Bryndís Ísfoldgætir ekki orða sinna

Hljómar ógeðslega er það ekki?

En ef þú er að spyrja þig hvað þú eigir að gefa einhverjum í jólagjöf sem á ,,allt“ – eða eru sjálf/ur með tóman óskalista – þá eru ormalyf, moskítónet, næringamjólk, orkukex vatnshreinsitölflur og vatnsbrunnar – besta jólagjöfin.

Hvað er meira í anda  jólanna en að gefa einhverjum gjöf sem kostar 1247 krónur og  gefur 300 börnum lyf sem hreinsar sníkjudýr úr meltingafærum þeirra svo þau séu ekki lengur máttvana og lasin?

Eða gefa einhverjum 10.000 vatnshreinsitöflur sem hreinsa 50 þúsund lítra af vatni og tryggt að fjöldi barna sem búa nú við mengað vatn geti drukkið hreint vatn – fyrir aðeins 6.960 krónur?

UNICEF – Barnahjálp Sameinuðu þjóðanna er fullkomnasta jólagjafabúðin. Verslaðu hér.

Nú væri gott að draga fram lakkskónna, fína gelið og smella rauðri slaufu í hárið, því upphitun jólanna er að hefjast.  En eins og öll skemmtileg félög þá mun Já Íslands, félag evrópusinna taka þátt í upphituninni.  Á morgun verður haldið jólapubquiz á Kaffi Sólon 2 hæð og hefst fjörið kl 20.30 – þar mun hinn frækni Ske-maður og þingmaðurinn Guðmundur Steingrímsson mun spyrja fólk um allt á milli jóla og Evrópu. Og eins og lög gera ráð fyrir verða verðlaunin einn bjórkassi.

Til að sjá til þess að við komumst örugglega í hátíðarskap mun svo hin eina sanna drottning jólalaganna Helga Möller mæta á svæðið og syngja fyrir okkur nokkur lög.

Hér má sjá viðburðinn á Facebook.

Sem sagt, jólapubquiz, Helga Möller, jólabjór, piparkökur og evrópusinnar.

Getur hreinlega ekki klikkað.

Bjór á tilboði!

Allir Evrópusinnar velkomnir.

Stórhættuleg hollensk kú

Internetið er skemmtilegt því þar má finna margt gamalt og gott sem er endurnýtanlegt, svo sem gömul svör við endurnýttum mýtum – eins og þessa hressilegu grein eftir Gylfa Magnússon sem ég birti í tilefni tillögu Jóns Bjarnasonar (já aftur!) um að banna allan innflutning á kjöti (hráum eða guðforðiokkur  – lifand!)  ef við göngum í ESB, allt í nafni þess að tryggja hið meinta ,,fæðiöryggi“ landsmanna. (og koma í veg fyrir að heilbrigða samkeppni og auðvitað möguleikann á því að við fáum að kaupa mat á lægra verði)

Þó tillaga Jóns hafi komið fram í gær  – er svar Gylfa síðan 1993.

Nokkrar athugasemdir um landbúnað

eftir Gylfa Magnússon

Áður birt í Morgunblaðinu 29. ágúst 1993.

Nokkur umræða hefur orðið um landbúnaðarmál í fjölmiðlum undanfarið og er það vel því að okkur Íslendingum verður vart hugsað nógu oft og mikið og hlýlega til þessarar undirstöðuatvinnugreinar. Þó er ýmislegt gagnrýnivert sem haldið hefur verið fram í þessum umræðum og er þessi bréfstúfur ritaður til að leiðrétta margs konar misskilning og brýna forsvarsmenn landbúnaðar til enn betri verka en áður.

Fyrst er þess að geta að svo virðist sem einhverjir óttist að Íslendingar muni upp til hópa hætta kaupum á innlendri framleiðslu ef þeim bjóðast erlendar landbúnaðarafurðir. Þetta er vitaskuld mesta firra enda vita allir sem neyðst hafa til að innbyrða þessar erlendu vörur eftir að hafa verið aldir upp á íslenskum náttúruafurðum að þær fyrrnefndu eru vart mönnum bjóðandi. Þó kann að vera að einhverjir Íslendingar hafi svo annarlega bragðlauka að þeir telji til dæmis Frakka standa framar þeim í Flóanum í Camembert framleiðslu eða að afurðir argentískra nautgripa séu hæfar í annað en skógerð. Slíkt fólk getur þó vart verið margt utan marmarahallar viðskipta- og hagfræðideildar Háskóla Íslands og því vart við því að búast að það skipti sköpum fyrir eftirspurn eftir íslenskum landbúnaðarafurðum þótt það taki að kaupa erlendar afurðir. Margir eru líka eflaust þeirrar skoðunar að það sé bara gott á þetta lið að þurfa að svæla í sig götóttum ostum og öðru erlendu trosi. Ég tel því vart réttlætanlegt að banna innflutning landbúnaðarafurða á þeim forsendum. Þetta skiptir þó engu máli því að innflutningur landbúnaðarafurða er vitaskuld ekki bannaður af ótta við að einhverjir dragi úr neyslu á íslenskum afurðum. Innflutningur er eins og almenningur veit bannaður vegna þess að erlendar landbúnaðarafurðir og þá einkum ket eru að stórum hluta framleiddar úr alls konar veirum og bakteríum, hormónum, E-efnum og öðrum ófögnuði eins og glögglega má sjá á líkamsburðum og heilsufari neytendanna. Það kemur vitaskuld ekki til greina að hætta á að íslenska sauðkindin eða annar innlendur búfénaður fari að blanda blóði eða öðrum líkamsvessum við steikur af þessum erlenda stofni sem vafalaust myndu flækjast upp um jafnt fjöll sem dali ef innflutningur væri leyfður.

Forsvarsmenn hinna ýmsu þjóðþrifasamtaka hafa verið ötulir við að benda á þetta bæði í ræðu og riti og er því óþarfi að fjölyrða frekar um þessa hlið málsins. Það er þó önnur hlið sem lítið hefur verið fjallað um og taka þarf föstum tökum. Það er nefnilega svo að þrátt fyrir innflutningsbann berst hingað mikið af erlendu keti, mismikið meltu. Fyrst er þess að geta að alls konar fuglar hafa vanið komur sínar hingað eftir vetursetu í löndum böðuðum hormónum, veirum og bakteríum. Þetta verður auðvitað að taka fyrir enda auðsætt að sauðkindinni stendur mikil ógn af þessum illfyglum. Úrtölumenn kunna að tuða að það sé illframkvæmanlegt eða dýrt að hindra flug þessara fugla en ég tel að sauðkindin eigi þetta inni hjá Íslendingum eftir að hafa haldið í þeim lífinu öldum saman og veitt ómetanlegan félagsskap í fámenninu.

Annað ket berst einnig hingað til lands flugleiðina, að sönnu yfirleitt nokkuð melt en engu að síður stórhættulegt. Hér á ég að sjálfsögðu við þann ósið ferðamanna að belgja sig út af alls konar erlendu gumsi áður en þeir halda til Íslands og vaða síðan yfir landið með innyflin troðin af þessum ófögnuði. Sannir vinir sauðkindarinnar fasta vitaskuld í nokkra daga áður en þeir snúa heim ef þeir eru þá yfirleitt nokkuð að flækjast til útlanda enda fátt þangað að sækja nema annarlegar hugmyndir. Aðrir gera þetta því miður ekki. Nú er ég enginn ofstækismaður og vil því ekki leggja blátt bann við þessu sífellda rápi til útlanda en geri að tillögu minni að Íslendingar verði látnir laxera duglega við komuna til landsins og úrganginum eytt á öruggan hátt. Ferðir útlendinga um Ísland er sennilega best að banna með öllu enda margir nokkuð ketmiklir.

Forsvarsmenn bænda benda alls ekki nógu oft á þá miklu hættu sem er á að aðflutningar til landsins stöðvist og þá væri slæmt að vera t.d. upp á Dani kominn með spægipylsu eða Svisslendinga með osta. Raunar finnst mér að Íslendingar taki þessa hættu alls ekki nógu alvarlega og sumir virðast meira að segja halda að heimsstyrjöld sé ekki yfirvofandi með viðeigandi töfum á flutningi landbúnaðarafurða á milli landa. Það ætti að vera nóg að benda slíku fólki á legu landsins en allir sem eitthvað kunna í landafræði geta séð að ýfingar með Norðmönnum og Grænlendingum myndu koma mjög illa við Íslendinga. Vegna þessa þyrfti helst að auka íslenska landbúnaðarframleiðslu talsvert og um leið ættu Íslendingar að sjá sóma sinn í því að verða sjálfum sér nógir um helstu nauðþurftir og hefja strax framleiðslu dráttarvéla og annarra landbúnaðartækja sem helst þyrfti að vera hægt að knýja með mó því að hætt er við að erfiðlega gangi að fá olíu til landsins ef heimsstyrjaldir verða mjög tíðar eða langvinnar hér á norðurhjara. Þessar ábendingar snúa einkum að stjórnvöldum en allur almenningur getur vitaskuld lagt sitt af mörkunum, t.d. þannig að búa sig undir langvarandi sult og seyru með því að hlaupa duglega í spik.

Ég hef hingað til reynt að hvetja allar konur áfram, líka þær sem ég er ekkert sérstaklega sammála, á meðan þær standa fyrir breytingar sem eru byggðar á reynslu og menningu kvenna og leiða til bættara samfélags, þó leiðirnar séu ekki alltaf þær sem ég hefði valið.

Í dag bauð kona sig fram sem formaður Sjálfstæðisflokksins, hún segist vera kona sem vilji meiri samvinnu, sátt og ,,ný stjórnmál“.  Á sama tíma segir hún að verði hún kosin formaður Sjálfstæðisflokksins ætli hún að koma í veg fyrir að þjóðin fái í eitt skipti fyrir öll að kjósa hvort hún vilji standa innan eða utan ESB.

Ákvörðun sem 65% landsmanna vilja fá að taka sem einstaklingar, ákvörðun sem 65% landsmanna vilja ekki að stjórnmálaflokkarnir taki fyrir sig, en sú kona sem nú stígur fram byrjar fyrsta daginn í framboði á að ætla að stöðva lýðræðislegt ferli og skerða ákvörðunartökurétt þinn sem kjósenda.

Það mun eingöngu bæta á þá óeiningu sem er í samfélaginu og  koma í veg fyrir að sátt náist í þessu stóra máli – í stað þess að leiða það til lykta. Það er nefnilega eitt að vera á móti inngöngu í ESB og eitthvað allt annað að treysta ekki fólkinu í landiu til þess að taka ákvörðun um framtíð sína sjálft.

Til að toppa sig þá sagði hún einnig í dag að sú 30% lækkun sem hefur orðið á rástöfunartekjum okkar eftir hrun væri óásættanleg -algjörlega án þess að nefna að þá lækkun má tengja meira og minna þráðbeint við krónuna sem er jú ein helsta ástæðan fyrir því að við ættum að ganga í Evrópusambandið.

En nei, hún ætlar að sjá til þess að við fáum ekki að taka þá ákvörðun, og tryggja þar með að við sitjum uppi með handónýtan gjaldmiðil um aldur og ævi.

Konur sem tala um eitt og meina annað – boða nákvæmlega sömu sérhagsmuna- og forsjáhyggju stjórnmál sem hafa verið hér við lýði í höndum karla í áratugi. Því miður.

Hún: Heyrðu,  það var bara allt hvítt fyrir norðan

Hann: Já, það á líka að vera snjór hér í október en hlýnun jarðar hefur breytt því

Hún: Já ætli það ekki

suð í bakgrunni: ,,og Ísland verður að standa á eigin fótum..“

Hún: Ekki ertu að hlusta á Útvarp Sögu?

Hann: Jú

Hún: þú veist það kemur mikið af rangfærslum frá þeim sem tala á þeirri stöð

Hann: Ha!

Hún: Já, sérstaklega um Evrópusambandið

Hann: Ert þú ein af þessum sem vill ganga í Evrópusambandið?

Hún aðeins of áköf: jú einmitt

Hann: (fuss og svei) Ísland á að vera áfram sjálfstætt ríki

Hún: já, sammála eins og Danmörk, Svíþjóð og Finnland

Hann:  Ha! og snýr sér snögglega við.

Hún: þau eru sjálfstæð ríki er það ekki?

Hann undrandi: ha.. jú jú þannig

Hann: Við þurfum ekkert á þessu Evrópusambandið að halda, bara ekki neitt, við getum bara séð um okkur sjálf.

Hún: Já, en við erum auðvitað að hluta í Evrópusambandinu í gegnum EES og hvort sem er, en hvort erum við ,,sjálfstæðari“ við að sitja við borðið þar sem ákvarðanirnar eru teknar eða sitja út á gangi eins og nú er í gegnum EES?

Hann: Evrópusambandið er ekkert  nema reglur og ef við göngum inn þá verðum við að breyta öllum reglum um vinnulag hér fyrir vinnandi stéttir, ég vil það ekki

Hún: Já en við höfum innleitt í íslensk lög megnið að vinnulöggjöf ESB ef ekki alla.

Hann: Við eigum bara ekkert að vera í sambandi við þetta Evrópusamband, punktur.

Hún: ha! meinarðu að fara úr EES?

Þögn.

Hún: En ok, hvernig á sjá til þess að atvinnulífið blómstri hér undir höftum og tryggja ungu fólki vinnu?

Hann: við eigum bara að fjölga störfum í sjávarútvegi og landbúnaði..

Hún: en ungt fólk ætlar sér ekki framtíð í þeim greinum .. og meira segja hafa ungir Íslendingar sagt í könnunum að þau ætli sér að búa í ESB, bara spurning hvort Ísland verði í ESB svo þau mögulega kjósi að búa hér áfram.

Hann hastur:  heyrðu góða mín, er þetta ekki húsið?

Ljósmynd af sýningunni: Draumaland myrkursins

Árið 2008 þótti mér maðurinn minn vinna of mikið og hvatti hann til að gera eitthvað fyrir sjálfan sig.  Ég stakk upp á að hann færi í fjallgöngu eða eitthvað slíkt.  Hann lagði höfuðið í bleyti og ákvað að ferð til Norður Kóreu væri einmitt það sem hann þyrfti á að halda.  Og hann fór – ég hins vegar sat heima í viku með tveggja ára gamalt barn okkar og hafði engan möguleika á að ná sambandi við hann.  Eina sem ég gat var að vonaði heitt og innilega að hann kæmi sér ekki í klandur því þá sæi ég hann líklega aldrei aftur.  Hann kom heim og í farteskinu voru magnaðar myndir af þessu skelfilega samfélagi.  Ljósmyndirnar sýndi hann  svo loks á menningarnótt nú í sumar og var fullt út að dyrum allan daginn, þennan eina dag sem sýningin var uppi.  Margir hafa síðan spurt okkur hvar sé nú hægt að skoða myndirnar – þær hafa því verið settar á Facebooksíðu sýningarinnar og nokkrar myndir er enn óseldar.  Allur ágóði af sölu myndanna rennur óskiptur til UNICEF, barnahjálpar Sameinuðu þjóðanna.

Heyra má um ferð Torfa í skemmtilegu viðtali við Síðdegisútvarp Rásar 2, lesa um á Smugunni og jafnfram eru voru nokkrar myndir birtar í Fréttablaðinu.