maí 2007

Kem auga á að Guðfríður Lilja er ræðukona kvöldsins hjá VG. Það verður að teljast sérstakt að kalla til manneskju sem ekki náði kjöri inn á þing. Hélt að VG hefði að skipa ágætis ræðufólk en þau hafa greinilega viljað kalla til utanþingskonu. Getur verið að Ömmi sé kannski fjarverandi? Það stendur amk ekkert um það á heimasíðu Alþingis.

Af hverju ætli Samfylkingin hafi ekki hringt í mig? Nei bara svona spurning… og nei ég er ekki spæld… ég er bara að reyna að vera fyndin.

Fallegur dagur.

Hrísgrjónin komin í pottin og tómatarnir og illgresið ítalska í skálina.

Dyrnar opnast.

Inn koma þrjú börn.

… ekkert þeirra á ég.

„hvar eru Ásta Júlía og Arnaldur?“ spyr ég þar sem ég horfi á krakkana fara upp á loft

„úti“ svara börnin.

„hvert eruð þið að fara“? spyr ég aftur…

„upp í herbergi“? svara börnin eins og ekkert sé sjálfsagðara en að þau gangi hér inn og fari upp á loft án þess að húsráðendur, börnin mín, séu heima til að taka á móti þeim.

Núna er klukkan átta, og ég þarf að tilkynna börnunum að þau eigi að koma inn. Mig langar bara að leyfa þeim að vera úti alltaf, þegar veðrið er svona dásamlega fagurt. Enda eru göturnar fullar af krökkum á hjólum, hlaupahjólum eða fótum.

Þetta er unaðslegt. Mikið er sumarið dýrlegt. Ég hlakka svo til að fá unglingana vestur.

10. Það væri nú alveg frábært að eiga svona pall við húsið til að sitja á og ylja sér í sólinni…

9. Hvenær ætli þeir komi, stólarnir í Kaffi Edinborg?

8. Hvað er það eiginlega með kaffibolla… af hverju þarf maður að borga hægri höndina fyrir þá?

7. Af hverju er verið að biðja mig um að borga flutninginn á klakavélinni?

6. Af hverju þarf maður að hringja og panta vöru í Ikea þegar maður er staddur inni í búðinni?

5. Brauðkörfur… ég gleymdi brauðkörfunum.

4. Afmæli, með sjóræningjaþema.

3. Starfsfólk – mig vantar fleira starfsfólk…

2. …sokkabuxnalaus í sandölum

1. Rosalega eru margir sem vinna við það að reyna að selja manni eitthvað…..

Það á að breyta ljóðlínunni: sumar, vetur, vor og haust í : vetur, vor, vetur, vetur.

Heyrði af sóma húsvíkingi sem sagðist ætlar út á blett hjá sér með spreybrúsann í von um að geta breytt ósónlaginu. Í von um að fá eitthvað af þessari hlýnun heimsins sem verið er að tala um.

Veit ekki hvort ég á að segja það, en ég er sammála honum.

Hér þurftum við Ásta Júlía að vaða skaflana til að komast í skólann. Bílar festast, enda er búið að skipa okkur að taka naglana undan bílnum.

Er að spá í hvort ég eigi að gera ekki neitt í dag – grafa mig í fönn og láta finna mig þegar fer að vora. Já ég sagði vora… það er 25. maí og ég þarf að fara út og moka af bílnum. Ef ég kem honum þá eitthvað úr hjólförunum.

Mér finnst þetta ferli allt hjá Framsóknarflokknum pínu ólýðræðislegt allt saman. Það er ekki gert ráð fyrir því að einhver taki það upp hjá sjálfum sér að verða formaður eða varaformaður eða eitthvað. Það er eins og það komi alltaf tilkynning frá aðalmönnunum hver eigi að taka hvað að sér.

Í fyrra ákvað Halldór að fara frá. Þá fór af stað eitthvað rosa ferli um að finna einhvern sem væri flottur í embættið. Siv vildi en greinilega hugnaðist annarri fylkingunni það ekki. Svo þá var Jón sóttur. Samt áttu þeir Guðna, sem þá var varaformaður og hefði örugglega fílað það vel að vera formaður. En það var einhvern veginn búið að ákveða eitthvað annað. Fylkingunni hugnaðist heldur ekki að Guðni yrði formaður.

Og nú er Jón farinn. Þá er verið að spá, hver verður formaður og hver varaformaður. Til að taka af allan vafa þá skrifaði Björn Ingi á heimasíðuna sína að hann ætlaði sér ekki í framboð EN hann hvatti um leið Valgerði Sverrisdóttur að gera slíkt.

Af hverju er aldrei beðið aðeins, til að sjá hverjir hafa áhuga, leyfa félögum í flokknum að spreyta sig. Það er eitthvað undarlegt við það þegar þungaviktarmenn, eins og Björn Ingi, taka svona afdráttarlausa afstöðu með einum félaga, sem auk þess langaði kannski bara að bjóða sig fram í formanninn,  og þá gegn öðrum sem kannski langaði að bjóða sig fram. Það þarf nú ansi sterk bein til að bjóða sig fram, hvað þá þegar formaður fylkingar hefur talað gegn framboðinu.

Spyr Kolbrún Bergþórsdóttir í dægurmálaþætti á Rás tvö. Umræðuefnið er Flateyri. Hún segir annars vegar að þegar fólk kjósi að búa úti á landi sé það dæmt til að búa við mjög einsleitt atvinnulíf, og hins vegar að það sé hættulegt að láta eina atvinnugrein stjórna litlu samfélagi. Hún skilur bara ekkert í því að fólk vilji búa úti á landi. Segir það mjög skiljanlegt að fólk sæki í örtröðina á suðvesturhorninu, að það vilji komast burt úr einverunni……

Það er greinilegt að Kolbrún Bergþórsdóttir hefur aldrei búið úti á landi.

Það er líka greinilegt að Kolbrún Bergþórsdóttir telur að sitt nærumhverfi sé betra en það sem aðrir hafa.

Það er gott að henni finnst það – og ég er líka himinlifandi yfir því að hún skuli þá fá að búa og starfa þar sem henni líður best. Á höfuðborgarsvæðinu.

Hvorki nú né áður fyrr eru allir sammála Kolbrúnu Bergþórsdóttur – hún hafði mikið fyrir því að segja að það mætti nú kannski ekki segja svona í útvarpinu – það má alveg – við hlustendur erum ekkert endilega sammála henni. Það er ekkert betra að búa í höfuðborginni þó að hún segi það, hún er bara að segja að sér finnist betra að búa í höfuðborginni. Það er fínt eins langt og það nær.

En þá vona ég líka að hún haldi ekki að hún tali fyrir hönd þjóðarinnar. Því við erum ekkert endilega sammála henni. Ekki frekar en fyrri daginn. Ekki öll að minnsta kosti. Ekki ég að minnsta kosti.

Enn er hægt að sækja um starf á Veitinga og kaffihúsinu í Edinborgarhúsinu sem opnar eftir um tíu daga. Nokkrir hafa sótt um en það er fínt að hafa góðan lista.

sendið á kaffiedinborg@hotmail.com

Ég ætla nú ekki að vera með neitt svartsýnisraus en það verður að skoða þessa hluti í þessu samhengi.

Viljum við í alvöru olíuhreinsunarstöð í einn af fallegustu fjörðum þessa lands?

Ég bara spyr!

Var að velta einu fyrir mér. Hvers vegna dettur engum í hug að Magnús Stefánsson verði formaður Framsóknarflokksins. Hann virkar eitthvað svo ærlegur og þægilegur maður. Hlustaði á hann í morgun og datt allt í einu í hug hvers vegna enginn hefur nefnt hans nafn þegar verið er að velta fyrir sér eftirmanni Halldórs og Jóns í stóli formannsins.

En jú… Guðni er jú formaður. Kannski verður hann það bara áfram.

Það er spurning hvað gerist næst hjá Framsókn. Nú er Guðni varaformaður. Vill flokkurinn hann sem formann? Hvað með þessi 45% sem vildu Siv sem formann? Af hverju var verið að draga þennan Jón úr Seðlabankanum fyrst að fyrir lá að ágæt kona vildi í stólinn. Og Guðni var það ekki á sínum tíma?

En nú er Guðni semsagt formaður. Spurning hvað það er módern. Spurning hvort að það verður samþykkt eða hvort fylkingarnar innan flokksins fari nú af stað og smali til að ná í flokksþing í haust eins og síðast.

Ég held samt að Jón sé að gera rétta hluti með þessu. Hann er ekki rétta manngerðin til að vera í þessu starfi. Hann er of gramur. Það hefur komið berlega í ljós undanfarna daga. Nú sjáum við bara það sem sýnt er í fréttunum og þá má iðulega sjá Jón strunsa framhjá fréttamönnum og hreyta einhverju í þá, næst koma þau Siv og Guðni og spjalla um ekki neitt, enda kannski ekkert að segja þannig séð – en þetta er svona spurning um að sýna smá kurteisi. Það er ekki eins og fréttamenn séu bara að reyna að slíta alla puttana af manninum. Bara, eins og ég hef sagt áður, að vinna vinnuna sína. Sama hversu fúll maður er yfir ástandinu þá verður maður bara að láta það eiga sig og hegða sér eins og manneskja. Ég er einmitt að kenna ungu börnunum mínum þetta. Þær eldri eru búnar að læra þetta, en þau yngri eru að læra það, að koma fram við fólk af kurteisi. Þau eru 4 og 6 ára.

Hvað er Jón gamall?