febrúar 2007

Merkileg deila er risin upp um það meðal sjálfstæðismanna hver hafi átt hugmyndina að hugtakinu “hægri grænn”. Illuga Gunnarssyni er í Morgunblaðinu eignuð þau orð en Katrín Fjeldsted hélt því hins vegar fram í viðtali við Björg Evu fréttamann í Morgunútvarpinu í vikunni að hún ætti hugmyndina.

Því má svo bæta við að Björn Bjarnason ritar langa grein um það á vefsíðu sinni að Sjálfstæðisflokkurinn er síður en svo fyrst nú að verða umhverfissinnaður.

En getur einhver útskýrt fyrir mér hvað hægri grænn þýðir í raun og veru? Hvað þýðir þá vinstri grænn? Megum við kannski búast við miðju grænum á næstunni?

Hver tók upphaflega eftir því að eitthvað væri að rúlla eða hlaupa í bakgrunni fréttaúttektar Íslands í dag? Sá hlýtur að vera fráneygur.

Myndskeiðið fór eins og eldur um sinu í netheimum í gær. Eins og hendi væri veifað var farið að blogga um það og birta um það fréttir. Hvort voru þetta kartöflur eða mýs?

Sjálf stóð ég mig að því að íhuga hvort það gæti virkilega verið að kartöflur væru rúllandi fram og til baka í matvöruverslunum. Eða voru þetta mýs?

En hvað sem því líður var þetta mjög góð auglýsing fyrir þáttinn Ísland í dag

Því er ekki að leyna að það er mjög gaman að starfa á nýrri ritstjórn, sem vinnur saman að því að móta nýjan miðil.

Ferlið hefur verið mjög skemmtilegt og andinn hér er mjög góður, eins og ég hef sagt áður.

Fyrsta tölublað Krónikunnar kom út á miðvikudag. Blaðinu er eins og kunnugt er ritstýrt af konu: Sigríði Dögg Auðunsdóttur. Ég er aðstoðarritstjóri og meirihluti ritstjórnarinnar er konur.

Í því ljósi hefur verið forvitnilegt að fylgjast með umræðunni um blaðið eftir að það kom út. Staksteinar boða til að mynda að fylgst verði grannt með blaðinu, vegna þess eingöngu, að því sé ritstýrt af konum.

Og eftir höfðinu dansa limirnir. Nokkrir miðaldra karlmenn hafa stigið fram á rit – eða hljóðvöllinn og dregið fram allt það sem þeir hugsanlega gátu fundið blaðinu til foráttu. Línuskiptingaforrit hafa verið þeim einstaklega hugleikin.

Skemmtilegast af öllu er hins vegar að konur, á öllum aldri, hafa fagnað blaðinu sérstaklega og tekið því með eindæmum vel. Þær hafa m.a. komið þeim sjónarmiðum á framfæri á blogginu sínu, en einnig í póstum til ritstjórnarinnar.

Já, þetta er svolítið merkilegt. Maður veltir því fyrir sér hvort Krónikan hafi snert viðkvæma strengi í hjörtum einhverra miðaldra karla. Eru útverðir feðraveldisins að tala? Er verið að ógna einhverjum? Er einhver hræddur?

E.s. Því má halda til haga í þessari kynjagreiningu hér að fjölmargir karlmenn, ungir sem aldnir, hafa fagnað blaðinu.

Merkilegt hvað getur stundum reynst erfitt að ná tali af ráðherrum. Ætla mætti að þeir hafi gleymt því að þeir sitji í sínum stólum í umboði þjóðarinnar.

Sigurlín Margrét Sigurðardóttir tekur sæti á Alþingi á mánudag í fjarveru Gunnars Arnar Örlygssonar. Að öllu óbreyttu hefði þingmönnum Frjálslynda flokksins fjölgað um sex.

En svo verður ekki. Sigurlín Margrét er nefnilega ein þeirra sem fylgdi Margréti Sverrisdóttur úr flokknum. Hún verður því  þingmaður utan flokka.

Þingmenn frjálslyndra voru fjórir eftir síðustu kosningar, en fækkaði um einn, er Gunnar Örn gekk til liðs við sjálfstæðismenn um mitt kjörtímabil.

Nú nýverið fjölgaði hins vegar í þingflokknum, eins og kunnugt er, þegar Valdimar Leó og Kristinn H. sögðu sig úr sínum flokkum og fóru yfir til frjálslyndra.

Við hjá Krónikunni, nýja fréttavikuritinu, höfum unnið nánast dag og nótt undanfarna sólarhringa. Blaðið er alveg að fæðast. Verið er að leggja lokahönd á það.

Maður gerir varla mikið meira þessa dagana.

Forvitnilegt er að fylgjast með skoðanakönnunum þessa dagana. Nokkrar sveiflur virðast vera á fylgi flokkanna. Hópur óákveðinna virðist þó enn vera nokkuð stór og víst að hart verður barist, eins og alltaf, um óákveðna fylgið.

Í könnun Fréttablaðsins í dag kemur fram að fylgi Framsóknarflokksins, Sjálfstæðisflokksins og Frjálslynda flokksins dalar frá síðustu könnun blaðsins. Fylgi Samfylkingar og Vinstri grænna eykst hins vegar. Þeir gætu, samkvæmt könnun blaðsins, myndað meirihluta. Saman myndu flokkarnir fá 33 þingmenn yrði kosið nú.

Könnunin byggir á 800 hringingum til kjósenda. Athygli vekur að einungis 54,8% tóku afstöðu til spurningarinnar, sem var: Hvaða lista myndir þú kjósa ef gengið yrði til þingkosninga nú?