mars 2010

Ég er að prófa mig áfram í þessum bloggheimi. Ég er búin að ákveða að þeir sem vilja skrá athugasemdir við skrif mín verða að koma þar fram undir fullu nafni.

Undarlegt að fólk sem ritar á vefinn m.a. á spjallvefi þori ekki að koma fram undir fullu nafni.

Ég las á einhverri bloggfærslunni hjá opinberum starfsmanni, sem ég man ekki í svipinn hvað heitir, en dúkkar af einhverjum ástæðum mjög reglulega upp á forsíðu mbl.is, að hann hafi skipt blaðamannastéttinni í tvo hópa. Hrúta annars vegar og sauði hins vegar. (Hvernig hafa opinberir starfsmenn annars svona mikinn tíma til að blogga?).

Eftir þá afskaplega “málefnalegu” og “djúphugsuðu” skilgreiningu fullyrðir hann að blaðamenn sem ráðnir hafi verið á Fréttablaðið (ef ég skil manninn rétt) hafi skilið eftir faglegan metnað og siðareglur utan dyra.

Hvað manninum gengur til veit ég ekki. En eitt er víst: Hann ætti fremur að einbeita sér að störfum sínum hjá hinu opinbera. Ef ekki gæti hann kannski dundað sér við að skipta opinberum starfsmönnum í hrúta og sauði.

Í hvorum hópnum skyldi hann sjálfur lenda?

E.s.: Ég leiðrétti hér í færslu minni setninguna: “opinber embættismaður” á einum stað í setninguna “opinber starfsmaður.” Embættismaður er að sjálfsögðu opinber starfsmaður.

Enn er titringur meðal stjórnenda og eigenda Glitnis banka, sem rekja má til valdabrölts Hannesar Smárasonar, forstjóra FL Group.

Eins og fram kom í síðasta riti Krónikunnar sóttist Hannes stíft eftir því að verða formaður stjórnar Glitnis á síðasta aðalfundi. Það tókst ekki, eins og kunnugt er, meðal annars vegna andstöðu Karls Wernerssonar. Einar Sveinsson var því áfram kjörinn formaður, með stuðningi meirihluta stjórnarinnar.

Valdabrölt Hannesar hefur hins vegar skapað óróleika meðal stærstu eigenda bankans og helstu stjórnenda. Gamlar sögusagnir um sameiningu Glitnis og Kaupþings hafakomist á kreik og jafnframt herma óstaðfestar fregnir að þrýst sé á Karl Wernersson að selja hlut sinn í bankanum. Víst er að Hannes sjái stjórnarformennskuna í hillingum að ári.

Ég held ég hafi ómeðvitað (eða þannig) alið dóttur mína svolítið upp í femínískum anda, ef svo má segja. Hún er að minnsta kosti oft með hin frægu kynjagleraugu á sér.

Alltént hefur hún vakið athygli mína á auglýsingum Coca Cola Zero drykksins. Hún segir að þær séu settar fram út frá sjónarhóli karla.

Þetta er athyglisverð ábending. Í auglýsingunum er verið að leika sér að orðinu Zero. Þar er meðal annars sagt: “Afhverju ekki hasarmynd með Zero – rómantík?” “Afhverju ekki brjóstahaldara með Zero smellum?” “Afhverju ekki kærasta með Zero hausverk og Zero við þurfum að ræða saman?”

Já, skemmtilegar pælingar um auglýsingar.

Axel Karlsson, sóknarprestur Stóra-Núpsprestakalls, hefur dregið til baka bréf sitt, til skipulagsfulltrúa uppsveita Árnessýslu, þar sem fram koma athugasemdir vegna fyrirhugaðra virkjana í Neðri-Þjórsá.

Biskup Íslands, Karl Sigurbjörnsson, óskaði eftir því að presturinn drægi bréfið til baka, að beiðni sveitarstjórnar Skeiða- og Gnúpverjahrepps, samkvæmt upplýsingum frá Biskupsstofu.

Umrætt bréf er dagsett hinn 27. febrúar síðastliðinn og undirritað af Axel Árnasyni, sóknarpresti Stóra-Núpsprestakalls. Það er sent til skipulagsfulltrúa uppsveita Árnessýslu og er athugasemd við auglýstar breytingar á aðalskipulagi Skeiða- og Gnúpverjahrepps. Í auglýstum breytingum gerir sveitarstjórnin ráð fyrir virkjunum í Neðri-Þjórsá, en íbúar svæðisins höfðu tækifæri til að senda inn athugasemdir til 1. mars. Sveitarstjórninni ber að fara yfir allar athugasemdir áður en hún tekur endanlega afstöðu til virkjananna.

Í bréfi prestsins kveðst hann hafa orðið þess áskynja að fyrirhugaðar framkvæmdir Landsvirkjunar í sveitarfélaginu, það er virkjanir í Neðri-Þjórsá, hafi vakið upp ugg og vanlíðan í brjóstum mjög margra sóknarbarna. „Mörg sóknarbörn upplifa það sem svo að verið sé að neyða upp á það förgun landslags, forn- og náttúruminja. Mörg sóknarbörn finna sig vanmáttugt til andstöðu, meðal annars sökum þeirrar hörðu sóknar til framkvæmda sem raun er á,“ segir meðal annars í bréfinu.

Þegar undirrituð hafði samband við Biskupsstofu, hafði Adda Steina Björnsdóttir, verkefnisstjóri á Biskupsstofu, þetta að segja:„Biskup fékk ósk um það frá sveitarstjórninni að þetta embættisbréf yrði dregið til baka.”

Hún segir að þeirri ósk hafi verið komið á framfæritil Axels í gegnum vígslubiskupinn í Skálholti, Sigurð Sigurðarson, áður en sá fór á sáttafund með Axel vegna málsins. „Á þessum sáttafundi…ákvað Axel að draga bréfið til baka,“ upplýsir Adda Steina ennfremur.

Um ástæðu þess að biskup hafi óskað eftir því að bréf Axels yrði dregið til baka, segir Adda Steina, að í bréfinu hafi verið vísað til sálgæslu, þar sem prestur sé bundinn trúnaði, auk þess sem bréfið hafi verið undirritað í krafti embættis sóknarprestsins. Hún segir að Axel hafi sent inn tvær athugasemdir vegna fyrirhugaðra virkjana í Neðri-Þjórsá. Önnur hafi verið rituð í hans eigin nafni en hin hafi verið undirrituð af honum sem sóknarpresti. Biskup hafi óskað eftir því að embættisbréfið yrði dregið til baka.

Þegar undirrituð hafði samband við Sigurð Sigurðarson vegna málsins, sendi hann þetta svar á tölvupósti:

“Þú spurðir mig Arna um aðkomu mína að því að séra Axel Árnason dró til baka bréf til skipulagsfulltrúa uppsveita Árnessýslu.Eftir að bréfið hafði verið gert opinbert í sjónvarpsfréttum höfðu nokkur sóknarbörn séra Axels samband og klöguðu það að hann hefði sent þetta bréf í nafni embættis síns og innsiglað með embættisstimpli.Vegna viðbragða þeirra ákvað ég að hafa samband við prestinn og boða til fundar með honum og fulltrúum viðkomandi einstaklinga.Sá fundur var boðaður í samræmi við þá embættisskyldu mína að leita sátta í ágreiningsefnum innan safnaðanna.Á fundinum var eingöngu fjallað um aðferð séra Axels við birtingu athugasemdanna en ekki um efnislegt innihald þeirra.Brýndi ég bæði fyrir sóknarpresti og viðkomandi sóknarbörnum að ekkert okkar vildi gera neitt sem gæti orsakað ásakanir um skoðanakúgun og voru allir sammála um það.Á þessum fundi féllst hann á að draga bréfið til baka, og þá aðeins vegna forms framsetningar þess en ekki vegna innihalds athugasemdanna.”

Síðan skrifar hann: “Eflaust má deila um hvað embættisheiti og embættisstimplar eigi að þýða í bréfaskriftum.Löng hefð er innan kirkjunnar fyrir því að slíkt skuli notað með mjög formlegum hætti.Það þurfum við prestarnir að virða til þess að vera svo aftur á móti frjálsir að því að hafa skoðun á viðkvæmum og pólitískum ágreiningsmálum samtíðarinnar.”

Að lokum skrifar hann: “Séra Axel getur vitnað um það sjálfur að eftir þennan fund áminnti ég hann um að halda sem einstaklingur fast við skoðanir sínar á náttúruverndar og virkjanamálum.Það mun hann eflaust gera og óska ég honum alls góðs í því.”

Axel dró umrætt bréf til baka, eins og áður sagði, með erindi til skipulagsfulltrúans dagsettu 14. mars. Í því segir: “Ég, undirritaður sóknarprestur Stóra-Núpsprestakalls dreg hér með til baka bréf mitt dagsett 27. febrúar sl. og harma þann sársauka sem það hefur valdið. Virðingarfyllst, Axel Árnason, sóknarprestur Stóra-Núpsprestakalls.”

Það er frábært fyrir miðbæjarrottu eins og mig að vinna niðrí miðbæ Reykjavíkur. Krónikan hefur semsé aðsetur á Hverfisgötunni, í skrifstofurými á jarðhæð.

Stutt í allt, eins og ég hef sagt áður, kaffihúsin, veitingastaðina, búðirnar og að sjálfsögðu erum við líka nálægt mikilvægum stöðum eins og stjórnarráðinu, Alþingi, héraðsdómi, Hæstarétti, Seðlabankanum…

Við vinnum í opnu rými og auðvelt að kíkja inn á okkur frá götunni. Minnir að því leytinu til á stóru dagblöðin í Skandinavíu sem hafa aðsetur í miðbænum. Mér hefur alltaf þótt það sjarmerandi.

En ég verð að viðurkenna að stundum líður mér eins og gullfiski í fiskabúri, því fólk á það til að stoppa við gluggana okkar og stara inn, eins og við séum…jú fiskar í fiskabúri…

Athygli hefur vakið að Hannes Smárason gefur ekki kost á sér áfram í stjórn Glitnis þrátt fyrir að hafa nýverið bætt við sig hlutum í Glitni. Nú velta menn því fyrir sér hvaða skýringar liggja þar að baki. Spurning hvort þetta sé taktík til að róa umræðuna í kringum bankann.

Viðskiptalífið veltir því fyrir sér hvort Hannes ætli Jóni Sigurðssyni að verða formaður stjórnar Glitnis á næsta hluthafafundi sem er 30. apríl. Jón er einn nánasti samstarfsmaður Hannesar. Jón er ungur að árum: fæddur 1978.

En allt eru þetta bara vangaveltur manna í millum, enn sem komið er. Hluthafafundur er 30. apríl, eins og áður sagði, en þá mun liggja fyrir hvernig ný stjórn skiptir með sér verkum.