Birgitta Jónsdóttir

Ég hef lengi leitað að nýju aðsetri fyrir bloggið mitt eftir að mér á sínum tíma var ekki vært með rafrænt aðsetur á moggabloggi. Bloggkerfið þeirra er þó enn langbest og ég er ekki að sjá neina miðla leggja metnað né hugvit í að búa til eins góðan ramma utan um bloggara landsins.

Ég væri þar enn ef ekki nagaði mig siðferðisvitundin – hið sama má nú segja um þetta nýja aðsetur, siðferðisvitund mín leyfir mér ekki að eiga aðsetur hér. Enn og aftur er maður á vergangi með aðsetur. Margir bloggarar fluttu sig af moggabloggi á sínum tíma, nú eru enn og aftur margir bloggarar sem vita ekki hvert skal halda. Held að það þurfi að gera aðra tilraun til að setja upp óháð aðsetur bloggara.

Ég mun ekki blogga meira hjá þessari fréttaveitu, ég hef svo sem ekki neitt út á ritstjórn eyjunnar að setja heldur yfirstjórn og siðferði þeirra sem eiga og reka miðla sem eru undir sömu regnhlíf og pressan og bleikt.is.

Ég ætla ekki að hafa meiri orð um það en vil benda fólki á að kíkja á http://enginpressa.com/

Ég uppgötvaði nýverið að ég er í Þjóðvinafélaginu. Allir sitjandi þingmenn eru víst í þessu ágæta félagi. Í dag er fyrsti aðalfundur félagsins síðan ég tók sæti á Alþingi. Ég hafði ekki heyrt af þessari hefð fyrr en nýverið og finnst sjálfsagt að kynna hana fyrir almenningi og við þingmenn Hreyfingarinnar munum jafnvel bregða út af hefðinni og leggja fram ályktun á fundinum um að hið íslenska þjóðvinafélag beiti sér fyrir því að eitt af helstu skilyðrum félagsins verði sett á oddinn, en í lögum þess kemur m.a. fram: „Hin fyrstu skilyrði fyrir því eru, að vér fáum þá stjórnarskrá, sem veiti oss fullt stjórnfrelsi í öllum íslenskum málum, alþingi með löggjafarvaldi og fullu fjárforræði, landsstjórn í landinu sjálfu með fullri lagalegri ábyrgð fyrir alþingi.“

Ályktun um að þjóðin fái að kjósa um nýja stjórnarskrá hlýtur að vera eitthvað sem allir félagsmenn geti tekið undir. Hér er svo fundarboðið sem vér alþingismenn fengum í gær.

Aðalfundur Hins íslenska þjóðvinafélags verður haldinn miðvikudaginn 7. des. 2011 kl. 12.30 miðdegis.

Fundurinn er að venju haldinn í þingsalnum. Hann er lokaður öðrum en alþingismönnum og forseta félagsins.

Aðalfundur er að jafnaði haldinn annað hvert ár, og stendur í tæpa hálfa klst.

Forseti félagsins er Ólafur Ásgerisson þjóðskjalavörður.

Fundardag nú ber upp á dánardag Jóns Sigurðssonar forseta, 7. desember.

Nánari upplýsingar um Hið íslenska þjóðvinafélag:

Hinn 19. ágúst árið 1871 stofnuðu 18 þjóðkjörnir alþingismenn Hið íslenska þjóðvinafélag. Þá sátu á Alþingi 21 þjóðkjörinn alþingismaður og 6 konungkjörnir alþingismenn. Í lögum félagsins segir meðal annars:

`Stofnendur félagsins eru alþingismenn, þeir er vilja bindast í að framfylgja landsréttindum vorum og þjóðréttindum af öllu megni og kappkosta að ávinna oss og þjóð vorri það frelsi og sjálfsforræði, sem nauðsynlegt er til þess að land vort og þjóð geti notið sín til allra framkvæmda og framfara. Hin fyrstu skilyrði fyrir því eru, að vér fáum þá stjórnarskrá, sem veiti oss fullt stjórnfrelsi í öllum íslenskum málum, alþingi með löggjafarvaldi og fullu fjárforræði, landsstjórn í landinu sjálfu með fullri lagalegri ábyrgð fyrir alþingi.A

Í lögum félagsins segir einnig: `Félagið hefir aðalfundi annað hvort ár á alþingum.A Jón Sigurðsson var kosinn forseti félagsins.

Þjóðvinafélagið hóf útgáfu rita á árinu 1874 með Almanaki fyrir árið 1875 og Andvara, sem hóf feril sinn í framhaldi af Nýjum félagsritum, ársriti Jóns Sigurðssonar og samherja hans. Síðan hafa þessi rit komið út árlega. Félagið hefur gefið út aðrar bækur eftir efnum og ástæðum.

Á aðalfundi Þjóðvinafélagsins í desember 1939 var samþykkt að hefja samstarf við Bókaútgáfu Menningarsjóðs. Stóð það til 1992 en síðan hefur skrifstofa Alþingis annast reikningshald félagsins og Sögufélag sölu ársritanna, Almanaks og Andvara.

Í tilefni að umræðu um viðurkenning á sjálfstæði og fullveldi Palestínu á þinginu í kvöld – flutti ég ljóð sem ég þýddi fyrir nokkrum árum. Það er hægt að segja svo margt um Palestínu og þá viðvarandi þjáningu sem ríkisfangslausa fólkið þar hefur þurft að þola en ljóð segja meira en margar ræður: ljóðið er eftir Mahmoud Darwish sem er ástsælasta útlagaskáld Palestínumanna og sum ljóðin hans sungin á ökrunum þegar fólkið er við vinnu sína. Þorpið sem hann ólst upp í hefur verið jafnað svo rækilega við jörðu og jafnvel beinin í kirkjugarðinum voru færð annað.

Darwish lést árið 2008 – blessuð sé minning hans.

Hér á ég heima

Hér á ég heima. Ég á margar minningar. Ég fæddist eins og allir fæðast.
Ég á móður, hús með mörgum gluggum, bræður, vini og fangaklefa
með kuldalegum glugga! Ég á bylgju sem mávar hrifsuðu til sín,
mína eigin yfirlitsmynd.
Ég á litsterk engi. Í djúpum sjónsviðs orða minna, á ég tungl
næringu fugls og ódauðlegt ólífutré.
Ég hef búið á þessu landi löngu áður en sverðin
breyttu manninum í fórnarlamb.
Hér á ég heima. Þegar himnaríki syrgir móður sína,
þá skila ég himnaríki til móður hennar.
Og ég græt svo að skýið sem snýr til baka beri tár mín.
Til að brjóta lögin, hef ég lært öll orðin sem eru nauðsynleg fyrir blóðprófið.
Ég hef lært og krufið orðin til að hægt sé að draga úr þeim
eitt stakt orð: Heim.

Hér er slóð í umræðuna sem var málefnaleg og gefandi. Ógleymanlegt kvöld þar sem ljóst er að þingið getur sýnt samtakamátt sem ég vona að yfirfærist á fleiri málefni og bráðavandamál sem brýnt er að við leggjum okkur öll fram við að vinna að úrlausnum saman.

Nefndadagar á Alþingi

Í vikunni sem leið voru nefndadagar á Alþingi.

Ný þingmál

Þingmenn Hreyfingarinnar, auk Eyglóar Harðardóttur, hafa lagt fram þingsályktunartillögu um þýðingu skýrslu rannsóknarnefndar Alþingis á ensku.  Skýrslan var gefin út í níu bindum og seldist afar vel. Hún er einnig aðgengileg á vef Alþingis án endurgjalds og þar er einnig ítarefni sem ekki fylgir prentuðu útgáfunni. Skýrslan hefur enn ekki verið þýdd í heild á önnur tungumál en á vef þingsins er þó að finna enska þýðingu á hluta hennar. Flutningsmenn tillögunnar telja afar brýnt að skýrslan verði þýdd í heild sinni á ensku enda varðar efni hennar ekki einvörðungu þá sem eru læsir á íslensku.

Tengill á málið á vef Alþingis: http://www.althingi.is/altext/140/s/0199.html

Þá hafa þingmenn Hreyfingarinnar, auk Eyglóar Harðardóttur, Lilju Rafneyjar Magnúsdóttur og Sigmundar Ernis Rúnarssonar, lagt fram frumvarp til laga um breytingu á landflutningalögum. Markmið frumvarpins er að gera strandsiglingar aðlaðandi kost í innanlandsflutningum en strandsiglingum stóru skipafélaganna var hætt í lok árs 2004.  Tengill á málið á vef Alþingis: http://www.althingi.is/altext/140/s/0353.html

Þverpólitísk áætlun um minnkað vægi verðtryggingar

Svohljóðandi bókun var samþykkt á fundi efnahags- og viðskiptanefndar þann 24. nóvember: ,,Efnahags- og viðskiptanefnd Alþingis samþykkir að hefja á vettvangi nefndarinnar undirbúning þverpólitískrar áætlunar um minnkað vægi verðtryggingar á íslenskum fjármálamarkaði. Umrædd áætlun verði lögð fram sem þingmál og stefnt að framlagningu þess fyrir 15. febrúar 2012.“  Margrét Tryggvadóttir er áheyrnarfulltrúi í nefndinni.  Hún sagði í samtali við fréttabréfsritara ,,að málið væri prófsteinn á hvort Alþingi hefði burði til að taka til sín þau völd sem Alþingi ber“.  Því er ljóst að ekki er ástæða fyrir þau sem eru fylgjandi afnámi verðtryggingarinnar að hrósa happi of snemma þó verið sé að stíga skref í rétta átt.

Helgarvinna þingmanna Hreyfingarinnar

Margrét Tryggvadóttir verður gestur Sigurjóns Egilssonar á Sprengisandi n.k. sunnudag á Bylgjunni.

Birgitta Jónsdóttir tekur þá í málþingi um Nató á landsfundi SHA á laugardaginn klukkan 14:00.

Bloggari vikunnar Tilgangurinn með þessum lið fréttabréfsins er að vekja athygli mönnum og málefnum sem ástæða þykir að gefa gaum.  Fram skal tekið að ekki er endilega um fólk að ræða sem hefur sérstaklega lýst yfir stuðningi við Hreyfinguna eða stefnumál hennar, heldur ræður einfalt mat fréttabréfsritara ferðinni.

Að því sögðu er bloggari vikunnar Einar Steingrímsson.  Hann hefur að undanförnu tekið slaginn við RÚV vegna birtingu ríkisfjölmiðilsins á auglýsingu frá ,,íslenskum útvegsmönnum“.  Málið er um margt athyglisvert en verður ekki rakið nánar hér.  Nánir upplýsingar má sjá á bloggsíðu Einars: http://blog.eyjan.is/einar/

Betra Ísland

Nýlega var opnaður samráðsvefurinn Betra Ísland.  Hreyfingin hvetur alla til að kynna sér vefin og nýta sér hann.  Sjá hér: Betra Ísland

Skoðannakannanir sýna að djúp gjá hefur myndast á milli þjóðar og þings. Örfáir landsmenn treysta þingmönnum og ríkisstjórninni. Ekkert gefur til kynna að traust á þeim sem á alþingi starfa sé eitthvað að aukast eftir frammistöðu okkar hér á september þingi. Vantraustið beinist að stjórn og stjórnarandstöðu og því verðum við öll sem hér vinnum að skoða hvernig við getum bætt störf okkar og samvinnu.

En hvernig er hægt að laga þetta og endurheimta traust? Ég held að ný þingsköp séu til bóta en það er ekki nóg að fá nýjar starfsreglur. Bankarnir höfði til dæmis mjög fínar siðareglur en það fór bara enginn eftir þeim því menningin þar inni var að skauta á gráa svæðinu. Græða, græða, græða og svindla eins og fagmenn.

Já hvernig er hægt að endurheimta þetta traust? Út um allan heim mótmælir fólk – það mótmælir vegna þess að það treystir ekki kerfinu. Það hefur upplifað að kerfið er orðið svo stórt að það þjónar aðeins sér og ef það verða kerfismistök þá mun kerfið gera allt sem það getur til að verja sjálft sig en ekki þá sem brotið hefur verið á. Út um allan heim mótmælir fólk því að fjármagnseigendur – bankamafían stjórnar samfélögunum en ekki valdhafar sem eru lýðræðislega kjörnir.

Hverjir semja lögin? Ekki er það löggjafarvaldið sem semur þau. Lögin eru samin í ráðuneytinum og þeir sem koma að því að semja þau eins og til dæmis lög um fjármálafyrirtæki koma einmitt frá fjármálafyrirtækjunum. Hvernig fer það saman að hafa fulltrúalýðræði á löggjafarsamkundunni að kljást við lagatæknimál þeirra sem eru jafnframt á launum eða hafa þegið laun frá fyrirtækjum þeim sem á að koma böndum á með lagasetningu? Það hlýtur að vera skýlaus krafa okkar hér á þingi að við fáum að fylgjast með lagasetningu frá frumstigum og vita nákvæmlega hver skrifar hvaða lagabálk sem fer í gegnum alþingi. Það hlýtur að vera skýlaus krafa að þeir landsmenn sem svo vilja fái aðgegni að lagaskrifum á frumstigi til að geta veitt aðhald áður en það fer hingað inn.

Með þannig opnun á kerfinu er hægt að byggja nauðsynlegt traust og alvöru gangsætt samfélag sem við verðum að koma hér á til að byggja upp samfélag heilinda og heiðarleika.

En það þarf auðvitað meira til og minni ég á skrif hæstvirt forsætisráðherra sem hún birti í dagblaði hér um árið og talar fyrir því að það beri að afnema verðtrygginguna. Til að skapa traust getur Hæstvirtur Forsætisráðherra til dæmis sýnt í verki að hún ætli að láta sinn gamla draum verða að veruleika og jafnframt verða við kröfu 34 þúsund landsmanna sem settu nafn sitt við kröfu Hagsmunasamtaka Heimilanna um að afnema verðtrygginguna. Krafan hljóðar svo: Í nafni almannahagsmuna krefjumst við undirrituð almennra og réttlátra leiðréttinga á stökkbreyttum lánum heimilanna og afnáms verðtryggingar.

Hafi stjórnvöld ekki orðið við þessari kröfu fyrir 1. janúar 2012 jafngildir undirskrift mín kröfu um þjóðaratkvæðagreiðslu um kröfugerðina.

Forsætisráðherra tók við undirskriftarlistanum stuttu eftir að þing var sett á laugardaginn var með þeim orðum að þetta yrði sett á forgangslista ríkisstjórnarinnar á fundi á morgun. Hvergi get ég séð á málefnalista ríkisstjórnarinnar að bregðast eigi við þessum kröfum. Þá á jafnframt að setja saman enn eina nefndina til að bregðast við þeim forsendubresti sem hér varð við hrunið og ekki hefur tekist að leiðrétta.

Þeir einstaklingar sem sýndu hve mesta ráðdeild og pössuðu upp á fjármál sín hafa ekki fengið neina leiðréttingu. Það að horfa upp á ævisparnað sinn sem settur hefur verið upp í húsnæðskaup fuðra upp og heyra á sama tíma í fréttum að 50 fyrirtæki hafi fengið afskrifað milljarð hvert fær auðvitað jafnvel rólyndasta fólk til að finna til gremju og reiði gagnvart þeim sem sitja við völd.

Sú gremja braust út að einhverju leyti við þingsetningu en miklu fleiri voru þó saman komnir við þetta hús sem ég stend í með fjölskyldum sínum og hlýddu á ræður og frábæra tónlist, þetta fólk fór síðan heim og tóku ekki eftir neinu því sem síðar var aðalfrétt fjölmiðla. Ekki einu orði var eytt á friðsamleg mótmæli sem áttu sér stað á sama stað á sömu stundu og írafárið við þinghúsið átti sér stað í fjölmiðlum landsins. Stöð 2 gekk meira að segja svo langt að skrifa inn í frétt sína að 4000 manns hafi kastað eggjum á þingið sem er auðvitað skemmtilega dramatískt en ekkert annað en ósannindi.

Óvönduð vinnubrögð og hálflygar fjölmiðla í tengslum við mótmæli er svo sem ekki nein nýmæli og þurfa þeir sem mæta á mótmæla oft sitja undir lygum og rógburði. Fólkið sem kom á austurvöll við þingsetningu mætti auðvitað á sínum forsendum sem voru æði fjölbreyttar. Ég heyrði frá mörgum þarna úti að þeir væru komnir til að sýna okkur sem hér störfum að þeim ofbýður forgangsröðunin og vinnubrögðin hér inni. Ég heyrði jafnframt í mörgum sem komu til að taka undir kröfur hagsmunasamtaka heimilanna og komu með friði og fóru í friði.

Eitt af því sem verður að taka á er sú ógæfa að nánast enginn hefur þurft að sæta ábyrgð á því tjóni sem þetta samfélag hefur orðið fyrir og því verður því að linna að þeir sem allir vita að eru orsakavaldar hrunsins fái enn að fjárfesta hérlendis, reka fjölmiðlasamsteypur og séu á sama tíma enn að maka krókinn á kostnað skattborgara.

En meira þarf til kæru landsmenn: Ljóst er að þeir sem eru við völd eru allir að vilja gerðir til að láta þarfir ykkar verða að forgangsmáli, til þess að sýna þeim stuðning þarf fólk að sýna þann stuðning í verki með því til dæmis að þrýsta á að undirskriftarlistinn frá Hagsmunasamtökunum endi ekki ofan í skúffu og að úrvinnsla hans verði enn ein barbabrellan. Kannski á ríkisstjórninn við ramman reip að draga því ljóst er að núverandi kerfi þjónar ekki lengur hagsmunum almennings, þess vegna þurfa allir hér inni á alþingi að hafa:

Hugrekki til að fara nýjar leiðir og kalla eftir stuðning almennings til þeirra verka

Hugrekki til að breyta og stokka upp í efnahagskerfinu og stjórnsýslunni

Hugrekki til að afnema bankaleyndina

Hugrekki til að vinna með öðrum en vinum, vandamönnum og flokkssystkinum

Hugrekki til að tryggja að þeir sem bera ábyrgð á hruninu axli ábyrgð ef það er ekki hægt þá verðum við að hafa hugrekki til að viðurkenna að samfélagsgerðin er ónýt því að þeir sem hafa völd og peninga þurfa ekki að lúta að sama réttarfari og samfélagslegri ábyrgð einsog almennir borgarar.

Hugrekki til að viðurkenna blóðskömm íslenskrar stjórnsýslu

Hugrekki til að setja almenning á oddinn í stað fjármálastofnanna

Hugrekki til að vinna saman að því að finna lausnir

Hugrekki til að láta dóm þjóðarinnar ráða varðandi nýju stjórnarskránna

Við í Hreyfingunni höfum stundað annars konar vinnubrögð hér á þingi en almennt tíðkast og vonum til þess að þau vinnubrögð verði eitthvað sem aðrir temja sér. Við höfum alltaf málefnin að leiðarljósi og vinnum jafnt með minni eða meirihluti útfrá málefnum þeim sem tengjast þeirri stefnu sem við vorum kjörin á þing til að koma í verk. Hjá okkur er ekkert flokksræði og hverjum og einum þingmanni frjálst að fylgja sannfæringu sinni þó að hún stangist á við skoðannir hinna. Við höfum einfalda stefnu þar sem lýðræðisumbætur eru áberandi en jafnframt má þar finna kröfur um almennt réttlæti fyrir þá landsmenn sem fengu óréttlátar skuldabyrðir í fangið í eftirmálum hrunsins.

Í vetur munum við meðal annars vinna að eftirfarandi málum: flytja þingsályktun um meðferð á frumvarpi til nýrrar stjórnarskrár. Frumvarp um þjóðaratkvæðagreiðslur og kvótafrumvarpið sem við lögum fram á síðasta þingi. Þá munum við flytja þingsályktun um rannsókn á starfsháttum forsætisráðuneytis, fjármálaráðuneytis, viðskiptaráðuneytis og Seðlabankans í aðdraganda Hrunsins og eftirmálum þess.

Við munum leggja mikið kapp á að tillögur að nýrri stjórnarskrá rati í þjóðaratkvæðagreiðslu til að alþingi fái skýra leiðsögn um hver eindreginn vilji þjóðarinnar er varðandi nýjan samfélagssáttmála. Ef þinginu ber gæfa til að vinna úr tillögum stjórnlagaráðs á þann hátt að almenn sátt sé með þá vinnu og niðurstöðu þá held ég að grunnurinn að hinu nýja Íslandi sé loks traustur.

Til þess að okkur hér á þinginu auðnist að fylgja betur því sem þið viljið frá okkur, þurfum við aðhald og áreiti. Takk fyrir hávaðan, öll bréfin, mótmælastöðurnar, greinarnar og nöfnin á undirskriftarlistunum. Það er staðreynd að til þess að lifa í því samfélagi sem maður dreymir um að búa í þaft maður að taka þátt í að búa til þann draum. Það kostar ekki mikla vinnu að taka þátt, en það er staðreynd að þeir sem breytt hafa heiminum hafa verið einstaklingar með ríka réttlætiskennd. Hættum að berjast gegn hvort öðru og finnum leiðir til að vinna saman innan þings sem utan.  Sagt hefur verið að tuttugasta og fyrsta öldin verður öld almennings – öldin okkar.