Grímur AtlasonHeimssýn vs. Highlands and Islands
Óflokkað | Ummæli (4) Facebook
Heimssýn er á móti aðildarviðræðum við ESB. Það hefur legið fyrir lengi og ætti ekki að koma neinum á óvart. Þau hafa haldið uppi and-sambandsáróðri um árabil. Rökin hafa verið misgóð og stundum jafnvel alveg á brúninni. Í dag héldu samtökin fund þar sem þau fóru m.a. yfir meinta vonda reynslu Skota af aðild. Sjávarútvegsstefna sambandsins og aðild Breta ku hafa haft ægileg áhrif á hinar dreifðu byggðir.
Einföldun Heimssýnar í tengslum við sjávarútvegsstefnu ESB og áhrif hennar á Skotland er fyrirséð. Hrun fiskistofna og ofveiði sl. 100 ára er samkvæmt Heimssýn sjávarútvegsstefnu ESB að kenna. Hér er auðvitað bara verið að slíta hlutina úr samhengi. Hinar dreifðu byggðir Skotlands gengu í gegnum það sama og við erum enn að ganga í gegnum. Ég held að misheppnuð byggðastefna Íslands sl. áratugi geti vart talist fyrirmyndarstefna. Stöðug fólksfækkun og hrun sjávarbyggða og landbúnaðarhéraða er staðreynd. Það þurfti ekkert ESB þar – bara okkur sjálf.
Meint vond staða Skota er í raun firra þegar byggðastefna þeirra í samstarfi við ESB er skoðuð. Skotar hafa unnið gríðarlega mikið í sínum málum í samstarfi við Evrópusambandið og árángurinn er eftirtektarverður. Þekktasta áætlunin er Highlands and Islands sem hefur verið í gangi undanfarin ár. Hér er á ferðinni byggðastefna sem virkar – nokkuð sem við gætum horft til og lært af hér á Ísa-landi. Byggðirnar sem risið hafa úr ládeyðu og vesæld út um allt Hálendið og á Eyjunum eru til marks um öfluga byggðastefnu. Heimssýnarmenn hafa án efa ekki minnst einu orði á þær stórkostlegu breytingar sem þetta verkefni hefur haft í för með sér fyrir Skota.
Highlands and Islands verkefni hafa fengið milljarða úr sameiginlegum sjóðum ESB undanfarin ár. Þessi metnaðarfulla áætlun hefur skilað gríðarlega miklu til samfélagsins og eru til fyrirmyndar. Þetta er hægt þegar þúfnahugsunin víkur fyrir víðsýninni!
Nokkrir athyglisverðir tenglar hér:
https://www.europe.org.uk/regions/contact/-/id/23437/
http://www.hie.co.uk/europedirect.html
http://www.scotland.gov.uk/News/Releases/2006/12/28110451
Grímur Atlason @ 16. júní, 2009
Ég hef kynnt mér skoskan sjávarútveg. Það eru miklar ýkjur að það hafi verið einhver ofveiði í Norðusjónum og hvað þá í 100 ár. Það eru líka ýkjur að skoskur sjávarútvegur hafi lifað á miklum styrkjum. Drjúgur hluti af styrkjum Evrópusambandsins hefur farið í úreldingu á fiskiskipaflotanum, en mig minnir að samkvæmt mikilli úttekt sem Tony Blair lét gera fyrir nokkrum árum á breskum sjávarútvegi, Net Benefit, þá hafi verið sýnt fram á hagnað bresks sjávarútvegs.
Breskur sjávarútvegur hefur farið mjög illa út úr sömu stefnu og fylgt hefur verið hér hvað varðar vitavonlausa uppbyggingu fiskistofna sem hefur gengið út á að veiða minna til að veiða meira seinna en þetta seinna hefur aldrei komið þar frekar en hér. Það er nánast búið að eyða skoska fiskiskipaflotanum og veiðin er brot af því sem hún var þegar hin meinta uppbygging hófst, en samt er stöðugt reiknuð út meiri og meiri ofveiði.
ICES, Alþjóða hafrannsóknarráðið hefur mikil tök á útfærslu og stefnu Brussel í fiskveiðimálum og eru sumar hverjar mjög í ætt við það sem er að finna í stefnu Vg í sávarútvegsmálum s.s. að takmarka veiðar í blönduðum botnfiskveiðum út frá þeirri tegund sem reiknast minnst hverju sinni! Ef lítið reiknast af ýsu en mikið af þorski þá lagt til að dregið verði ennfrekar úr veiðum til að ná upp ýsunni.
Nýleg útfærsla Evrópusambandsins á því hvernig á að stjórna veiðum í Norðursjónum til þess að „byggja upp stofninn“ er brjálæðislega flókin þar sem takmarkanir á veiði verða ekki einungis ákveðnar með kvótum sem reiknaðir eru út frá meintri stofnstærð, heldur á einnig að takmarka veiðar með að takmarka ennfrekar sókn með þeim litla fiskveiðiflota sem eftir er.
Þessari óábyrgu stjórn hér og í Norðursjónum er haldið áfram þrátt fyrir að veiðar ganga sinn vanagang í Færeyjum og Barentshafinu þar sem veitt er ár eftir ár langt umfram ráðlagða veiði reiknisfiskifræðinganna.
Eins og venjulega erum við sammála um ýmislegt Sigurjón, annað er byggt á misskilningi og enn annað erum við algjörlega ósammála um. Til þess að það sé á hreinu að þá hef ég ekki haldið því fram hvorki fyrr né nú að skoskur sjávarútvegur hafi lifað á miklum styrkjum. Nefni það ekki. Ég er að tala um misheppnaða byggðastefnu á Íslandi og árangursríka byggðastefnu í Skotlandi. Sjávarútvegsstefna Íslendinga er galin og veiðistjórn ESB hefur ekki verið til að hrópa húrra fyrir – en það er ekki kjarni málsins. Hann er sá að ESB hefur ekki lagt byggðir í rúst í Skotlandi – byggðastefna sem ESB styrkir m.a. er að blása nýju lífi í byggðirnar.
Kynnti mér nýlega styrkjakerfi ESB í byggðamálum, sérstaklega nýustu byggðaáætunina sem gildir til 2013, Cohesive Plan.
Það skiptir greinilega miklu máli hvers konar skilgreiningu Ísland og eða einstök íslensk byggðarlög fá innan styrkjakefis ESB.
Hér eru miklir möguleikar, ekki bara á stykjum heldur líka á fagþekkingu!
Cohesive Plan byggir á því að jafna kjör inna sambandsins, að vinna að því að lyfta þeim sem ver standa upp á sama plan að það sem best gerist.
Vonandi verður Heim-sýnar leiðin ekki farin…
Ég stóð reyndar ekki í þeirri meiningu að þú værir að halda því fram að breskum sjávarútvegi væri haldið uppi á styrkjum en það er ein af þeim sögum sem ganga hér og oftar en ekki haldið fram af þeim sem vilja halda áfram óbreyttu kvótakerfi í sjávarútvegi.