desember 2007

Ég bjó í Danmörku um hríð og get upplýst að það var ekki alltaf tekið út með sitjandi sældinni að skilja og tala tungumálið.

Íslendingar eru þó ekki þeir einu sem telja dönskuna erfiða, samanber þetta myndband hér.

http://www.youtube.com/watch?v=s-mOy8VUEBk

Þar kalla Danir eftir aðstoð alþjóðasamfélagsins til að skilja hver annan!

Minn góði vinur Björgvin Guðmundsson, ritstjóri Markaðarins, segir í fréttaskýringu í blaðinu í dag að Hannes Smárason sé holdgervingur niðursveiflunnar á Íslandi.

Gárungarnir velta því þá fyrir sér hvort bráðlega sé von á holdgervingi uppsveiflunnar…

Miðað við sálarástandið á markaði kann þó að verða bið á því.

Blaðamaður fékk eitt sinn það verkefni að hringja í augnlækni til að inna hann álits á niðurstöðum nýrrar glákurannsóknar. Blaðamaðurinn hringdi í augnlækninn og birti viðtalið í blaðinu daginn eftir.

Þann sama dag hringdi læknirinn í ritstjórnina og kvaðst ekki kannast við að hafa verið í viðtali þótt hann gæti reyndar tekið undir allt það sem haft væri eftir honum í blaðinu.  Í ljós kom að blaðamaðurinn hafði hringt í alnafna læknisins. Leiðrétting birtist daginn eftir. Hún var eitthvað á þá leið að viðtalið við lækninn hefði ekki verið við lækninn heldur alnafna hans, sem væri reyndar þrátt fyrir hin leiðu mistök, sammála því sem í fréttinni stóð. 

Sjálf var ég einhvern tíma að vinna fréttaskýringu um Frjálslynda flokkinn og í samtölum mínum við flokksmenn var mér bent á einn úti á landi, í innsta hring, sem gæti tjáð sig frekar um málið. Ég hringdi í hann, kynnti mig, og spurði hvað honum fyndist um stöðu flokksins.

Viðmælandinn svaraði af ágætri þekkingu og ég sá fyrir mér fína fyrirsagnarpunkta. Þegar leið á samtalið spurði ég hvort hann væri ekki örugglega í innsta kjarna flokksins. Svarið var eitthvað á þessa leið: Nei, nei – ég er ekkert í Frjálslynda flokknum.

Ég var semsé með alnafnann á línunni. 

Viðmælandi minn bætti því við að honum hefði þó þótt gaman að fá símtal að sunnan til að ræða pólitíkina sem hann hefði mikinn áhuga á.

Þarna skall hurð nærri hælum! 

Ég hef líka heyrt frásögn af enn einum blaðamanni sem fékk það verkefni að fara út á land og taka viðtal við atkvæðamikinn mann í sjávarútvegi. Blaðamaðurinn gerði það. Kom heim og skrifaði viðtalið. Nema hvað. Þetta var ekki sá kall sem hann átti að tala við heldur alnafninn. Báðir voru þeir í útgerð. Það breytti ekki því að viðtalið stóð fyrir sínu. 

Þessar sögur sýna að við blaðamenn lendum í ýmsu; við getum að sjálfsögðu gert mistök eins og aðrir.  

Nýlegt dæmi sýnir aukinheldur hve berskjölduð við getum verið gagnvart viðmælendum okkar sé ásetningurinn sá að villa á sér heimildir.   

Við göngum almennt út frá því sem vísu að maður sé sá sem hann segist vera. Við höfum ekki lagt það í vana okkar að biðja um nafnskírteini eða aðrar sannanir fyrir því að fólk sé heiðarlegt í þessum efnum. 

En kannski verða nú breytingar þar á…

Ég er ekki alveg að átta mig á þessu feisbúkki en ég reyni samt. Ég er búin að eignast þar vini og taka þátt í alls konar könnunum, til að finna út hver er líkur hverjum…

En hvers vegna er þetta svona vinsælt?

Norðmenn eiga líka sína Silvíu Nótt og hún er lögst í víking. Fréttavefur Morgunblaðsins greinir frá því að hún hafi nýverið komið hingað til lands til að ræða við nokkra ráðamenn þjóðarinnar.

Ekki hafa borist fregnir af því að þeir hafi brugðist eins illa við og borgarfulltrúinn James Oddo frá New York. Hann iðraðist þó seinna harkalegra viðbragða sinna en sagði þau þó að mörgu leyti hafa verið réttlætanleg.

http://www.youtube.com/watch?v=a1iNH7W9SC8

Þessi teikning Halldórs Baldurssonar, sem birtist í Viðskiptablaðinu í dag, er óborganleg. Yfirskrift hennar er: Tíu litlir millastrákar.

Guðmundur Magnússon lætur fylgja með litla vísu á dv.is.

Gárungarnir velta því fyrir sér hvort fall Hannesar sé forsmekkurinn að því sem koma skal. Brunaútsölur verði innan tíðar…Ekki bara á Range Roverum heldur líka þotum.

Allir ganga pínulítið skaddaðir frá REI-málinu sagði Bjarni Ármannsson, fráfarandi stjórnarformaður Reykjavík Energy Invest, í Mannamáli á Stöð 2 í kvöld.

Hann sagði þar í samtali við Sigmund Erni að honum fyndist hann ekki hafa verið svikinn, þótt  hann væri vonsvikinn yfir málalokunum.

Enn er ekki útséð með REI-málið og er nú beðið eftir því hvernig nýr meirihluti í borgarstjórn ætlar að lenda því. Dagur B. Eggertsson borgarstjóri vísaði því á bug í samtali við Viðskiptablaðið í vikunni að óeining væri innan meirihlutans um málið.

En hvað tefur þá ákvarðanatöku?