Grímur Atlason80 milljarðar á ári!
Óflokkað | Ummæli (17) Facebook
Til hamingju! Iceland Airwaves tónlistarhátíðin er að bresta á. Nærri 300 listamenn, 280 tónleikar og annað eins „off-venue“, frábær tónlist, blátt lón, bestu pylsurnar og almenn gleði í borginni í tæpa viku. Yfir 2300 erlendir gestir heimsækja hátíðina, þar af um fjögur hundruð blaðamenn og fólk sem starfar í tónlistariðnaðinum og hefur verið óspart á fögru orðin í erlendum fjölmiðlum í garð lands, borgar og listamanna undanfarin ár. Íslenskt tónlistarlíf nýtur virðingar út um allan heim. Hér sé stuð!
Fyrir nokkrum árum var gerð rannsókn á því hverjar gjaldeyristekjur þjóðarinnar af hátíðinni væru. Á þeim tíma námu þær um 350 m.kr. en þá voru gestirnir 1700 og dagarnir fjórir en ekki fimm eins og í dag. Varlega áætlað má því gera ráð fyrir að erlendir gestir eyði 760 m.kr. þessa daga í október og þá eru flug ótalin. Íslendingar eyða öðru eins og er veltan vegna hátíðarinnar vart undir 1500 m.kr. Virðisaukatekjur ríkissjóðs og aðrar skatttekjur eru á bilinu 150 til 300 m.kr. Þetta eru beinharðir peningar og er þá ótalin sú landkynning sem hátíðin hefur stuðlað að sl. 11 ár. Orðspor hátíðarinnar hefur borist um allan heim sem sést best af fjölmiðlaumfjöllun í Japan, Brasilíu og alls staðar þar á milli. Framlög ríkisins í tónlistarsjóð, listamannalaun og o.fl. er fjármagnað með tekjum af Iceland Airwaves.
Það hefur löngum verið lenska á Íslandi að gera lítið úr peningalegum arði skapandi greina. Listamenn mæta enn í dag talsverðum fordómum. Það þykir dyggð að vinna með höndunum og moka eins og einn skurð á dag. Þetta er allt gott og blessað en staðreyndin er sú að velta í skapandi greinum er um 80 milljarðar samkvæmt bráðabirgðaniðurstöðum kortlagningarverkefnis sem nú er í gangi. Til samanburðar er velta íslenska landbúnaðarins um 25 milljarðar og kerfið nýtur um 10 milljarða niðurgreiðslan úr ríkissjóði. Menning og listir og þá ekki síst poppkúltúrinn er alvöru atvinnugrein og þjóðin hefur í raun öðlast sjálfsvirðingu með útrás Bjarkar, Sigur Rósar, Iceland Airwaves og þess mikla fjölda listamanna sem eru á ferðalagi um heiminn á hverjum tíma. Nágrannaþjóðirnar öfunda okkur af þeim frábæru listamönnum en það virðist vera erfitt að vera spámaður í eigin föðurlandi.
Stuðningur Icelandair og Reykjavíkurborgar er ómetanlegur fyrir Iceland Airwaves. Hátíðin er gríðarlega vítamínssprauta fyrir ferðamannaiðnaðinn yfir vetrarmánuðina. Þrátt fyrir þetta er staðreyndin sú að rekstur hátíðarinnar er í járnum. Starfsmenn eru allir í hlutastarfi og á lágum launum. Ríkið styrkir hátíðina ekki um eina einustu krónu! Til samanburðar er vert að nefna að sambærileg hátíð í Osló, by:Larm nýtur styrks að fjárhæð 30 m.kr. frá Oslóborg og 20 m.kr. frá norska ríkinu. Sömu sögu er að segja um M for Montreal sem er u.þ.b. 5 sinnum minni í sniðum en Iceland Airwaves. Út um alla Evrópu má síðan finna hátíðir sem njóta umtalsverðra opinberra styrkja: c/o pop og Reeperbahn í Þýskalandi, Spot í Danmörku og Eurosonic í Hollandi – svo einhverjar séu nefndar. Það er skilningur fyrir því í þessum löndum að með því að leggja aur í komi króna til baka. Iceland Airwaves stenst fullkomlega samanburð við þessar hátíðir og telja reyndar margir gesta hátíðarinnar að hún sé sú besta sinnar tegundar í heiminum í dag.
Að styrkja hátíð sem þessa veitir henni möguleika á að lifa og dafna um leið og það eflir tekjumöguleika og samstarfsverkefni við erlenda aðila. Hátíðin skilar ríki og borg umtalsverðum fjármunum svo ljóst er að yrði hátíðarhöldum hætt sökum fjárskorts yrðu þessir opinberu aðilar af töluverðum tekjum. Hugsum því heildrænt – hugsum um menningu um leið og við hugsum heildrænt um þann ávinning sem fæst af tónlistarhátíð sem þessari.
Það er ástæða til að óska okkur öllum til hamingju með 3. vikuna í október ár hvert í Reykjavík!
Grímur Atlason @ 13. október, 2010
Þessi grein hefur öll einkenni þess íslendings sem útrásin sjálf byggðist á. Hef ekki orðið var við neina sérstaka öfund erlendis hvorki vegna tónlistar né fjármála. Tónlist á íslandi nýtur verulegra styrkja og þarf að skoða heildardæmið áður en menn byrja að reikna. Hinsvegar er greinin góð ábending um hvað er í raun hægt að gera með því að auka hér ferðamanna iðnaða og ráðstefnur. Gallin er bara sá að veltan og innkoman er fyrst og fremst í láglaunastörfum með litla menntunarkröfu
Hátíðin er auðvitað frábært framtak en held hún skili ekki svona miklu samt. Þykir 65 000 kr per dag per gest full hátt reiknað. En svo eru jaðaráhrif því menn koma kannski seinna “ aftur í netið“ og þetta styður hvað annað.Dropinn holar steininn.
Hitt er svo annað mál að hér væri ekkert menningarlíf ef aðeins peningaleg innkoma væri lögð til grundvallar.
Ef þetta er svona rosaleg gott og velta listamanna sé svona svakalega mikil ásamt öllum þeim hagnaði sem ríkið fær af þeim, afhverju getur þá listin ekki borgað undir sig sjálf? Hvar er allur peningurinn sem tónlistarmenn fá í gegnum STEF? þar er sérstakur skattur lagður á allar vörur sem hægt er að nota til að spila eða geyma tónlist sem rennur beint til samtaka á vegum tónlistarmanna. Það eru allir að borga undir rassinn á ykkur og þið getið ekki einu sinni tekið því að þið séuð gagnrýndir og að framlög úr sameiginlegum sjóðum landsmanna sem annars væri hægt að nota til að halda úti fæðingardeildum og bjarga lífum ófæddra barna og mæðra þeirra. eru þið ekki aðeins of sjálfumglaðir?
Einkenni útrásar? Ég hef haldið því fram lengi og geri enn að menning og listir sé eina útrásin sem hefur virkað í þessu landi. Arnaldur Indriðason í Þýskalandi, Snorri Sturluson (all over the place), Björk, Halldór Laxness og Iceland Airwaves. Ekki blanda mér á neinn hátt við þetta útrásarsjitt.
Tölurnar eru byggðar á könnun – ekki updiktuðum hlutum. 4,5 dagar á Íslandi á hóteli, skoðunarferðir og tónlistarhátíð, matur, minjagripir og það áfengi sem fólk kaupir sér, ferðalög o.fl. – 230.000 kr. er sko ekkert skot í myrkri.
Moka skurði…moka skurði…
Ég verð tilbúinn með kúbeinið þegar drukknir tónleikagestirnir ætla að æla og pissa á húsið mitt.
Í fyrra kom út mjög góð og ítarleg úttekt á umfangi skapandi iðna í Ástralíu, sem sýnir glögglega mun meiri vöxt en í öðrum atvinnugreinum allan liðinn áratug. Í henni er að finna góðar skilgreiningar og lýsingar á umfangi og þróun þessara greina í hagkerfinu. Skýrsluna má nálgast í heild sinni hér:
http://www.apo.org.au/research/creative-industries-economic-analysis-final-report
Í nýrri skýrslu, sem gerð var á vegum norrænu ráðherranefndarinnar um vöxt og viðgang skapandi iðna í Rússlandi (þar sem ríkisafskipti hamla þróun) má lesa að heimsviðskipti með skapandi menningarstarf aukist árlega um 8.7% samkvæmt útreikningum Sameinuðu þjóðanna. Það er langt umfram meðalaukningu annarra viðskipta.
Fannarh – 150 m.kr. sem ríkið fær í kassann (amk) getum við notað til að greiða undir pylsfaldakapítalismann…
230.000.kr á haus í 5 daga er alveg sennileg tala en það gera rúmar 500 milljónir sem vel gæti verið rétt en ekki 760 milljónir. Mér finnst ég rekast mest á low budget ferðamenn í bænum í tengslum við Airwaves en svo koma þeir kannski seinna og eru þá orðnir middle class og eyða á meiru.Hinsvegar er rennt blint í sjóinn því engin veit þetta fyrir víst.
eru listamenn ekki einmitt pilsfaldar kapítalistar? þeir vilja selja sína list og græða á henni en vilja ekki sleppa hendinni af fjárframlögum frá ríkinu. er það ekki einmitt skilgreiningin á pilsfaldarkapítalisma?
Afsaka ég var að draga úr þessum tölum. Reikningurinn stendur – 760 m.kr. 2300 gestir (sem eru ekki einhverjir aular – þau eyða peningum)…
Gallinn við þennan peningalega málflutning er að hann er byggður á tilfinningu frekar en upplýsingum. Því miður virðast upplýsingar almennt ekki liggja fyrir um eyðslu erlendra ferðamanna á Íslandi undanfarin ár.WWW.RMF.Is hefur ekki kannað þetta lengi lengi sem er undarlegt.
Ef við gefum okkur að gestur komi einn og í eins manns herbergi á Airwaves og sé í 5 nætur þá gæti eyðslan verið þessi m.v. mikla eyðslu
Gisting, 500 Eur
Bílal.bíll, 500 Eur
Matur, 500 Eur
Vín og óvænt, 500 Eur
Miði, 70 Eur
Þetta gera 318 000 kr en hinsvegar held ég að bílaleigubílinn sé örugglega ekki tekin af gestum Airways en í staðinn koma hugsanlega ferðir.Þá er einnig borðað dýrt samkvæmt þessu en almennt þykir ferðamönnum matur dýr hér nema í hádeginu.Borða því flestir núðlur, pylsur og pasta.
Held hinsvegar að talan 230.000. kr fyrir Airwawes gest sé sennilega.Sem gera 500 milljónir, sem er ágætt.
Geri mér alveg grein fyrir að pistill þinn var skrifaður líka fyrir rímið og stuðlana. Legg til að þið bjóðið þeim sem kaupa miða á Airwaves í útlöndum að taka þátt í könnun. Það væri bara gott fyrir ykkur og ferðamannaiðnaðinn. Svo getur vel verið að Rannsóknarstofa í Ferðamálum geri það fljótlega því engin aðili virðist hafa gert það lengi lengi, jafnvel aldrei en finn þó könnun frá 1997 á netinu.
Ekki tilfinningarök. Það var gerð könnun árið 2005. Erlendir gestir Airwaves eru ekki bingó- eða núðluferðamenn frekar en aðrir hópar. Þeir koma off-season og eyða peningum hér. Þeir eyddu 350 m.kr. (án flugs) árið 2005 – þá voru þeir 1700 í 3,5 daga. Upphæðin var í Evrum og ef við værum algjörir svindlarar myndum við nota þá upphæð og margfalda hana með hruni krónunnar. Gerum það ekki heldur notum krónutöluna og bætum við 1 degi og 600 ferðamönnum og síðan vísitölunni. Þess vegna kemur 762 m.kr. Bætum flugum við þá er talan rétt um milljarður. Hér eru engar ýkjur eða rugl. Það er hins vegar staðreynd að með hruni krónunnar eyða erlendir ferðamenn meiri peningum hér.
230 þúsund er eina ranga talan sem ég hef notað – ég misreiknaði mig.
Grímur minn. Flott grein hjá þér og lifandi. Þetta hérna er hinsvegar hrikalega hallærislegt: „telja reyndar margir gesta hátíðarinnar að hún sé sú besta sinnar tegundar í heiminum í dag“.
Svona eiga Íslendingar ekki að tala í dag. Það fer þeim ekki.
Fyrir utan vitleysuna: hverjir eru þessir „margir“, hver er þessi „tegund“ af hátíð, og í hvaða „heimi“ er þetta, þ.e. heimshluta og tónlistarmenningu?
Hversvegna eru viðbrögð fólks við þessum pistli svona neikvæð? Hvernig stendur á því að fólk getur ekki unnt þeim sem vinna við skapandi greinar að afla tekna og tala um þær tekjur? Ég get ekki betur séð en Grímur sé að fjala um jákvæða hluti, að það komi yfir 2 þús manns til landsins á umræddum jaðartíma og eyði peningum. hvort það er 50 eða 60 þús kall á dag eru hártoganir. Það er önnur hátíð sem er líka styrkt af Icelandair, Nefnilega Food and fun og þótt hingað til lands komi töluvert færri gestir til að taka þátt í því heldur en airaives er hún styrkt af landbúnaðarráðuneyti og ísladsstofu.
Hvaðan koma þessar hugmyndir manna um að listamenn fái svo mikla peninga frá skattgreiðendum? Hvar sér þess stað í fjárlögum? Þeir komast amk. ekki með tærnar þar sem t.d. bændur eru með hælana.Við getum ekki veitt fisk án þess að útgerðin fari á hausinn, við getum ekki selt landbúnaðarvörur okkar. Við erum búnir að reyna minka-,refa- og fiskirækt og allt ferm á hausinn. Fyrir utan ál er hugvit og sköpun það eina sem skilar meiri tekjum en skuldum og enn hefur ekki gætt neinnar sölutregðu í menningarafurðum. Og vegna þess fyrirsjáanlega: Heiðurslaun listamanna eru verðlaun ekki vinnulaun.
Fann bækling frá Ferðamálastofu og þá reynist meðaltalseyðsla ferðamanna vera 330 000 á haus á árinu skv. spá. Í þeirri tölu eru farmiðakaup og skv. því er þetta meðaltalseyðsla. Gjaldeyristekjur eiga að verða skv. spá um 145 milljarðar á árinu. Þannig að gestir á airwaves skila okkur 8% af gjaldeyristekjum Ferðaþjónustunnar í október og þeir eru um 8% ferðamanna til Íslands þann mánuð. Það er auðvitað frábær árangur að einn af hverjum tólf ferðamönnum skuli vera að fara á Airwaves og skilur á milli feigs og ófeigs einhvers staðar. Um leið segir þetta okkur hvað ferðaþjónustan er samt hræðilega lítil hér ennþá.Þess vegna er sennilega til mikils að vinna með því að setja upp fróstrósahátíð í desember ?
„Varlega áætlað má því gera ráð fyrir að erlendir gestir eyði 760 m.kr. þessa daga í október og þá eru flug ótalin. Íslendingar eyða öðru eins og er veltan vegna hátíðarinnar vart undir 1500 m.kr.“
Íslendingar eyða öðru eins á þessum tíma, búandi ekki á hótelum eða farandi í bláa lónið? Er það ekki svolítið ruglaður reikningur.
Annars þá finnst mér loðdýraræktarrökin fín – við höfum lengi verið í því að ríkið eigi að „skapa störf“ og svolítið sérstakt hvað það má samt alls ekki renna til listamanna – glórulaus loðdýrarækt eða fiskeldi má samt fá milljarða. Reyndar tengist það líka byggðastefnu.
Airwaves hefur sannað sig, held að það væri líklegast ekkert að því að styrkja þetta um eitthvað. Annars eru milljón sjálfbærir hlutir á Íslandi líka. Skil ekki af hverju þetta getur ekki bara verið eitt af því – óháð því að bændur fái styrki. Þarf miðaverð ekki bara að hækka – þetta selst alltaf upp!