þessara manna að gera, þetta hefur með hæfni þeirra sem stjórnanda Seðlabankans að gera.

Ef þú treystir þér ekki til að skipta um í stjórn seðlabankans, þá hefur þú ekkert að gera í Stjórnarráðinu. Við þurfum mann (konur eru sko menn) sem getur tekið á vandamálunum.

Geir, þú ert rekinn.

Þetta er ekkert perónulegt!

Heyrði í morgun af manni sem vinnur hjá bresku fjármálafyrirtæki sem ég vil ekki nefna.

Þegar Landsbankinn íslenski komst á hryðjuverkalistann breska,  þá fékk þessi aðili samstundis sendan póst þess efnis að samskipti við þennan banka væri brot á landslögum.

Landsbankinn er eina fyrirtækið á þessum lista.  Þar má finna ýmis ríki og hryðjuverkahópa eins og Al Quaeda .. og svo Landsbankann.

Þessum aðila var gert ljóst að hann myndi umsvifalaust missa vinnuna, ef hann yrði staðinn að því að svo mikið sem ræða við nokkurn aðila sem tengist hinum íslenska Landsbanka.

Innskot: hey – það er búið að taka Landsbankann af listanum… vó… Gordon Brown að lesa bloggið hennar Helgu Völu..úúú