ágúst 2007

Á lögregluvefnum er þessi setning í niðurlagi tilkynningar um útivistartíma barna: „Mikilvægt er að fylgja því eftir að börn og unglingar fái nægan svefn. Í því felst m.a. að ganga úr skugga um að þau séu ekki í tölvunni þegar þau eiga að vera komin í rúmið.“

Gott að einhver passi upp á að við pössum upp á börnin okkar.

Ritstjórar dagblaðanna Morgunblaðsins og Fréttablaðsins gera að umtalsefni í leiðurum sínum í dag ræðu Ingibjargar Sólrúnar Gísladóttur utanríkisráðherra á Norðurpólsráðstefnunni fyrr í vikunni.

Tónninn í leiðurunum er hins vegar ólíkur. Leiðari Fréttablaðsins er mun jákvæðari í garð utanríkisráðherra eða „nýrrar húsmóður í utanríkisráðuneytinu“, eins og það er orðað, en leiðari Morgunblaðsins.

Leiðarahöfundur Morgunblaðsins segir meðal annars að yfirlýsingar Ingibjargar Sólrúnar um stöðu Íslands innan Atlantshafsbandalagsins séu athyglisverðar en hún sagði að Ísland yrði að axla nýja ábyrgð innan Nató og taka aukinn þátt í nýjum verkefnum þess. Leiðarahöfundurinn segir að yfirlýsingarnar eigi eflaust eftir að vekja athygli fólks á vinstri kant stjórnmálanna, bæði innan og utan Samfylkingarinnar.  „Öðrum mun koma á óvart að formaður Samfylkingar gerist talsmaður aukinnar þátttöku í starfi Atlantshafsbandalagsins.“

Leiðarahöfundur Fréttablaðsins segir meðal annars að óljós stefna í varnar- og öryggismálum hafi fram til þessa verið einn helsti veikleiki Samfylkingarinnar. Það eigi sér eðlilega skýringu þar sem hún sé gerð úr þremur flokkum. Það leiði þó til þess að ekki sé vandalaust fyrir formann Samfylkingarinnar í hlutverki utanríkisráðherra að leggja línur í þeim efnum. „Sú afdráttarlausa stefnumörkun sem ráðherrann hefur nú mælt fyrir er mikilsverð fyrir Ísland. Hún þjónar á hinn veginn með árangri einnig þeim tilgangi að styrkja trúverðugleika Samfylkingarinnar. „

Vísisbloggarinn Ýrr, sem búsett er í Svíþjóð, er með mjög skemmtilegar pælingar um það hvort hún eigi að kaupa sér fótboltalið. Henni hafa borist fregnar alla leið frá Íslandi að slík kaup væru að komast í tísku.

Hún vill væntanlega vera á undan öðrum Íslendingum að þessu sinni –  því þeir eru búnir að kaupa allt hitt sem völ er á, eins og til dæmis banka, fatakeðjur,  fasteignafélög, verslunarkeðjur, flugfélög og sitthvað fleira.

Hún hefur helst augastað á fótboltaliðunum í Malmö, þar sem hún býr, en er ekki alveg viss hvort hún eigi að kaupa karlaliðið eða kvennaliðið. Stákarnir séu til að mynda atvinnumenn í boltanum en stelpurnar ekki. Þeir kunni því bara að sparka bolta en þær kunni miklu, miklu meira. Hafi menntað sig og eru verkfræðingar, hjúkrunarfræðingar, endurskoðendur og fleira.

Þá segir hún tvær íslenskar fótboltastelpur í sænska liðinu. Þar með fái hún hlut í íslenska landsliðinu.

Kannski þetta brölt hennar verði upphafið að íslenskættaðri innrás til Íslands frá Svíþjóð.

Halldór teiknari nær vel að fanga þjóðfélagsumræðuna í teikningum sínum. Hann veltir því fyrir sér - í meðfylgjandi teikningu sem birtist í Blaðinu –  hvar völdin liggja. Ingibjörg Sólrún og Geir H. Haarde eru eitthvað tvístígandi. Mundu ekki eftir því að Alþingi hafði verið breytt í banka.

Það þarf að smella á myndina einu sinni eða tvisvar til að ná henni í fullri stærð.

Verk eftir fleiri listamenn en Lars Vilks hafa vakið hörð viðbrögð í Svíþjóð. Má þar nefna verk eftir listakonuna Elisabeth Ohlson Wallin. Í þeim fjallaði hún um kristindóminn og samkynhneigð.

Hún setti frægar myndir, eins og Síðustu kvöldmáltíðina, í nýjan og nútímalegri búning. Þemað var að Jesús hlyti að elska alla.

Verk hennar voru sýnd á listasöfnum víða í Svíþjóð og í að minnsta kosti einni kirkju – kirkjunni í Uppsölum. Hópur kristinna manna mótmælti hins vegar sýningunum. Söfnum og kirkjunni bárust sprengjuhótanir og listamanninum var hótað lífláti.

Mótmæli koma með öðrum orðum ekki bara úr einni átt.

Heilmiklar umræður eiga sér nú stað í sænskum fjölmiðlum um teikningar sænska listamannsins Lars Vilks. Á teikningunum er höfuð spámannsins Múhameðs á skrokki hunds. 

Umræðan snýst meðal annars um tjáningarfrelsi og sjálfsritskoðun. Hún minnir um margt á írafárið vegna skopteikninganna af Múhameð spámanni, sem birtust haustið 2005 í danska blaðinu Jyllands-Posten.

Lars Vilks teiknaði umræddar myndir eftir að hann var beðinn um að taka þátt í sýningu, sem fjallaði um hunda. Listasafnið sýndi þó aldrei teikningar listamannsins af ótta við viðbrögð múslíma. Það gerði sænska blaðið Nerikes Allehanda hins vegar í síðustu viku og „þá varð fjandinn laus,“ eins og það er orðað í einum fjölmiðlanna.

Hópur múslíma í Svíþjóð hefur mótmælt birtingunni í blaðinu og fregnir berast af því að fulltrúi sænska sendiráðsins í Tehran hafi verið kallaður á teppið hjá stjórnvöldum þar í borg. Honum hafi verið tjáð að teikningin væri móðgandi í garð spámannsins.

Lars Ströman, leiðarahöfundur á blaðinu sem birti teikninguna, segir að blaðið hafi í skrifum sínum ávallt varið réttindi múslíma þar í landi. Þetta mál snúist þó um trúarbragðafrelsi og réttinn til að gagnrýna trúarbrögð.

Sjálfur hefur listamaðurinn sagt að hann hafi ekki viljað gera neinum illt. Markmið hans hafi eingöngu verið að skapa umræðu …

Og það virðist honum hafa tekist.

Fjölmiðlar hafa um helgina greint frá því að ræðismaður Íslands í Boston hafi hindrað för Arons Pálma í Boston og reynt að koma í veg fyrir að hann yfirgæfi flugstöðina þar í borg á meðan hann biði eftir flugi til Íslands.

Sendiherra Íslands í Bandaríkjunum, Albert Jónsson, segir að ræðismaðurinn hafi ekki verið að fara eftir sínum fyrirmælum.

Í umboði hvers starfaði ræðismaðurinn þá? Hvað gekk honum til? Það hlýtur að þurfa að fara ofan í saumana á því máli.

Haft er eftir Kristjáni L. Möller samgönguráðherra í Morgunblaðinu fyrir skömmu að bætt GSM-samband á Vestfjörðum og Norðausturlandi yrði liður í mótvægisaðgerðum ríkisstjórnarinnar vegna niðurskurðar í þorskkvóta.

Í skýrslu þáverandi samgönguráðherra, Sturlu Böðvarssonar, um framkvæmd fjarskiptaáætlunar, sem lögð var fram á Alþingi í mars síðastliðnum er minnt á að alls 2,5 milljarðar af söluandvirði Símans fari í fjarskiptasjóð. Eitt af markmiðum sjóðsins er að bæta GSM-sambandið á landinu. Og að því er nú unnið.

Hvernig getur því núverandi samgönguráðherra haldið því fram að vinna við að bæta GSM-samband á Vestfjörðum og Norðausturlandi sé liður í mótvægisaðgerðum ríkisstjórnarinnar vegna niðurskurðar í þorskkvóta?

Alþingi tók ákvörðun um að setja 2,5 milljarða í fjarskiptasjóð löngu áður ákveðið var að skera niður þorskkvótann.

Að hafa eða hafa ekki kæli í verslun ÁTVR í Austurstræti.

Það er stóra spurningin… í íslenskri pólitík um þessar mundir.

Stjórnmálamenn eru líklega þeir hópar sem kunna manna best þá list að svara án þess að segja nokkurn skapan hlut í raun.

Hvað þýðir til dæmis, þegar stjórnmálamaður segir: Ég útiloka ekki að í framtíðinni… Sbr. þessa frétt hér.

Svarið er einfalt: Þetta þýðir nákvæmlega ekki neitt. Því hvernig er yfirhöfuð hægt að útiloka að eitthvað gæti hugsanlega gerst í framtíðinni?